Abarwanyi 15 ba FDLR/Foca barimo Abanyarwanda barindwi bishyikirije Monusco

Yanditswe na Bukuru JC
Kuya 19 Werurwe 2017 saa 08:37
Yasuwe :
0 0

Abarwanyi 15 b’umutwe wa FDLR/Foca, bashyize intwaro hasi bishyikirizwa ingabo z’Umuryango w’Abibumbye ziri kubungabunga amahoro muri Repubulika Iharanira Demokarasi ya Congo, MONUSCO.

Aba barwanyi bishyikirije ingabo za Monusco zifite ibirindiro ahazwi nka Kanyabayonga kuwa Gatatu tariki ya 15 Werurwe 2017 mu gace Lubero muri Kivu y’Amajyaruguru.

Mu barwanyi bishyikirije Monusco, Radio Okapi ivuga ko harimo abanyarwanda barindwi, Umurundi umwe ndetse n’Abanye-Congo barindwi baherekejwe n’umusirikare umwe ndetse n’undi ufite ipeti rya Lieutenant-Colonel amazina ye atigeze atangazwa.

Aba barwanyi barimo Abanyarwanda barindwi, Umurundi n’Abanyekongo barindwi, bari baturutse mu gace ka Luvoya bafite imbunda 14 zo mu bwoko bwa AK-47, bazishyikirije Monusco.

Sosiyete Sivile mu gace ka Lubero yatangaje ko gushyira intwaro hasi kw’aba barwanyi ari igisubizo cy’ubukangurambaga bumaze iminsi bukorwa n’abanyamuryango bayo. Icyifuzo ni uko aba barwanyi b’abanyamahanga basubizwa mu bihugu bakomokamo.

Abarwanyi 66 b’Abanyarwanda babarizwaga muri FDLR hamwe n’abantu 291 babakomokaho, bishyikirije Monusco ku bushake kuwa 28 Ukuboza 2014 muri aka gace ka Kanyabayonga n’ubu niho bagicumbikiwe.

Imiryango itandukanye nk’Umuryango w’Abibumbye, Umuryango w’Ubumwe bwa Afurika, Umuryango w’Abanyaburayi, Inama Mpuzamahanga y’Akarere k’Ibiyaga Bigari, yose yemeje ko FDLR ifatwa nk’umutwe w’iterabwoba. Kuva tariki ya mbere Ugushyingo 2005, mu myanzuro myinshi, nk’umwanzuro 1596 n’uwa 1896, Inama ishinzwe umutekano y’Umuryango w’Abibumbye yafatiye ibihano abayobozi ba FDLR.

Mu mwanzuro 2150 wo mu 2014 washyizweho umukono tariki ya 16 Mata 2014, Inama ishinzwe Amahoro yibukije ko abayobozi n’abandi bagize FDLR bari mu bakoze Jenoside yakorewe Abatutsi mu 1994 mu Rwanda; iranibutsa ko abagize FDLR bari mu gatsiko kafatiwe ibihano n’Umuryango w’Abibumbye bakomeje gukora ubwicanyi bushingiye ku moko, ndetse n’ubundi bwicanyi mu Rwanda no muri Repubulika Iharanira Demokarasi ya Congo, ikanibutsa ko ari ngombwa kubuza ako gatsiko gukomeza ibyo bikorwa nk’uko biteganywa n’umwanzuro 2098.

Abarwanyi ba FDLR bashyize intwaro hasi bishyikiriza MONUSCO, abaishaka bagacyurwa mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244