Abantu barindwi baguye mu myigaragambyo yongeye kubura muri Sudani

Yanditswe na Habimana James
Kuya 1 Nyakanga 2019 saa 07:56
Yasuwe :
0 0

Abatari bake muri Sudani bongeye kwigabiza imihanda mu Murwa Mukuru Khartoum kuri iki Cyumweru, mu myigaragambyo yatumye abantu barindwi bapfa, abandi 180 bagakomereka.

Iyi myigaragambyo yabereye hafi y’Ibiro Bikuru by’Umukuru w’Igihugu, aho abaturage bahuriye n’inzego zishinzwe umutekano zibarasamo amasasu n’imyuka iryana mu maso.

Umuyobozi wungirije w’Akanama ka Gisirikare kayoboye igihugu mu nzibacyuho (TMC), General Mohamed Hamdan Dagalo, yavuze ko "Hari ba mudahushwa barashe abantu barindwi barapfa, birababaje kandi turifuza ko ibintu bisubira mu buryo."

Kuri uyu wa Mbere, TMC yatangaje ko abasirikare barashe abaturage batawe muri yombi.

Umuyobozi Ushinzwe Ibijyanye n’Umutekano muri TMC, Gen. Jamal Omer, yavuze ko abafashwe n’Umutwe w’Ingabo utabara aho rukomeye, The Rapid Support Forces (RSF), "batunzwe agatoki n’abaturage bari mu myigaragambyo hafi y’Ibitaro bya Gisirikare mu mujyi wa Omdurman."

Yavuze ko hari n’abasirikare batatu ba RSF bakomerekeye muri icyo gikorwa, mu gihe abaturage babiri bapfuye abandi benshi bagakomereka.

Ibiro Ntaramakuru by’Abanyamerika, The Associated Press, byagaragaje amashusho yerekana abigaragambya birukanka bahunga inzego z’umutekano mu mihanda y’Umurwa Mukuru Khartoum bashaka aho bihisha.

Ibinyamakuru byavuze ko iyi myigarambyo yabaye mu rwego rwo kwihiziha imyaka 30, ubwo Bashir yahirikaga ubutegetsi mu 1989. Na we yavanwe ku buyobozi muri Mata 2019 nyuma y’imyigaragambyo ikaze yakozwe n’abaturage.

Mu myigaragambyo yakurikiye iri hirikwa, abantu 128 ni bo bamaze gupfa nk’uko abayitegura babitangaje, naho igisirikare cyo kivuga ko hamaze gupfa abantu 61 barimo abo mu nzego z’umutekano batatu.

Abantu 128 ni bo bamaze kugwa muri iyi myigaragambyo
Abantu ibihumbi bigabije imihanda mu Murwa Mukuru Khartoum
Abigaragambya barashaka ko igisirikare kiva ku butegetsi
Inzego z'umutekano zarashe imyuka iryana mu maso mu gutatanya abaturage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza