00:00:00 IGIHE NETWORK KN KINYARWANDA EN ENGLISH FR FRANCAIS

Kuba nta bimenyetso bihamya abasirikare b’Abafaransa gufata abagore ku ngufu ntibivuze ko bitabaye- Duclert

Yanditswe na Kanamugire Emmanuel
Kuya 30 Kamena 2021 saa 05:19
Yasuwe :
0 0

Prof. Vincent Duclert wayoboye Komisiyo igizwe n’impuguke 13 mu mateka zacukumbuye uruhare rw’u Bufaransa muri Jenoside yakorewe Abatutsi, yasabye imiryango y’abarokotse Jenoside kugira uruhare mu gukusanya ubuhamya bushobora kwifashishwa mu kumenya ukuri ku basirikare b’Abafaransa baba barafashe abagore ku ngufu mu gihe cya Opération Turquoise.

Amakuru ku bikorwa by’abasirikare b’Abafaransa bafashe abagore ku ngufu yavuzwe mu Turere turimo Rusizi ahari Inkambi ya Nyarushishi. Ubwo bahageraga ku wa 23 Kamena 1994, muri Opération Turquoise ngo Abatutsi bakomeje kwicwa ndetse abo basirikare bafashe ku ngufu abagore n’abakobwa bavugaga ko baje kurinda.

Vincent Duclert yabigarutseho ubwo iyi Komisiyo yasuraga Ibuka n’indi miryango ireberera inyungu z’abarokotse Jenoside yakorewe Abatutsi kuri uyu wa 30 Kamena 2021.

Komisiyo Duclert yasuye Ibuka mu rwego rwo kuyishyikiriza kopi ya raporo ibumbiye hamwe akazi yakoze kagaragaje ukuri n’uruhare rukomeye rw’u Bufaransa mu bikorwa byagejeje kuri Jenoside yakorewe Abatutsi nk’uko Vincent yabisobanuye.

Yakomeje agira ati "Twaje no kubabwira ko ubushakashatsi buzakomeza. Raporo yacu ndetse na raporo Muse zigaragaza ko hari amateka ahuriweho yiyanditse, ko ukuri ari kumwe, rero guhurira hamwe bizakomeza.”

“Ni byo akazi kacu kararangiye ariko ubushakashatsi bugomba gukomeza na Perezida Macron yarabivuze ubwo aheruka i Kigali mu kwezi gushize. Ukuri kuzakomeza gukorwaho ubushakashatsi nubwo imirimo yacu irangiye kuko twagaragaje ibigomba gukorwa, dushyiraho urufatiro rukomeye twifashishije ububiko bwacu, iyi raporo ni kimwe mu byo ukuri gushingiyeho.”

Vincent Duclert yakomeje avuga ko bifuza gukorana na Ibuka n’indi miryango kugira ngo ubuhamya kuri Jenoside bwose bushobore gushyirwa hamwe kuko mu mateka buba ari ingenzi.

Uko gukusanywa kwabo ngo byafasha mu gihe hari abandi bashaka gukora ubushakashatsi cyangwa bugakoreshwa mu burezi bw’abakiri bato, mu mahugurwa y’abakozi n’abanyepolitiki cyangwa mu butabera nko ku byaha abasirikare b’Abafaransa bakekwaho mu gihe cya Opération Turquoise nubwo muri iyi raporo nta bimenyetso byagaragaye.

Ati “Twabonye ko hari ugufata abagore ku ngufu byategetswe n’abasirikare b’Abafaransa muri Opération Noroît ariko kuri Opération Turquoise nta gihamya twabonye. Ibyo ariko ntibivuze ko bitabaye, birashoboka ko hari abasirikare b’Abafaransa basambanyije abagore ku gahato.”

“Birasaba ko hashakwa ibimenyetso mu buryo buciye mu mucyo; bigomba gushakishwa mu bubiko tutabashije kugeraho no mu buhamya bw’abarokotse “bazi ibyabaye.”Niba hatari inyandiko ntibivuze ko ibyo bikorwa bitabaye. Bibaho ko inyandiko zishobora kuzimira.”

Vincent Duclert yavuze ko gusura imiryango y'abarokotse Jenoside byari birimo no kubashyikiriza kopi ya raporo Komisiyo ahagarariye

Perezida wa Ibuka, Nkuranga Egide, yavuze ko bashimye igikorwa Komisiyo Duclert yakoze, kigaragaza ko yahaye agaciro imiryango y’abarokotse Jenoside n’ubushake bwo gukomeza gukorana kw’impande zombi.

Ati “Akazi bakoze karagaragara ariko hari ibyo bifuza ko byazakomeza kandi bifuza ko tuzakorana. Bifuza ko hashyirwaho Ikigo Mpuzamahanga cy’Ubushakashatsi i Paris kandi ko twabafasha kugishyiraho, ibyo bazakora ni ubushakashatsi bushingiye kuri Jenoside kandi tuzakomeza guhura ngo tubiganireho.”

Nkuranga yavuze ko Raporo Duclert izafungura amarembo ku bandi batari muri iyi Komisiyo, abanyamakuru n’abanditsi bakoze ubushakashatsi, bajyaga bitinya kuvuga ko igihugu cyabo gifite ibyo cyakoze bibi.

Yongeyeho ko Ibuka yifuza ko ibikubiye muri Raporo Duclert bigomba gukoreshwa mu gufasha Abafaransa batari bazi uruhare rw’igihugu cyabo muri Jenoside yakorewe Abatutsi kurumenya no gutinyuka kujya babaza abayobozi babo impamvu bakoze ibi n’ibi.

Agaruka ku kamaro ka Raporo, Raymond Kévorkian, umwe mu bari bagize Komisiyo Duclert, yavuze ko yatumye abandi bantu batinyuka kuvuga no kugaragariza Sosiyete y’Abafaransa ukuri kw’ibyabaye mu Rwanda mu myaka ya 1994 na 1995.

Raymond yavuze ko irimo ibimenyetso bifatika abacamanza bashobora kwifashisha mu gukora amadosiye yo mu butabera, ikaba n’intwaro yo guhangana n’abakwiza icengezamatwara ry’uko habayeho Jenoside ebyiri.

Chantal Morelle we yavuze ko Komisiyo Duclert yakozwe mu bwisanzure bwuzuye atari ku bushake bwa Perezida ku buryo mu gihe yaba atakiri ku butegetsi yata agaciro.

Ati "Uruhare rwa Perezida Macron ni ugushyiraho Komisiyo, yari ifite ubwigenge busesuye. Nta nama yaduhaye, nta tegeko, nta mabwiriza. Ibyavuyemo iyo bitamushimisha ntiyagombaga kubikoresha, nta na rimwe twigeze tugendera ku bushake bwa Perezida cyangwa abajyanama be, ni akazi kakozwe mu bwigenge busesuye."

Abagize Komisiyo Duclert basuye Urwibutso rwa Jenoside rwa Nyanza mu Karere ka Kicukiro basobanurirwa amateka n’uburyo abarushyinguyemo bishwemo banasura Ubusitani bw’Urwibutso ruherereye muri aka gace.

Abagize Komisiyo Duclert basuye Urwibutso rwa Jenoside rwa Nyanza
Abagize Komisiyo Duclert ubwo basuraga Ubusitani bw'Urwibutso ruri i Nyanza ku Kicukiro
Ubwo basobanurirwaga uko Ubusitani bw'Urwibutso ruzafasha mu kumenyekanisha amateka kuri Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .