Inkomoko y’izina ‘Cyabakamyi’ iwabo w’inyambo

Yanditswe na Kanamugire Emmanuel
Kuya 9 Nzeri 2016 saa 01:19
Yasuwe : XX
0

Ni agace kahozemo aborozi benshi, hakaba hari n’urwuri rw’imyambo nyinshi. Uko iminsi yagiye ihita indi igataha, ubworozi bw’inka bwagiye bucyendera muri Cyabakamyi, ariko kandi ngo hari ibisigisigi dore ko haturuka umukamo w’amata usaga toni ku kwezi.

Uvuze Cyabakamyi nta gushidikanya umuntu ahita yumva isano hafitanye n’amata.Ni agace kahozemo aborozi benshi, bityo uhageze wese akakirizwa amata, ku buryo nta mubyeyi warwazaga bwaki, kandi n’ubu abagifite ubushobozi bwo korora bishimira ko bafite umukamo ushimishije.

Umurenge wa Cyabakamyi ni umwe Mirenge icyenda igize Akarere ka Nyanza, uherereye mu yahoze ari Segiteri Mucubira muri Komine Murama, Perefegitura ya Gitarama.

Abahatuye bavuga ko ari ‘iwabo w’inka n’abantu’ maze mu mvugo irimo gutebya bakagira bati “Cyabakamyi turi imfura, twakiriza abatugana amata atarimo amazi.”

Uko imyaka yagiye ihita indi igataha, amateka yagiye ahinduka nubwo bemeza ko batasigaye ku izina gusa.

Iyo ubajije inkomoko y’iyi nyito, igihurizwaho na benshi ni uko kari agace kabagamo inka nyinshi, kandi na bugingo n’ubu ngo hava umukamo w’amata usaga toni ku kwezi.

Munyazesa Aron w’imyaka 85, avuga ko yamenye ubwenge muri aka gace hari aborozi benshi.Yagize ati “Nta muntu wageraga Cyabakamyi ngo abure amata. Hari icyanya cy’inka z’inyambo n’izindi, hakaba aborozi benshi. Uwahageraga wese yakirizwaga amata. Na bugingo n’ubu kandi abenshi ni aborozi,nubwo bitakimeze nka mbere ariko ubona ko hari ibisigisigi by’ahantu habaye inka. Ikindi kandi uworoye inka imwe cyangwa ebyiri abona umukamo ushimishije.”

Nyirandimubanzi Stephanie w’imyaka 63, atuye aho bita Cyarera, avuga ko nta muturage wa Cyabakamyi warwazaga bwaki.

Yagize ati “Nta mubyeyi w’ino aha warwazaga bwaki, nta mwana waburaga amata kubera ko hari hatuye aborozi benshi.Ubukungu bwa Cyabakamyi ni amata kuva kera.”

Hari n’abandi bemeza ko inyito ‘Cyabakamyi’ yakomotse ku Mwami Ruganzu Bwimba wimye guhera 1312 kugeza mu mwaka wa 1345, watanze iri zina ubwo yageraga muri aka gace.

Abasubiramo aya mateka bavuga ko aturutse mu rugo rwe rwari i Gasabo hafi ya Muhazi(ubu ni mu Karere ka Gasabo mu Mujyi wa Kigali) yageze ahitwa Mucubira (mu murenge wa Cyabakamyi) asanga abantu barasinziriye ati “Aha ni i Mucubira”, ageze Cyabakamyi mu rucyerera asanga abashumba bakama inka ati “Aha ni Cyabakamyi.”

Nubwo ari agace bivugwa ko gaturukamo umusaruro w’amata utari muke, kari mu bwigunge ku bijyanye n’ibikorwaremezo. Ni wo murenge rukumbi wo mu Karere ka Nyanza utagira amashanyarazi. Imihanda ni ikibazo kuko usanga amateme yarangiritse, bicyo akaba nta modoka zitwara abagenzi ziboneka muri uyu Murenge. Ibi bigira ingaruka ku borozi baba bashaka kugeza umusaruro w’amata i Nyanza ahari ikaragiro ry’amata.

Agasantere k'ubucuruzi ka Cyabakamyi
Ibiro by'Umurenge wa Cyabakamyi
Munyaneza Aaron asobanura inkomoko y'izina Cyabakamyi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza