00:00:00 IGIHE NETWORK KN KINYARWANDA EN ENGLISH FR FRANCAIS

Mu maso ya Habyarimana, Museveni yatabye mu nama Inkotanyi zari zaramugokeye

Yanditswe na Musangwa Arthur
Kuya 2 Ugushyingo 2021 saa 10:23
Yasuwe :
0 0

Umunyarwanda niwe waciye umugani agira ati ‘umutindi umuvura ijisho bwacya akarigukanurira’. Ibi nibyo umuntu yavuga ko byabaye ku Banyarwanda bari impunzi muri Uganda cyane cyane abari mu ngabo zafashije Yoweri Kaguta Museveni guhirika ubutegetsi bwa Milton Obote.

Amateka y’u Rwanda agaragaza ko hari umubare munini w’Abanyarwanda wagiye uhungira muri Uganda mu bihe bitandukanye barimo n’abagiyeyo mu 1959 ubwo Abatutsi bameneshwaga mu gihugu.

Abanyarwanda bari muri Uganda bagabanyije mu byiciro bitandukanye barimo abahahungiye mu 1959 bagiyeyo bahasanga abandi Banyarwanda bagiye basuhukirayo mu bihe binyuranye, bashaka ubutaka bwo guhinga n’akazi ko guca inshuro.

Aba nabo bagezeyo bahasanga abandi bafite inkomoko y’u Rwanda Rugari, rwagabanyijwe n’abakoloni n’inama ya Berlin yo mu 1884. Abo babaye abaturage ba Uganda ariko bakomoka mu Rwanda rwaguwe rukanubakwa n’Abakurambere b’intwari.

Aba Banyarwanda bagize uruhare rukomeye mu nzego z’iterambere z’iki gihugu, uzabasanga mu bworozi, ubucuruzi n’ahandi.

Mu myaka ya za 80 ubwo Yoweri Kaguta Museveni yafataga icyemezo cyo kujya mu ishyamba nyuma yo gutsindwa amatora, Abanyarwanda bari muri iki gihugu bari mu bantu bamufashije ku bwinshi ndetse mu 1986 baza kubohora Uganda.

Muri uru rugamba Abanyarwanda bagaragaje ukwitanga budasanzwe. Ibi bihamywa n’abaturage bo mu majyaruguru y’iki gihugu babakundiraga ubuhanga bwabo n’ikinyabupfura. Kugeza n’ubu abaturage bo muri aka gace iyo batebya bavuga ko inka zabo ziheruka umutekano Abanyarwanda bakiri mu gisirikare cya Uganda.

Uru rugamba rwo kubohoza Uganda rwaguyemo abasirikare bakomoka mu Rwanda batagira ingano abandi barukomerekeramo.

Uruhare rw’Abanyarwanda mu kubohoza Uganda no mu gusigasira umutekano wayo ntirwakabaye rushidikanywaho, cyane ko na Janet Museveni, umufasha wa Yoweri Kaguta Museveni aherutse kubigarukaho.

Janet Museveni yavuze uburyo Maj Gen Fred Rwigema mu 1980 yabatabaye ubwo we, umugabo n’umuhungu wabo, Muhoozi Kainerugaba bari bafashwe bunyago n’Ingabo za Uganda.

Icyo gihe Museveni yari umukandida w’ishyaka ‘Uganda Patriotic Movement’ wagombaga kwiyamamaza mu matora y’Umukuru w’Igihugu yabaye mu 1980 bikaza kurangira yegukanywe na Milton Obote.

Mu gitabo Janet Museveni yise “My Life’s Story” yavuze ko iki gihe abasirikare ba Uganda babafatiye kuri bariyeri yari mu gace ka Kireka muri Kampala.

Ngo Fred Rwigema yabonye Museveni n’umuryango we bakerewe kugera mu rugo, atangira kubashakisha mu nshuti ze ariko araheba.

Rwigema yakomeje guhangayika, ariko icyo gihe ngo hari umukozi wamubwiye ko yumvise abasirikare bakuru bo muri UNLA bigamba uburyo bafashe Museveni, ndetse ko bashobora kumwica bishimisha.

Rwigema akimara kumva aya makuru, yahise ajya kureba murumuna wa Museveni, Caleb Akandwanaho uzwi nka Salim Saleh maze batangiza operasiyo yo gushaka uyu muryango washoboraga kubonekamo Umukuru w’lgihugu mu gihe gito cyari imbere.

Iyi operasiyo yaje kugenda neza barababohoza. Uru ni urugero ruto muri byinshi Abanyarwanda bagiye bafashamo Uganda n’abayobozi bayo.

Nubwo na mbere byajyaga bibaho, nyuma yo kubohoza iki gihugu abasirikare bafite inkomoko mu Rwanda batangiye kwishishwa na bagenzi babo bakomoka muri Uganda ndetse batangira no kubanga. Ibi akenshi byaturukaga ku ishyari ryo kutumva uburyo umunyamahanga ashobora kukuyobora mu gihugu cyawe.

Mu bavuzwe muri ibi bikorwa byo gusuzugura abasirikare b’Abanyarwanda harimo Gen David Sejusa wahoze akuriye iperereza rya Uganda, Tadeo Kanyankole, Pecos Kutesa na Julius Chihanda. Aba basirikare ngo ntibigeze bemera uruhare rw’Abanyarwanda mu kubohora Uganda.

Gen Sejusa we ubwe ngo yari yaranze guterera isaluti Abanyarwanda ngo kuko ‘amategeko ya gisirikare abuza guterera isaluti umunyamahanga’.

Mu minsi yashize uyu mugabo aherutse gusabwa n’abakoresha Twitter kwiregura kuri ibi birego. Gen Sejusa yavuze ko ibi birego ari ibinyoma, yemeza ko ibyavuzwe iyo biza kuba ukuri batari gutsinda urugamba.

Museveni yabatabye mu nama

Abasesenguzi bahuriza ku kuba Museveni nk’umwe mu bari bazi ibibazo Abanyarwanda bari baifite muri Uganda kandi bakaba baramufashije kugera ku butegetsi, yari akwiye kubavuganira ndetse no kugira inama Leta ya Habyarimana ikabareka bagataha ku mahoro.

Gusa ibi si ko byagenze kuko ubwo yagiriraga uruzinduko mu Rwanda, nyuma y’igihe gito afashe ubutegetsi yabaye nk’ubataba mu nama imbere ya Habyarimana.

Iki gihe ubwo Museveni yasuraga u Rwanda hari hashize igihe hacicikana amakuru avuga ko Abanyarwanda bahungiye Uganda bashobora kuzatera igihugu.

Mu ijambo yavugiye muri Kaminuza Nkuru y’u Rwanda mu yahoze ari Butare, Museveni yagaragaje ko nta mpamvu n’imwe ihari yatuma Uganda ishyigikira impunzi z’Abanyarwanda ngo zitere u Rwanda.

Ati “Nta mpamvu ihari ya politike cyangwa indi iyo ariyo yose yatuma dushyigikira impunzi z’Abanyarwanda ngo zize gutera u Rwanda.”

Aho kugira ngo yumvishe Museveni ko ari ngombwa ko izi mpunzi zitaha, yavuze ko niba igihugu kitazishaka zizaguma muri Uganda.

Ati “ Abanyarwanda bari muri Uganda nk’impunzi, bamwe ni abimukira baje mu gihe kinini gishize, bamwe mu Banyarwanda ni abaturage ba Uganda, ku bw’ibyo abo baje nk’impunzi nibashaka kuguma muri Uganda bazahaguma nk’impunzi niba bashaka kugaruka mushobora kuza mukabahamagara bakagaruka. Niba mutabashaka bazaguma muri Uganda kugeza tubonye ikindi gisubizo, ku bw’ibyo nta kibazo na gito gihari.”

Uretse kutabashyigikira, Museveni yanashyize imbaraga mu gukoma mu nkokora umugambi wa FPR Inkotanyi wo kubohoza u Rwanda.

Raporo yitiriwe Muse ivuga ku ruhare rw’u Bufaransa muri Jenoside yakorewe Abatutsi, yerekana uko Museveni yitwayeho umwikomo ingabo za FPR Inkotanyi guhera mbere ya tariki ya 1 Ukwakira 1990 ubwo zagabaga igitero cyo kubohora u Rwanda, kugera mu gihe cy’urugamba ubwo yafatiraga intwaro zazo.

Mu Banyarwanda bari mu Gisirikare cya Uganda harimo Fred Rwigema wari mu buyobozi bukuru na Paul Kagame wari Umuyobozi wungirije ushinzwe Ubutasi. Bombi bakoreshaga ububasha bari bafite icyo gihe mu gushaka Abanyarwanda bashobora kubiyungaho mu mugambi bari baratangiye wo kubohora u Rwanda.

Byakorwaga mu ibanga rikomeye ku buryo bitamenywa n’inzego z’ubutasi za Uganda kuko iki gihugu cyari gitangiye kugira impungenge ku bikorwa by’Abanyarwanda bari ku butaka bwacyo. Icyo gihe umwanya wa Paul Kagame nk’umuyobozi mu rwego rw’ubutasi wari ingenzi cyane kuko wamubashishaga gutuma ibikorwa byose bikorwa mu ibanga rikomeye.

Igitero cyo kubohora igihugu cyagabwe mu gihe Kagame yari muri Leta Zunze Ubumwe za Amerika aho yari yaragiye mu masomo ariko mu mwanya wari ugenewe Fred Rwigema. Icyo gihe Rwigema yabwiye Museveni ko afite impamvu zitamwemerera kujyayo.

Mu mpera za Nzeri 1990, Charles Kayonga wari Umusirikare muto mu Ngabo za Uganda, yabonye amakuru avuye ku buyobozi bukuru bwa FPR amumenyesha ko adakwiye kugira ahantu kure ajya. Hashize iminsi James Kabarebe na we yaje kubona andi makuru amumenyesha ngo “Iri joro turagenda”.

Kugeza mu minsi ya nyuma, abantu bakomeye muri FPR nibo bonyine bari bazi iby’urugamba, abo barimo Fred Rwigema, Paul Kagame n’abandi basirikare bake. Nibo bonyine bari bazi ko tariki ya 1 Ukwakira, ingabo za FPR zizinjira mu Rwanda.

Imodoka zahagurutse i Kampala tariki ya 30 Nzeri mu masaha y’ijoro, nyuma y’amasaha atanu zigera i Mbarara. Kayonga mu buhamya bwe yavuze ko icyo gihe ubwo bageraga hafi y’umupaka, byari ibyishimo.

Yoweri Kaguta Museveni ntiyigeze agaragaza ubushake bwo kuvuganira impunzi z'Abanyarwanda zari muri Uganda cyangwa ngo ashyigikire urugamba rwo kubohoza u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .