Kwamamaza

Abayobozi ba RDC bagabanyirijwe uburenganzira bwo kujya mu Bubiligi

Yanditswe kuya 6-10-2016 saa 20:55' na Philbert Hagengimana


Leta y’u Bubiligi yagabanyije uburenganzira bwo kuba muri icyo gihugu (Visa) ku banyecongo bakoresha impushya z’inzira z’ubuyobozi (passeports diplomatiques) kubera impungenge ku hazaza h’icyo gihugu nyuma y’imvururu zishingiye ku matora.

Minisitiri w’Ububanyi n’amahanga w’u Bubiligi, Didier Reynders, yatangaje ko uruhushya rw’ababayobozi muri Repubulika iharanira Demokarasi ya Congo (RDC) ruvanywe ku mwaka umwe, rugashyirwa ku mezi atandatu (6), bitewe n’uko imiterere ya politiki muri iki gihe iteye inkeke.

Icyakora ngo icyo cyemezo cyafashwe kuwa 4 Ukwakira 2016 ntikireba abaturage basanzwe, ahubwo kireba abagize Guverinoma n’abahagarariye RDC mu bihugu no mu nzego zitandukanye.

Didier Reynders akomeza avuga ko u Bubiligi butewe inkeke na politiki muri RDC bitewe n’itariki ya 19 Ukuboza 2016 isanzwe ari yo ntarengwa y’ubutegetsi bwa Joseph Kabila nk’uko biteganywa n’Itegeko Nshinga, ariko hakaba harasohotse raporo ya Komisiyo y’amatora yimurira amatora y’umukuru w’igihugu mu Ugushyingo 2018.

Ati “Ntekereza ko ari ngombwa ko dutanga ubutumwa tugaragaza ko tutazi uko bizaba bimeze mu mwaka utaha, niba twakwizera ko bizakomeza nta mpinduka ibayeho […] Muri rusange amatora yagombaga kuzaba muri uyu mwaka. Rero ubwo butumwa bugomba kuba busobanutse muri rubanda ndetse no kuruta mu batavuga rumwe n’ubutegetsi.”

Yakomeje avuga ko byizewe neza ko amafishi y’itora azaboneka mu mpeshyi y’umwaka utaha, bityo “mbere y’impera ya 2017 amatora ashobora gukorwa, atari n’ay’umukuru w’igihugu gusa ahubwo n’ayabagize Inteko Ishinga Amategeko.”

Yanagarutse ku kamaro ko gukomeza ibiganiro by’amahoro byatangiye kuwa 1 Nzeri, avuga ko bikwiye ko abari ku isonga y’abatavuga rumwe n’ubutegetsi nka Étienne Tshisekedi cyangwa Moïse Katumbi babanza kumvishwa umusaruro mwiza ushobora kubivamo, bityo hakabaho ibiganiro nyakuri bidaheza.

Minisitiri w’Ububanyi n’amahanga w’u Bubiligi, Didier Reynders

Icyemezo cya Leta y’u Bubiligi gifashwe nyuma y’aho ibibazo bya politiki muri RDC bigarutsweho mu nama rusange y’Inteko Ishinga Amategeko y’Umuryango w’Ubumwe bw’u Burayi, aho Umunyecongo Cécile Kashetu Kyenge uhagarariye u Butaliyani muri iyo Nteko yasabye ko hafatwa ingamba zikaze.

Aganira n’Ibiro Ntaramakuru mu Karere k’ibiyaga bigari (Agence Info Grand Lacs) Cécile Kyenge yagize ati “Ubutumwa natanze bwari busobanutse, kwari ugusaba ko hafatwa ibyemezo bikwiye ku bantu bafashe bugwate abaturage ba Congo n’ingamba ku bica nkana ibiteganywa n’Itegeko Nshinga ndetse n’abakora ibyaha byibasira inyoko muntu.”

Akomeza avuga ko kuri ubwo butumwa, yashakaga kumvikanisha ko hakwiye kubaho ko ubutegetsi nshingamategeko butandukanywa na nyubahirizategeko ndetse n’ubw’ubucamanza, ari na cyo cyatuma bwigenga kandi bugakorera mu mucyo, bityo hagacika umuco wo kudahana abahungabanya uburenganzira bwo gutanga ibitekerezo, abakora ubwicanyi butandukanye ahantu hatandukanye mui RDC.

Yakomeje agira ati “Birakwiye ko tuva mu magambo hagakorwa ibikorwa bifatika, bigamije guhatira Leta ya Congo kwerekana ko abaturage noneho bafite uburenganzira bwo gutanga ibitekerezo, ko bafite uburenganzira bwabo, kandi ko bashobora kwihitiramo uburyo bakwiye kubaho, ubundi ababahohotera bakagezwa imbere y’ubutabera.”

Depite Kyenge yakomeje anasaba ibindi bihugu bigize Umuryango w’Ubumwe bw’u Burayi kugera ikirenge mu cy’u Bubiligi, bagafatira ibihano Leta ya Congo atari kugabanya Visa gusa, ahubwo no mu byo bari basanzwe babateramo inkunga, ati “Ni icyemezo jyewe nashigikiye kandi mbona nk’ukuri, ahubwo n’ibindi bihugu binyamuryango bikwiye kurebaraho.”


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved