Afurika ikeneye miliyari $1400 zo kuziba icyuho mu nyubako ziciriritse

Yanditswe na Sekamana Mathias
Kuya 13 Kanama 2019 saa 08:33
Yasuwe :
0 0

Ikigo gishora imari mu bikorwa by’ubwubatsi buciriritse muri Afurika, Shelter Afrique, cyatangaje ko uyu mugabane ufite icyuho cya miliyari $1400, kugira ngo ubashe guhaza abawutuye mu bijyanye n’inyubako ziciriritse.

Kuri uyu wa Kabiri, Umuyobozi wa Shelter Afrique, Andrew Chimphondah yavuze ko byinshi mu bihugu bya Afurika bifite ikibazo cy’amacumbi bitewe n’ubwiyongere bw’abaturage, kwaguka kw’imijyi, imiturire mibi n’uburyo bigoye kugera ku mafaranga.

Ubushakashatsi bw’iki kigo bwagaragaje ko umugabane wa Afurika ukeneye amacumbi arenga miliyoni 56, kandi muri izo nzu zikenewe, 90% cyangwa se inzu miliyoni 45 zigomba kuba ari amacumbi aciriritse.

Chimphondah yagize ati "Ibi bisobanuye ko kugira ngo hakemurwa ikibazo cyamacumbi aciriritse, yubatswe ku mpuzandengo y’ibihumbi 25 by’amadolari ya Amerika ku icumbi rimwe, uyu mugabane ukeneye miliyari 1400 z’amadolari ya Amerika hatabariwe mo ikiguzi cy’ibyakwangirika muri uko kubaka.”

Chimphondah yavuze ko ibihugu bifite ikibazo kiri hejuru mu bijyanye n’amacumbi ari Nigeria ikeneye agera kuri miliyoni 22, Tanzania na Repubulika iharanira Demokarasi ya Congo zikeneye amacumbi agera kuri miliyoni eshatu, Kenya, Afurika y’Epfo na Madagascar bikeneye arenga miliyoni ebyiri.

Chimphondah kandi yavuze ko amafaranga uyu mugabane uzakenera azakomeza kwiyongera kuko hari ibihugu bikomeje kugira ubwiyongere bukabije bw’abaturage n’ubwiyongere bw’imijyi.

Yavuze ko umuti w’iki kibazo uri mu mbaraga zihurijwe hamwe hagati y’abo bireba harimo leta z’ibihugu, imiryango idaharanira inyungu n’inzego z’abikorera.

U Rwanda ni kimwe mu bihugu birebwa n'ikibazo cy'inzu ziciriritse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza