00:00:00 IGIHE NETWORK KN KINYARWANDA EN ENGLISH FR FRANCAIS

Imyaka 27 irashize: Uko Opération Turquoise yasojwe ntacyo ifashije abo yitiriwe

Yanditswe na Dufitumukiza Salathiel
Kuya 21 Kanama 2021 saa 10:33
Yasuwe :
0 0

Ku wa 22 Kamena 1994 Umuryango w’Abibumbye wafashe umwanzuro wemerera u Bufaransa kohereza ingabo mu Rwanda mu butumwa bwiswe “Operation Turquoise”. Icyagaragajwe nk’impamvu yabwo kwari ugutabara abahigwaga.

Nyamara ingabo zimaze kuhagera si byo zakoze ahubwo zarwanyije FPR Inkotanyi yashakaga guhagarika Jenoside ndetse zikingira ikibaba bamwe mu bari abayobozi muri guverinoma yayiteguye batorokera muri Zaïre. Ni ibyagaragajwe na Raporo zitandukanye ndetse bihamywa na bamwe mu basirikari bari bayirimo.

Mu kiganiro ikinyamakuru La Croix cyagiranye n’umwe mu boherejwe muri ubwo butumwa ari mu ngabo zirwanira mu kirere utaremeye gutangazwa amazina, yasobanuye ko baje nta mabwiriza ku miterere yabwo bahawe. Bakigiranye mu 2018.
Yavuze ko icyo baje bazi ari uko bari bagiye gutanga umusanzu ahari kubera imirwano gusa, ibindi bakabwirwa ko bizagenzurwa n’Ibiro bya Perezida w’u Bufaransa, Elysée.

Icyakora yemeje ko bari bazi ko bagiye kurwanya “abitwaga inyeshyamba’ nyuma naje kumva ko twashakaga kuvuga FPR.”

Nyuma yo kubona ibikorwa byazo bigiye kujya ku karubanda amahanga yose agasobanukirwa ko izo ngabo zirimo kwitambika iza FPR, ngo igitero cy’indege ebyiri zagombaga kurasa aho imirwano yaberaga ku wa 30 Kamena 1994 cyarasubitswe.

Hategerejwe itegeko rivuye kwa Perezida kuko ari we wagombaga kwemeza ko zirasa bidasubirwaho, baraheba.

Uwo mutangabuhamya yasobanuye ko guhagarika icyo gitero ari byo abanyepolitiki buririraho bagaragaza ko ubutumwa butari bugamije imirwano ahubwo kwari ukurengera abaturage bari mu kaga.

Ku wa 21 Kanama 1994 ni bwo ibikorwa by’izo ngabo zisaga 2,500 zari zitwaje indege 30 byahagaze.

Bivugwa ko igice cy’ahahoze Perefegitura za Cyangugu, Gikongoro na Kibuye zakoreraga hiciwe Abatutsi benshi zimaze kubatererana basumbirijwe n’Interahamwe.

Imyaka yarashize indi irataha, ubutumwa nyamukuru bwari buzanye izo ngabo bukomeza kugirwa ubwiru n’u Bufaransa ariko uko bukeye n’uko bwije bugenda bushyirwa ahagaragagara n’abashakashatsi ndetse na bamwe mu bari bafite aho bahuriye na zo.

Rtd. Lieutenant Colonel Guillaume Ancel na we wari mu Rwanda Jenoside yakorewe Abatutsi iba, yahamije ko intego nyamukuru ya “Opération Turquoise” itari ukurokora abicwaga ahubwo yari ugushyigikira Guverinoma yakoze Jenoside.

Yanagaragaje ko ingabo z’u Bufaransa zahaye intwaro Leta yakoze Jenoside, ikaza no kuzihungana mu nkambi zo muri Zaïre, aho yisuganyirizaga ishaka kugaruka gutera u Rwanda rwari rumaze gufatwa na FPR Inkotanyi.

Amaze kwiyemeza gushyira ukuri hanze, mu 2020 Ancel yasohoye inyandiko isaba ko Hubert Védrine wakoraga muri Elysée mu 1994 yimwa ijambo mu ruhando mpuzamanga, mu gihe ataremera cyangwa ngo asobanure uruhare rw’u Bufaransa muri Jenoside yakorewe Abatutsi.

Hari aho yageze yandika agira ati “Kugeza mu 1994 twafashije abateguraga Jenoside, twarabateguye, tubaha intwaro, tubaha inama ndetse hamwe na hamwe tukaberekera mbere y’uko biroha muri ibyo bikorwa rurangiza byakorewe mu maso yacu.”

Mu 2007 The Guardian yanditse ko Gen. Jean Claude Lafourcade wari uyoboye ingabo zari muri “Opération Turquoise” yiyemereye ko bashakaga kurengera guverinoma yariho ngo ikomeze iteshe umutwe FPR bityo ntibashe gutangaza intsinzi cyangwa ngo ifatwe nk’iyoboye igihugu.

Yasobanuye ko ubwo butumwa bwari n’amahirwe ku Bufaransa yo gufasha abari abayobozi muri guverinoma yateguye ikanashyira mu bikorwa Jenoside bagatoroka, mu gihe abandi bagombaga kubuhungiramo bakwepa ubutabera.

Bisesero izwi cyane mu mateka ya Jenoside yakorewe Abatutsi iherereye aho izo ngabo zabaga. Ubuhamya bw’abaharokokeye na bwo bwanyomoje iby’uko Abafaransa bari baje kubarokora.

Bavuga ko batakambiye izo ngabo ngo zibakure mu maboko y’Interahamwe n’abasirikare bari bamaze kubicamo abarenga ibihumbi 40, ziterera agati mu ryinyo kugeza ubwo abandi barenga 4000 bishwe mu minsi itatu gusa.

Abasirikare b'Abafaransa bagize uruhare mu gutoza Interahamwe
Rtd. Lieutenant Colonel Guillaume Ancel ni umwe mu biyemeje gushyira umucyo ku by'ingabo z'Abafaransa zakoreye mu Rwanda mu 1994

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .