00:00:00 IGIHE NETWORK KN KINYARWANDA EN ENGLISH FR FRANCAIS

Abashyigikiye Jacob Zuma bigaragambije

Yanditswe na Muhonzire Sylvine
Kuya 5 Nyakanga 2021 saa 05:26
Yasuwe :
0 0

Abantu benshi bakikije urugo rw’uwahoze ari Perezida wa Afurika y’Epfo, Jacob Zuma, wahamijwe ibyaha bya ruswa n’urukiko agakatirwa igifungo cy’amezi 15, bavuga ko biteguye guhangana n’uwo ari wese uri butinyuke kuza kumujyana muri gereza.

Ku itariki 29 Kamena 2021 nibwo urukiko rwatangaje ko Zuma agomba gufungwa bitarenze kuwa 04 Nyakanga 2021, kubera gusuzugura urukiko rwari rwamusabye kwitaba mu iperereza ku byaha bya ruswa aregwa ko yakoze ubwo yari perezida w’iki gihugu mu 2009-2018.

Zuma w’imyaka 79, ntiyemera igihano yahawe n’urukiko ndetse yarakijuririye urukiko rurabyemera, ku itariki 12 Nyakanga biteganyijwe ko ruzumva ubujurire bwe.

Ubwo abayoboke be bari bateraniye ku rugo rwe ruherereye mu Ntara ya KwaZulu-Natal ahitwa Nkandla, mu ijoro ryo ku cyumweru tariki 04 Nyakanga 2021, bavugaga ko polisi niza kumutwara iri bubahereho batari bwemere ko agenda.

Zuma yabwiye itangazamakuru ko nta mpamvu ihari yatuma ajyanwa muri gereza ndetse ko Afurika y’Epfo itangiye gusubira inyuma, isigaye iyoborwa nka mbere ubwo hariho ubutegetsi bwa Apartheid bwashyiraga imbere irondaruhu.

Yongeyeho ati “Uburyo nahohotewe nkahabwa igihano cy’igifungo nta rubanza rubayeho ubwabyo bigomba gutera ikibazo abantu bose bemera ubwisanzure kandi bakizerera mu mategeko.”

Mu bari baje kwigaragambya hari harimo n’abaturage bagenze ibilometero birenga 400 kugira ngo intwari yabo idafungwa, cyane ko Zuma afatwa nk’umuntu ukomeye kuko yafunzwe imyaka irenga icumi aharanira ko ubutegetsi bwa Apartheid buvaho muri Afurika y’Epfo.

Yabwiye abayoboke be ati “Njyewe sintewe ubwoba no kujya muri gereza kuko nafunzwe igihe kinini mparanira ubwigenge ndetse n’uburenganzira bw’Abanyafurika y’Epfo ariko birasa nkaho nzongera nkatangira bushya nkongera guharanira ubwigenge nanone. Gusa nta muntu numwe uzankangisha ko azi amategeko ngo anyake uburenganzira bwanjye.”

Bamwe muri bo bari bambaye imipira yanditseho ngo “Wenzeni uZuma?” mu rurimi rw’ikizulu, bivuga ngo “Ni iki Zuma yakoze?”. Hanumvikanye urusaku rw’amasasu barasa hejuru, abandi bafite intwaro gakondo z’abazulu.

Ibyo aba bayoboke be bakoze birabujijwe muri iki gihugu kuko binyuranyije n’amabwiriza yo kwirinda Covid-19 kuko bitemewe ko abantu baterana ari benshi kandi batambaye udupfukamunwa.

Zuma yagiye ashinjwa kenshi ibyaha bya ruswa ndetse ni nabyo byatumye akurwa ku buyobozi bw’iki gihugu.

Jacob Zuma yavuze ko nta mpamvu ihari ishobora gutuma ajya muri gereza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .