Kwamamaza

Afurika ikomeje kuba isibaniro ry’intambara kubera kujenjekera uburezi-UNESCO

Yanditswe kuya 11-09-2016 saa 09:41' na Ntakirutimana Deus


Raporo yakozwe n’Ishami ry’ Umuryango w’Abibumbye rishinzwe Uburezi, Ubumenyi n’ Umuco [UNESCO] igaragaza ko bimwe mu bice by’ibihugu bya Afurika byajenjekeye uburezi bikunze kurangwamo imitwe y’iterabwoba ndetse n’intambara z’urudaca.

Iyo raporo yasohowe ku wa Kabiri tariki ya 6 Nzeli 2016 igaragaza ko ubujiji buri muri bimwe mu bikomeje kwima Afurika amahoro, binatuma hari igice runaka gihoramo intambara.

Muri rusange ibihugu 22 byo munsi y’Ubutayu bwa Sahara, bihoramo intambara n’amakimbirane y’urudaca, byose biterwa n’ingaruka mbi z’ubujiji.

Muri ibyo bihugu usanga hari ibice bifite abaturage benshi batagize amahirwe yo kugana ishuri, ibyo bice bifite ibyago bingana na 50% byo kugira ngo imyaka 21 ibe ari cyo gihe kinini bimara bitarangwamo intambara n’amakimbirane.

Ibyo ariko bitandukanye no mu bice birimo abaturage benshi bize, aho usanga bishobora kumara imyaka 346 nta ntambara ibibayemo.

Imitwe y’inyeshyamba ishingwa muri ibyo bihugu ikunze gushakira abayoboke mu rubyiruko rutakandagiye mu ishuri, akenshi ruba rwugarijwe n’ubushomeri.

Iyo raporo yongera kugaragaza ko muri Sierra Leone urubyiruko rutize rwagiye mu mitwe y’inyeshyamba rukubye inshuro icyenda urw’abize. Ni ukuvuga ko mu basaga miliyoni, ibihumbi 900 batakandagiye mu ishuri, mu gihe abagera ku bihumbi 100 ari abarangije nibura kaminuza.

Ubushakashatsi bwakorewe muri Benin, Ghana, Kenya na Sénégal bwagaragaje ko abayobozi batorewe guhagararira abaturage bafite amashuri yisumbuye gusa aribo bagize uruhare rukomeye mu gushinga imitwe y’abarwanyi bakunze guteza umutekano mucye muri ibi bihugu.

Ubujiji bukomeje kubera umusaraba Afurika n’abandi bakennye

Si buri wese wakwadukira gusenya ibikorwa byinjiriza igihugu akayabo, nkuko biherutse kuba mu 2012, ubwo abagize umutwe w’Ansar Dine [ugendera ku mahame y’idini ya Islam] muri Mali biraye i Tombouctou ahari amateka y’abami nay’uko Islam yinjiye muri Afurika mu 1329 yashyizwe mu murage w’Isi akigishwa mu mpande zitandukanye babyiraragamo bakabisenya.

Hari ahandi usanga abaturage bamwe bateye abandi bakabica babaziza ko badahuje idini nkuko byabaye muri Centrafrique hagati y’imitwe ibiri, uw’abayisilamu Séléka na Anti-Balaka ibarizwamo abakirisitu.

Ibyo akenshi biterwa n’ubujiji, usanga abafite ubumenyi buke bagendera mu kigare cy’abajijutse bifitiye inyungu zabo bakababeshya, bakishora muri ibyo bikorwa.

Ubujiji butuma ibihugu bya Afurika bitabona ababitekerereza mu by’igenamigambi bahagije, ndetse n’abakozi bafite ubushobozi nkenerwa ku isoko ry’umurimo.

Umuti w’icyo kibazo ni uko leta zigomba gushora imari mu burezi, cyane mu mashuri y’ubumenyingiro na kaminuza.

Muri Afurika yo munsi y’Ubutayu bwa Sahara usanga abitabira kaminuza batarenze 8% by’abahatuye nkuko bigaragazwa na raporo yakozwe muri 2014.

Kuba amasomo y’ubumenyingiro atitabwaho uko bikwiye, bitera igihombo gikomeye Isi, ndetse bigatuma umubare w’abakozi bafite ubumenyi bwigirwa muri ayo mashuri bagabanuka.

Iyo raporo igaragaza ko gushora imari mu mashuri makuru na za kaminuza muri Afurika yo munsi y’ubutayu bwa Sahara, ariko hanatezwa imbere urwego rw’ubumenyingiro nibura mu gihe cy’umwaka umwe bishobora gutuma umusaruro mbumbe w’igihugu(GDP) wiyongeraho 16%.

Imibare ya Unesco igaragaza ko mu bihugu bikize ku Isi, abantu 55% bakuru bari hagati y’imyaka 25-64 bize amashuri abanza gusa ari bo bari bafite akazi muri 2013. Mu gihe abagafite bize ayisumbuye bari 73%, abize ubumenyingiro ari 83%.

Igaragaza kandi ko ibihugu 10 mu bigize Umuryango w’Ubumwe bw’i Burayi bishyize mu bikorwa intego za 2020 zigamije kugabanya umubare w’abata ishuri imburagihe, bakongera umubare w’abitabira amashuri y’ubumenyingiro, byagabanya abasaga miliyoni 3,7 ku mubare w’abugarijwe n’ubukene ku Isi.

Ku bijyanye n’ubuzima igaragaza ko abagore bo muri Afurika mu gice cyo munsi y’ubutayu bwa Sahara babaye baragannye ishuri kugera ku rwego rw’amashuri yisumbuye byafasha kugabanya abagera kuri miliyoni 3.6 ku mubare w’ abana bapfa bari munsi y’imyaka itanu.

Ubujiji bwibasiye abagore muri Afurika

Mu bihugu bya Afurika usanga abagore barahejwe muri gahunda zitandukanye zirimo kugana ishuri, aho akenshi usanga bahabwa imirimo yo mu ngo, abakobwa bagafasha ababyeyi, abahungu bakajyanwa ku ishuri.

UNESCO igaragaza ko kwigisha abagore mu gihe cy’umwaka umwe gusa bishobora gufasha kurinda abana 174 ku gihumbi bari gupfa bavuka.

Muri Peru kwiyongera kw’ingo zifite amashanyarazi byavuye kuri 7.7% mu 1993 bigera kuri 70% muri 2013, byatumye umubare w’abana bagana ishuri barimo n’uw’abakobwa wiyongera ndetse n’igihe cyo kwiga kiyongeraho iminota 93 ku munsi.

Muri Pakistan muri 2008 kwegera abagore babashishikariza kwitabira amatora byatumye umubare w’abagore bayitabiriye wiyongeraho 12%.

Mu gihe ibihugu bikennye byagera ku kigero byiyemeje cy’abaturage babyo bagomba kurangiza amashuri yisumbuye kugera muri 2030 abantu basaga miliyoni 60 bazaba baravuye mu bukene kugeza muri 2050.

Umuyobozi Mukuru wa UNESCO, Irina Bokova

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved