Abadepite b’u Burundi bamaganye raporo ya Loni ibushinja guhonyora uburenganzira bwa muntu

Yanditswe na Evariste Nsengimana
Kuya 13 Nzeri 2018 saa 06:49
Yasuwe :
0 0

Inteko Ishinga Amategeko y’u Burundi yamaganye raporo ya Komisiyo ya Loni ishinzwe gukora iperereza kuri icyo gihugu, ishyira mu majwi ubuyobozi bwacyo ko bukora ibikorwa bibangamira uburenganzira bwa muntu.

Mu munsi ishize Perezida w’iyo komisiyo, Doudou Diene, yavuze icyegeranyo bakoze cyerekanye ko mu Burundi hakiri ibikorwa bibangamira uburengenzira bwa muntu byatangiye mu 2015.

Icyo gihe nibwo hageragezwaga Coup d’Etat yo guhirika Perezida Nkurunziza ariko ikaza gupfuba.

Nubwo ngo atari byinshi, Doudou yavuze ko usanga imirambo y’abantu ku muhanda mu gicuku, hari ifungwa rya hato na hato, ibikorwa by’iyicarubozo, gufata ku ngufu n’ibindi.

Perezida w’Inteko Ishinga Amategeko, Pascal Nyabenda, yavuze ko icyo cyegeranyo nta kuri gifite ahubwo abagikoze bafite izindi nyungu.

Nyabenda yavuze ko bitumvikana ukuntu Loni itigeze ikora iperereza ku zindi mvururu zabaye mu Burundi.

Ati “Mu 1961, Intwari yaharaniye ubwigenge yarishwe. Mu 1972, habaye ubwicanyi mu gihugu. Mu 1993, Intwari yaharaniye Demokarasi yarishwe n’abandi. Kubera iki iriya Komisiyo ya Loni yashyiriweho imvururu za 2015?”

Yakomeje avuga ko hari abantu bihishe inyuma yayo bayiha amakuru y’ibinyoma bashaka guharabika isura y’igihugu

Perezida w’umutwe wa Sena, Reverien Ndikuryayo, yavuze ko iyo komisiyo iri kuyobywa n’abagize uruhare muri Coup d’Etat ya 2015 yapfubye.

Ikinyamakuru Iwacu News cyandikirwa mu Burundi cyatangaje k0 abadepite bo mu mashyaka atavugarumwe n’ubutegetsi bavuze ko Leta ikwiye kubanza igasesengura iby’iyo raporo ya Loni.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza