Abantu 5000 bamaze guhitanwa n’iseru muri RDC

Yanditswe na Ndayikunda Josué
Kuya 22 Ugushyingo 2019 saa 03:13
Yasuwe :
0 0

Guverinoma ya Repuburika Iharanira Demokarasi ya Congo yatangaje ko icyorezo cy’Iseru kimaze guhitana abagera ku 5000 mu 2019.

Imibare igaragaza ko kugeza ubu mu 2019 habarirwa abantu ibihumbi 250 bashya bamaze kwandura indwara y’iseru, byanatumye Ishami ry’Umuryango w’Abibumye ryita ku Buzima (OMS) ritangaza ko icyi aricyo cyorezo cya mbere ku isi cyanduje abantu benshi mu gihe gito.

BBC ivuga ko nubwo Ebola ariyo yakunze kuvugwa muri RDC, ngo iseru imaze guhitana ubuzima bw’abantu bakubye inshuro ebyiri z’abo Ebola imaze kwica mu mezi 15.

Guverinoma ya Repuburika Iharanira Demokarasi ya Congo ifatanyije na OMS bamaze gukingira abana miliyoni 4, gusa ngo nta nubwo bageze kuri ½ cy’abana bose bagomba gukingirwa mu gihugu hose.

Mu gihe abana bato aribo bakomeje kwibasirwa n’iki cyorezo, haracyari ikibazo cy’uko nta nkingo zihagije zihari bishobora no gutuma kwandura kwiyongera, nkuko BBC yabitangaje.

Ikindi nuko kuba nta bikorwa remezo bihagije bihari, kugaba ibitero kwa hato na hato ku bigo nderabuzima bikozwe n’inyeshyamba no kutitabira uburyo bwo kwivuza bihoraho ari bimwe mu bitiza umurindi ikwirakwira ry’indwara y’iseru.

Iseru n’indwara irangwa n’ibimenyetso byo kuzana amabara ku ruhu, ibicurane n’umuriro mwinshi. Ni indwara ikira ariko ishobora gusigira uwayirwaye ubumuga bw’igihe kirekire harimo no kubyimba k’ubwonko.

Abagera ku 110,000 ku isi bahitanwa n’indwara y’iseru buri mwaka.

Guverinoma ya Repuburika Iharanira Demokarasi ya Congo ifatanyije na OMS bamaze gukingira abana miliyoni 4

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza