Ubuhanga bw’Abanyarwanda bo hambere mu buvuzi, bari bazi kubyaza no kubaga

Yanditswe na Iradukunda Serge
Kuya 5 Gashyantare 2021 saa 07:34
Yasuwe :
0 0

Amateka agaragaza ko kimwe n’ahandi hose ku Isi ubuvuzi bwatangiranye n’imibereho ya muntu kimwe no guhiga kurya n’ibindi, ibi bituma nta wakwemeza umwaka nyirizina ubuvuzi gakondo bwatangiye gukorwa mu Rwanda.

Umushakashatsi mu bumenyi kamere bushingiye ku muco, Munyaneza Emmanuel, yabwiye IGIHE ko no mu Rwanda rwo hambere habaga indwara nk’izihari uyu munsi nubwo rimwe na rimwe babaga badafite ubushobozi bwo kuzitahura.

Muri izi ndwara harimo nk’iy’umwijima y’uyu munsi itera umuntu kubyimba inda ariko mu Rwanda rwo hambere bakaba bari bayizi nk’urushwima.

Indi ndwara yabagaho mu Rwanda rwo hambere ni kanseri y’ibere, Abanyarwanda bitaga ifumbi y’ibere.

Mu bushakashatsi ngo byagiye bigaragara ko ibimenyetso byarangaga izi ndwara ari nabyo biranga iz’uyu munsi zavumbuwe ndetse zigahabwa amazina ya kizungu.

Munyaneza, yavuze ko mu ndwara zakundaga kwibasira Abanyarwanda habagamo izijyanye n’imikorere y’umubiri w’umuntu zizwi nka Metabolic disease zirimo iz’umwijima, impyiko n’umutima.

Izindi ndwara zabagaho ngo ni inzoka, iz’uruhu, imvune ndetse n’izandurira mu mibonano mpuzabitsina nka mburugu, uburagaza n’imitezi.

Munyaneza yavuze ko nubwo mu Rwanda rwo hambere ubuvuzi bwari butaratera imbere Abanyarwanda bagiraga uburyo gakondo bwo kuvura izi ndwara zose.

Ubumenyi bwo kuvura babukuraga he?

Munyaneza yavuze ko bitoroshye kumenya uko Umunyarwanda wa mbere yagize ubumenyi mu bijyanye no kuvura ariko yemeza ko bashobora kuba barabikomoye mu buryo bwo kwitegereza (observation).

Ubu buryo bwo kwitegereza bwagiye bufasha imiryango itandukanye ku Isi mu gutera imbere mu bijyanye n’ubuvuzi nk’aho bashoboraga kureba icyatsi runaka inyamaswa irishije igihe ifite ikibazo wenda cy’impiswi nabo bakaba bakifashisha kugira ngo barebe niba hari icyo bitanga.

Yavuze ko no kugera kuri ubu bumenyi mu by’ubuvuzi Abanyarwanda babikesha ubushakashatsi bakoraga no kuva na mbere, ubundi bakagenda babuhererekanya mu buryo bw’imiryango.

Ati “Mu byukuri ubumenyi bw’Abanyarwanda ba kera habagamo gukora ubushakashatsi nk’uko uyu munsi tubukora, kugira ngo uzamenye neza aho bakomoraga ubumenyi byabaga bigoye.

“Uko wagendaga ukurikira mu bisekuruza wasangaga haragiye habaho guhererekanya ubumenyi, umubyeyi akaburaga umwana we, umwana akazaburaga umwuzukuru, umwuzukuru akazaburaga umwuzukuruza gutyo gutyo kugeza n’uyu munsi.”

Munyaneza yongeyeho ko abantu bagendaga barushaho kugira ubumenyi mu by’ubuvuzi biturutse mu bunararibonye.

Ati “Abantu bagendaga barushaho kugira ubumenyi bwagutse mu buvuzi binyuze mu kugira ubunararibonye kuko bagendaga bigira ku bibazo bahura nabyo.”

Mu miti yakoreshwaga cyane mu Rwanda rwo hambere habaga higanjemo ikomoka mu bimera ndetse n’ibumba.

Mu bimera byakoreshwaga cyane harimo umuravumba wavuraga indwara zo muhogo nk’inkorora, igicunshu cyavuraga inzoka zo mu nda, inyabarasanya n’umushishiro byavuraga indwara z’uruhu. Inyabarasanya yakoreshwaga kandi mu komora ibikomere.

Uretse kugira ubumenyi mu kumenya imiti bashobora kwifashisha mu kuvura indwara, Munyaneza yavuze ko Abanyarwanda bari bafite n’ubumenyi mu bijyanye n’ingano y’umuti bashobora guha umuntu ndetse no kugira bimwe mu biribwa bamubuza gufata igihe ari kuri iyo miti.

Ati “Ku bijyanye n’ingano y’umuti nabyo byabaga bitandukanye kuko ingano y’umuti bahaga umwana siyo ngano y’umuti umuntu mukuru yafataga cyangwa se umuntu wabaga yararembejwe n’indwara cyane n’ufite ingufu ntabwo bafataga umuti ungana babaga bazi uburyo bagera nanone bashingiye ku bukare bw’umuti.”

“Niba baravangaga ibiti bitanu babaga bazi ingano ya buri giti muri urwo ruvange ikindi bagenderagaho baha umuntu umuti ni ukumenya niba uwo muntu nta yindi ndwara afite.”

Bari bazi kubyaza no kubaga

Munyaneza yavuze ko Abanyarwanda ba kera bari bafite ubumenyi mu bijyanye no kubaga nubwo bitari biteye imbere nk’uko bimeze uyu munsi. Ngo bashoboraga kubaga umuntu wakomerekeye ku rugamba bakamukuramo umwambi wamuvunikiyemo.

Ati “Ku bijyanye no kubaga ntabwo byari biteye imbere nk’uyu munsi ariko nk’iyo umuntu yajyaga ku rugamba bakamutera nk’icumu rikamuvunikiramo baramubagaga bakarimukuramo ariko bakaba bafite n’imiti bakoresha kugira ngo igikomere kitajyamo udukoko.”

Iki gikorwa cyo kubaga ngo kandi cyakorwaga ku mubyeyi wapfuye atwite. Ati “Nk’umubyeyi utwite iyo yitabaga Imana cyaraziraga kumushyigurana n’umwana mu nda icyo gihe nabwo hari abantu babaga bazi kubaga ku buryo bamukuragamo umwana.”

Ubundi buryo bw’ubuvuzi Abanyarwanda ngo bari bafitemo ubumenyi ni ibijyanye no kubyaza umugore ndetse no kumukurikirana kuva asamye kugeza abyaye.

Ati “Ababyaza ba gakondo babagaho kandi bafite ubumenyi buhambaye, ku buryo hari umubyeyi wasangaga uzwi ko afasha ababyeyi kubyara, igihe umubyeyi afashwe n’inda bakihutira kujya kumureba akaza agafasha uwo mubyeyi kubyara.”

“Iyo byagoranaga nabwo habaga hari imiti babaha bakabafasha ku buryo nk’urugero hari imiti yatumaga umubyeyi agira ibise, kandi umubyeyi agisama hari imiti bagendaga bamuha.”

Abavuzi ntibakoreraga ibihembo

Bitandukanye n’uyu munsi aho buri wese yishyurirwa akazi akora, ku bavuzi ba kera ho ngo siko byari bimeze ngo kuko kuvura byari ubuntu.

Munyaneza yavuze ko icyashobokaga ari uko uwavuriwe n’uwavuwe yashoboraga kwitura umuvuzi ariko ntibyitwe igihembo.

Ati “Ku bijyanye n’igihembo iyo usesenguye neza kandi ukabaza abantu bakuru usanga ubuvuzi gakondo bwarakorwaga ku buntu, gusa nyine hakaba icyo kintu cyo gutanga umufuragiro hakaba hari n’aho babikuririzaga cyane bakavuga ngo iyo udatanze umufuragiro ntukira.”

“Ubuvuzi gakondo ubundi bwabaga ari ugufasha umuntu, gukiza ubuzima ninaho havuye ririya jambo ryitwa ‘ubuntu’, ubuvuzi gakondo nyabwo nyakuri bwakoreraga ubuntu.”

Gusa ngo bitewe n’ubuhanga umuntu yabaga mu kuvura byashoboraga kumutunga no kumukiza biturutse ku mubare munini w’abamwivuzaho ari nako bamwitura.

Ati “Bitewe n’ubuhanga umuntu babaga bamuziho byabaga ngombwa ko agira abarwayi benshi bahora baza kumureba, byashobokaga ko kubera guhora ajya kureba imiti ajya kuvura abantu bigatuma rimwe na rimwe bimubuza umwanya wo gukora cyane.”

“Ugasanga umwanya munini agiye kuwushyira mu bijyanye no kuvura, icyo gihe wasangaga umuntu kubera ibyo bihembo bamuzanira aribyo bisigaye bimutunze rimwe na rimwe bikaba byanamuhindurira n’ubuzima bitewe n’abantu yagiye avura.”

Uretse ubu buvuzi kuva kera na kare Abanyarwanda bari bafite ubumenyi mu kuvura imvune ndetse bakamenya no kwita ku bafite uburwayi bwo mu mutwe. Uko iterambere rigenda riza ubuvuzi gakondo bugenda buta agaciro kuko abantu barushijeho kuyoboka ubwakizungu.

Inyabarasanya ni kimwe mu bimera Abanyarwanda bifashishaga mu komora igikomere
Igicunshu wari umuti ukomeye mu kuvura nzoka zo mu nda
Umuravumba wari umuti w'inkorora ku banyarwanda bo hambere ndetse n'ubu hari abakiwifashisha
Umwenya nawo ni ikimera cyifashishwa mu kuvura inkorora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .