Kwamamaza

Imyaka itandatu irashize Perezida Kagame arahiriye manda ‘y’ibyiza byikubye karindwi’

Yanditswe kuya 6-09-2016 saa 14:10' na Cyprien Niyomwungeri


Ku munsi nk’uyu imbere y’imbaga y’abaturage baturutse imihanda yose bagahurira kuri Sitade Amahoro i Remera abandi bateze amatwi inyakiramajwi zabo, cyari igihe cyo ‘gutangira ikindi kivi cy’imyaka irindwi kizana ibindi byiza bishya byikubye ubugira karindwi’.

Kuwa 6 Nzeli 2010-Kuwa 6 Nzeli 2016: Imyaka ibaye itandatu Perezida Kagame arahiriye kongera kuyobora u Rwanda muri manda ya kabiri y’imyaka irindwi, nyuma y’uko kuwa 9 Kanama 2010 agiriwe icyizere n’Abanyarwanda agatorwa ku bwiganze bw’amajwi 93,08%.

Ni umuhango wari witabiriwe n’abakuru b’ibihugu barimo; Joseph Kabila (RDC), Blaise Compaoré (wayoboraga Burkina Faso), Ali Ben Bongo (wayoboraga Gabon), Francois Bozize (wayoboraga Centrafrique), Thomas Yayi Boni (wayoboraga Benin), Goodluck Jonathan (wayoboraga Nigeria), Ellen Johnson-Sirleaf (Liberia), Mwai Kibaki (wayoboraga Kenya), Faure Gnassingbe (Togo), Bingu wa Mutharika (wayoboraga Malawi), Rupiah Banda (wayoboraga Zambia), Idriss Déby Itno (Tchad), Pierre Nkurunziza (Burundi) na Meles Zenawi wari Minisitiri w’Intebe wa Ethiopia.

Ntiwari umunsi w’amateka ku Banyarwanda gusa kuko no kuri Perezida Joseph Kabila byari uko. Nibwo bwa mbere yari akandagije ikirenge cye ku butaka bw’u Rwanda kuva mu 2002 yaba Perezida. Ni mu gihe Kagame we yari amaze kugenderera igihugu cye ubugira kabiri.

Mu ijambo yagejeje ku Banyacyubahiro n’abaturage kuri uwo munsi, Umukuru w’Igihugu yavuze ko u Rwanda rufite ubunararibonye bw’uko Demokarasi igendana n’iterambere nyaryo, rigerwaho ari uko abaturage barikanguriwe kandi bakarigiramo uruhare rufatika.

Yagize ati“Kubera iki hashobora kubaho ikinyuranyo hagati y’iterambere na demokarasi? Ntidushobora kugira ibitekerezo byahindura imibereho y’abaturage mu buryo burambye tutabihuje n’iterambere mu miyoborere myiza. Ikindi kandi uburenganzira kuri politiki butajyanye no kugabanya ubukene no kongera imibereho myiza y’abaturage, ntacyo bumaze.”

Yagarutse ku buryo guharanira imibereho myiza y’abaturage, kugeza uburezi na serivisi z’ubuzima kuri bose, kwegereza ubuyobozi abaturage ndetse n’ishoramari mu ikoranabuhanga, birimo guha ijambo Abanyarwanda mu ruhando mpuzamahanga kandi bigateza imbere abaturage mu buryo batigeze babona mu myaka yahise.

Perezida Kagame arahirira kuyobora u Rwanda

Perezida Kagame yakomoje kuri raporo zinyuranye

Kuri icyo gicamunsi cy’amateka, Perezida Kagame yakomoje kuri raporo za bimwe mu bihugu byo mu Burengerazuba bw’Isi n’imiryango itegamiye kuri Leta, zishinja ibihugu bya Afurika kutubahiriza uburenganzira bwa muntu, ruswa, imiyoborere mibi, kudakurikiza demokarasi n’ibindi.

Yavuze ko asanga ikibazo kinini gituma Afurika isuzugurwa bene aka kageni atari demokarasi ahubwo ari ubukene no gutegera amaboko abandi ngo bayibesheho.

Yagize ati “Uku gutegera abandi amaboko nibyo bituma zimwe muri Guverinoma ndetse n’Imiryango itegamiye kuri Leta, batekereza ko bafite uburenganzira bwo kugena ibyo abayobozi ba Leta yigenga bakora.”
Yakomeje agira ati “Ni ibisanzwe kunenga u Rwanda ndetse birashoboka ko bavuga ibyo bashaka, ariko ntibazigera badutegeka icyerekezo dufata nk’igihugu kandi ntibazigera batubuza kugera ku cyo twiyemeje. Dukeneye gukomeza kwiyobora neza, kugeza ku baturage ibyo bifuza no kubateza imbere.”

Perezida Kagame yijeje abanyarwanda iterambere

Ashingiye ku byari bimaze kugerwaho, Perezida Kagame yasezeranyije Abanyarwanda ko manda ya kabiri ari icyiciro cy’iterambere n’imibereho myiza, kandi ibyagezweho mu bufatanye ari ikimenyetso cy’ibyiza biri imbere.

Zimwe mu ngeri z’iterambere Umukuru w’Igihugu yijeje abanyarwanda harimo; kuzakomeza kwihaza mu biribwa, gutanga uburezi na serivizi nziza z’ubuzima kuri bose, guteza imbere ubucuruzi n’ishoramari, kubaka ibikorwa remezo byinshi bisubiza ibyifuzo by’abaturage nko kugeza amazi meza n’amashanyarazi mu ngo, amashuri, ibigo nderabuzima n’inganda.

Harimo kandi gukomeza guharanira ko ubukungu bugera kuri bose n’abaturage bakagira uruhare mu bibakorerwa, guteza imbere umugore n’umukobwa no kugera ku rwego rwo kwizera ko abaturage bafite ubumenyi bwo guhangana ku isoko ry’umurimo.

Soma: 2010-2016: Ni iyihe ntambwe u Rwanda rumaze gutera?

Perezida Kabila nibwo bwa mbere yari ageze mu Rwanda kuva mu 2002 yajya ku butegetsi
Perezida Ali Bongo wa Gabon na Thomas Boni Yayi wa Benin bari muri uyu muhango
Mwai Kibaki wayoboraga Kenya
Perezida Pierre Nkurunziza w'u Burundi ari mu bari bitabiriye irahira rya Perezida Kagame
Pasiteri Rick Warren icyo gihe yasengeye u Rwanda
Uwari Mufti w'u Rwanda Habimana Saleh na Musenyeri Smaragde Mbonyintege uyobora Diyosezi ya Kabgayi
Perezida Kagame imbere y'abacamanza asinyira inshingano nshya yari amaze kurahirira
Perezida Kagame ashyikirizwa ibendera ry'igihugu na Aloysia Cyanzayire wari Perezida w'Urukiko rw'Ikirenga [ubu ni Umuvunyi Mukuru]
Nyuma yo gushyikirizwa ibendera ry'igihugu
Perezida Kagame asuhuzanya na mugenzi we Ali Bongo
Perezida Kagame asuhuza Faure Gnassingbe wa Togo
Uko Intara n'Umujyi wa Kigali byari byatoye Paul Kagame
Yatsinze amatora yanikiye abo bari bahanganye

Video: Perezida Kagame arahira


Kwamamaza
IZINDI NKURU WASOMA
Tariki 30 Nzeri
2016-09-30 06:00:00
Tariki ya 29 Nzeri
2016-09-29 07:00:00
Tariki ya 28 Nzeri
2016-09-28 06:00:00
Tariki 27 Nzeri
2016-09-27 07:00:40
Tariki ya 26 Nzeri
2016-09-26 06:30:00
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved