Musenyeri Mbonyintege yemeje ko Padiri Hildebrand yagambaniwe

Musenyeri Mbonyintege yemeje ko Padiri Hildebrand yagambaniwe


Yanditswe kuya 30-07-2012 - Saa 11:17' na Deus Ntakirutimana

Nyuma y’aho mu mu minsi ishize mu bitangazamakuru bitandukanye hagaragaye amafoto yanacicikanye ku mbuga nyinshi za internet aho yagaragazaga Padiri Mukuru wa Paruwasi ya Gitarama (Ruhina) Karangwa Hildebrand yafotowe aryamanye n’umugore, Umushumba wa Diyosezi ya Kabgayi akaba na Perezida w’Inama y’Abepiskopi mu Rwanda Musenyiri Mbonyintege Samaragde yatangaje ko ibyakorewe uyu mupadiri ari akagambane, ko byari bigamije kumuharabika.

Ari imbere y’imbaga y’abakirisitu barenga ibihumbi bitatu bari buzuye Bazilika ya Kabgayi mu itangwa ry’Ubusaseredoti bwa Padiri Nsengiyumva Faustin, uyu Mushumba wa Diyosezi yagarutse ku basaseridoti, n’uko bagombye kwitwararika kuko imbaraga z’inabi zirimo gukoresha ikoranabuhanga ngo zigire abo zisiga icyasha.

Ku bwa Musenyeri Mbonyintege yavuze ko urugero atanga ari ku byabaye kuri Padiri Karangwa Hildebrand wari wicaye kuri aritali hafi ye mu mwambaro uranga abahawe iryo sakaramentu, ngo watekewe imitwe hagamije kumuharabika. Musenyeri yagize ati “ Nyir’ubwite ari we Padiri Karangwa yanyibwiriye uko byagenze bimaze kuba, nanjye nagerageje gushishoza nk’umushumba we nsanga ibyo yambwiye birimo ukuri. Nta gushidikanya ko ababikoze bari bagamije ibintu 3 aribyo: kugambana, kwambura no kwandagaza “ .

Mbonyintege yirinze kugira izina atangaza ku waba yarakoze ibyo bikorwa yita iby’urukozasoni, nyamara yavuze ko ababikoze bari mu maboko y’ubutabera kandi akaba yanijeje iyi mbaga y’abari muri Bazilika ya Kabgayi ko azabereka ko uyu Musaseredoti wa Nyagasani yagambaniwe aho yagize ati” Nimutuze ndabizeza ko bizarangira neza ku buryo nzabibereka vuba kuko ubutabera butagohetse burimo gukurikirana iki kibazo”.

Yongeye gusaba buri wese kwitwararika kuko turi mu gihe abantu bakunda indonke batavunikiye aho usanga barangwa n’ubusambo. Gusa ntiyabuze kwibaza uharabika mugenzi we icyo aba agamije.

Ibi Musenyeri Mbonyintege avuze ku igambanirwa rya Padiri Karangwa Hildebrand ntaho bitaniye n’ibyatangajwe n’umwe mu bayobozi ba Kiliziya Gatulika mu Rwanda ku byo uyu mupadiri yamubwiye kuri ayo mafoto, aho yagize ati “Nahamagaye Padiri Hildebrand mubaza iby’aya mafoto, ambwira ko ibyamubayeho ari abatekamutwe babimukoze, ngo kuko bamusanze ari kumwe na Uwamurera Odette, maze ngo bamushyira icyuma ku ijosi, batangira kumutegeka ibyo akora, ubundi bagafotora, nyuma abamufotoye bamwatse amafaranga miliyoni icumi kugirango batazabishyira ahagaragara, nyuma arayabaha, nyuma bamwaka andi miliyoni eshatu, ariko baranga bayashyira ahagaragara.”

Mu kwezi kwa Gatanu nibwo amafoto yagaragazaga Padiri Karangwa Hildebrand, Padiri Mukuru wa Paruwasi ya Gitarama muri Diyosezi ya Kabgayi, aho yafotowe aryamanye n’umugore witwa Uwamurera Odette, iyi nkuru yavuzweho byinshi aho bamwe baviugaga ko ari akagambane kakorewe Padiri. Abakoze ibyo ndetse n’uyu mugore wafotoranwe na Padiri bari mu maboko y’ubutabera.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO