Abagande na bo bagejejweho porogaramu ifasha kumenya amakuru y’abana ku mashuri

Yanditswe na Jean Pierre Tuyisenge
Kuya 21 Ukwakira 2016 saa 08:30
Yasuwe :
0 0

Mu minsi mike ishize u Rwanda rwatangije gahunda rwise Made in Rwanda, igamije kugurisha hanze ibyakorewe mu Rwanda byaba ibikoresho cyangwa ibishingiye ku bwenge.

Ikigo “Smart Initiative”gikora ibijyanye n’ikoranabuhanga cyatangije porogaramu ya mudasobwa yitwa ’Smart Parent’, ifasha umwarimu guha ababyeyi amakuru y’abana ku mashuri, bakabibona muri telefoni , ibi rero bamaze kubijyana no muri Uganda.

Byemejwe ubwo iki kigo cyasinyanaga amasezerano y’imikoranire n’icyo muri Uganda gikora iby’ikoranabuhanga na za Mudasobwa, Moquid, amasezerano y’Imikoranire azatuma ababyeyi b’Abagande bazajya babona raporo y’abana babo aho bari ku mashuri bibereye mu rugo.

Umuyobozi mukuru wa Smart Initiative Karasira Olivier, yatangarije IGIHE ko bifuje ko u Rwanda rwageza ubumenyi no hanze y’igihugu ngo babashe kuzamura ibendera ry’u Rwanda mu mahanga.

Yagize ati “Twasinyanye amasezerano n’Ikigo Moquid cyo muri Uganda kugira ngo gahunda yacu twahangiye mu Rwanda tubashe kuyigeza no mu bindi bihugu, ndetse bamenye ko hari ibyo twagezeho.”

Olivier yakomeje avuga ko iyi gahunda bayitangije hagamijwe gukurikirana imyigire n’imyitwarire y’umunyeshuri ku ishuri, hakoreshejwe uburyo bw’ikoranabuhanga, bakaba nyuma ya Uganda bazayigeza no mu bindi bihugu byo ku mugabane wa Afurika.

Umuyobozi Mukuru w’Ikigo Moquid, Bienfait Bitenyo, yavuze ko akimara kumva uburyo gahunda ya Smart Parent ikora, yifuje ko yayigeza na Uganda naho bakayimenya.

Yagize ati “ Nahuye na Olivier, tuganiriye kuri iyi gahunda numva ko hari icyo nkwiye gukora n’Abagande bakabimenya, Uganda yakomeje kurebera byinshi ku Rwanda ndakeka iyi gahunda na yo izakora kandi ikagenda neza.”

Smart Parents ni gahunda ifasha ababyeyi kumenya abana babo bari ku mashuri. Itanga raporo ku mwana mu buryo butanu burimo kumenya niba yitabiriye ishuri, igihe yagereye ku masomo, uko amerewe, isuku.

Olivier Karasira, Umuyobozi mukuru wa Smart Initiative na Bienfait Bitenyo uhagarariye Moquid
Olivier Karasira, Umuyobozi mukuru wa Smart Initiative
Umuyobozi Mukuru wa Moquid, Bienfait Bitenyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza