00:00:00 IGIHE NETWORK KN KINYARWANDA EN ENGLISH FR FRANCAIS

Abarundi barindwi batawe muri yombi bazira kohereza ibicuruzwa mu Rwanda

Yanditswe na Kanamugire Emmanuel
Kuya 22 Gicurasi 2021 saa 12:15
Yasuwe :
0 0

Inzego zishinzwe umutekano mu Burundi zatangaje ko zataye muri yombi abantu barindwi bakoreraga ubucuruzi ku butaka bw’u Rwanda mu gihe ubuhahirane hagati y’ibihugu byombi bwahagaze.

Abafashwe muri uku kwezi kwa Gatanu ni abagabo barindwi bafatanywe amabaro y’imyenda ya caguwa nk’uko byatangajwe na Polisi y’u Burundi, bafatiwe mu Ntara ya Kirundo muri Komine Bugabira.

Kuva mu 2014 ubuhahirane hagati y’u Rwanda n’u Burundi bwarahagaze kubera urwikekwe aho buri gihugu gishinja umuturanyi wacyo uruhare mu kugihungabanyiriza umutekano.

Byaje guhumira ku mirari nyuma y’igerageza ryo guhirika ubutegetsi bwa Pierre Nkurunziza mu 2015, isanganya ryakurikiwe n’umubare munini w’impunzi z’Abarundi zahungiye mu Rwanda kubera imvururu n’urugomo zakorerwaga mu gihugu cyabo.

U Burundi bwabujije abaturage babwo kugira ibicuruzwa bongera kohereza mu Rwanda, Abanyarwanda na bo bahagarika kwinjira ku butaka bw’u Burundi hirindwa ko umutekano wabo wahungabana.

Imipaka ya Bugarama, Kanyaru Haut, Kanyaru Bas na Nemba nticyakira urujya n’uruza rw’Abarundi n’Abanyarwanda nka mbere.

U Rwanda rwoherezaga mu Burundi ibicuruzwa bijyanye ahanini n’ibikomoka ku buhinzi harimo ibirayi, ibishyimbo ibigori, amata rugakurayo cyane cyane imbuto.

Nyuma y’igihe gito u Burundi bufashe icyemezo cyo gukumira ubucuruzi hagati y’ibihugu byombi byagize ingaruka zikomeye ku bucuruzi bw’u Rwanda nk’uko byigeze gutangazwa n’uwari Minisitiri w’Ubucuruzi n’Inganda, François Kanimba.

Icyo gihe yagize ati “Inganda zacu zari zimaze kugira umuvuduko w’ubucuruzi mu gihugu cy’u Burundi, abacuruzi benshi bari baragiyeyo basinya amasezerano n’abantu babafasha gucuruza ibicuruzwa bimwe na bimwe bikorerwa mu Rwanda ariko aho icyo gihugu kigiriye mu bibazo na mbere y’uko bafata icyo cyemezo cyo kuvuga ngo ntibacuruza n’u Rwanda hagati y’umwaka 2014-2015 ibyo twoherezaga mu Burundi byagabanutseho hafi nka 40%.”

Ku rundi ruhande abaturage b’u Burundi cyane abegereye imipaka ibahuza n’u Rwanda bararira; bakunze kumvikana mu bitangazamakuru bavuga ko banyotewe no kongera guhererekanya ibicuruzwa n’abaturanyi babo bo mu Rwanda kuko kuba bidakorwa ari igihombo kinini kuri bo.

Uretse ubuhahirane hagati y’ibihugu byombi, umubano mubi w’u Rwanda n’u Burundi wagize ingaruka no ku miryango imwe yashyingiranye cyangwa ifitanye amasano muri za komine Kabarore, Busiga, Mwumba, Marangara na Ntega aho imigenderanire yayo n’abayo bo mu turere twa Nyaruguru na Gisagara mu majyepfo y’u Rwanda.

Abayobozi ku mpande zombi mu bihe bitandukanye bagiye batangaza ko hari ubushake n’intambwe imaze guterwa ku buryo hari icyizere ko mu bihe bya vuba ibihugu byombi bishobora kongera guhahirana.

Abarundi bafatanywe imyenda ya caguwa bacuruzaga mu Rwanda
Polisi y'u Burundi yatangaje ko iyi myenda bayicuruzaga mu buryo butemewe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .