Afurika y’Epfo: Abadepite baratora gutakariza icyizere Perezida Zuma

Yanditswe na Ferdinand Maniraguha
Kuya 8 Kanama 2017 saa 08:24
Yasuwe :
0 0

Abadepite muri Afurika y’Epfo kuri uyu wa Kabiri baratora mu ibanga ku ngingo yo gutakariza icyizere Perezida Jacob Zuma kubera ibyo aregwa birimo ruswa no gutonesha.

Perezida w’Inteko Ishinga Amategeko, Umutwe w’Abadepite, Mbeleka Mbete, yavuze ko kuba batorera mu ibanga ari ku neza y’igihugu.

Zuma yagiye asimbuka gukurwa ku mwanya w’umukuru w’igihugu inshuro nyinshi gusa ashobora kudahirwa kuko benshi mu badepite be batinyaga kugaragaza ko batamushyigikiye mu ruhame bashobora kumukuraho amaboko.

Umuyobozi w’Ishyaka ritavuga rumwe na Leta, Economic Freedom Fighters, Julius Malema, yatangarije Financial Times dukesha iyi nkuru ko bizeye gukuraho Zuma.

Yagize ati “Dufite icyizere kirenze turabona abenshi badushyigikiye haba mu batavuga rumwe na Leta ndetse n’abadepite ba ANC.”

Abasesenguzi bagaragaje ko bamwe mu badepite ba ANC, ishyaka rya Zuma, bashobora kwanga kumukuraho icyizere dore ko ngo hari n’ababwiwe ko kumuvanaho amaboko ari nko gutera igisasu kuri guverinoma.

ANC niyo iyoboye Inteko Ishinga Amategeko kuko ifite abadepite 249 muri 400. Kugira ngo abatavuga rumwe na Leta batsinde birasaba ko baza kubona abadepite 50 ba ANC babashyigikira.

Abadepite baramutse bemeje gutakariza icyizere Zuma, Perezida w’Inteko Ishinga Amategeko niwe umusimbura by’agateganyo, mu minsi 30 abadepite bakaba batoye undi umusimbura.

Jacob Zuma ashobora gutakarizwa icyizere cyo kuyobora Afurika y'Epfo
Ku wa Mbere w'iki Cyumweru hongeye kuvuka imyigaragambyo mu Mujyi wa Cape Town muri Afurika y'Epfo yamagana Perezida Jacob Zuma
Perezida w'Inteko Ishinga Amategeko muri Afurika y'Epfo, Baleka Mbete (ibumoso), nyuma y'ikiganiro n'abanyamakuru cyatangarijwemo ko Jacob Zuma ashobora kweguzwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza