Icyo Raporo Duclert ivuga ku ihanurwa ry’indege ya Habyarimana wari umaze iminsi abikwa n’abasirikare be

Yanditswe na Musangwa Arthur
Kuya 6 Mata 2021 saa 08:52
Yasuwe :
0 0

Imyaka 27 irashize indege yari itwaye Habyarimana Juvénal ihanuwe mu buryo na n’ubu bukiri amayobera ndetse butavugwaho rumwe, nubwo ibimenyetso simusiga bigaragaza ko yahanuriwe mu cyerecyezo cya Kanombe ahari hari ikigo cya gisirikare cyari kirimo abasirikare b’abaparakomando.

Agace Dassault Falcon 50 ya Habyarimana yahanuriwemo ku mugoroba wo ku wa 6 Mata 1994, kari karinzwe bikomeye kuko kabarizwagamo umutwe witwaga “Garde Présidentielle” warindaga umukuru w’igihugu, hari kandi n’ingabo ibihumbi za FAR zari zikambitse mu kigo cya gisirikare. Abasirikare b’Abafaransa n’Ababiligi na bo bari bahafite uburinzi bukomeye.

Ubushakashatsi butandukanye bwagiye buvuga ibitandukanye ku ihanurwa ry’iyo ndege yari itwaye Juvénal Habyarimana na mugenzi we w’u Burundi, Cyprien Ntaryamira n’abandi bagenzi icyenda bavuye mu bikorwa by’Amasezerano y’Amahoro ya Arusha, gusa ubwinshi buhuriza ku kuba yarahanuriwe mu bice bya Kanombe byarindwaga n’ingabo ze.

Uretse Habyarimana na Cyprien Ntaryamira iyi ndege yaguyemo Jacky Héraud wari umupilote wayo na Jean-Pierre Minaberry wari umwungirije muri aka kazi.

Umunsi Habyarimana ahanurwa muri iyi ndege yari ari kumwe kandi na Jean-Michel Perrine wayikoraga kandi akanayikurikiranira hafi ngo itagira ikibazo, Gen Déogratias Nsabimana wari Umugaba Mukuru w’Ingabo z’u Rwanda, Major Thaddée Bagaragaza wari ushinzwe kumurinda akaba yari anungirije umukuru w’ingabo zishinzwe kurinda Perezida (Garde Presidentielle).

Abandi baguye muri iyi ndege barimo Colonel Elie Sagatwa wari umunyamabanga wihariye wa Habyarimana akaba na muramu we, Ambasaderi Juvénal Renzaho wari Umujyanama wa Habyarimana mu bijyanye na politiki, Dr Emmanuel Akingeneye wari muganga wihariye wa Habyarimana, Bernard Ciza wari Minisitiri w’Itumanaho mu Burundi na mugenzi we Cyriaque Simbizi wari Minisitiri w’Igenamigambi w’u Burundi.

Amakuru yashyizwe hanze n’urubuga Aviation24 agaragaza ko indege ya Habyarimana yarashwe ubwo yiteguraga kugwa ku Kibuga Mpuzamahanga cya Kigali. Uru rubuga rugaragaza ko iyi ndege yahanuwe iri muri metero zisaga 100 z’ubutumburuke irashwe ibisasu bibiri byo mu bwoko bwa SAM16, aho ngo kimwe cyafashe ibaba ikindi kigafata umurizo, iyi ndege igahita ihanuka ikikubita hasi.

Yapfuye bimaze iminsi binugwanugwa, na we abyiyumvamo

Raporo ya “Komisiyo Duclert” u Bufaransa buherutse gushyira hanze ku ruhare rwabwo mu mateka yagejeje kuri Jenoside yakorewe Abatutsi, igaragaza ko iyi ndege Perezida Habyarimana yari yarayihawe n’u Bufaransa nk’impano.

Inama y’Abaminisitiri yateranye ku wa 15 Werurwe 1990 ngo ni yo yafatiwemo umwanzuro ntakuka wo kumuha iyi ndege ngo ajye ayikoresha mu ngendo z’akazi.

Ubwo Perezida Habyarimana yahabwaga iyi ndege, yari amaze iminsi agaragariza u Bufaransa ko afite impungenge ku bijyanye n’umutekano w’ikibuga cy’indege cy’i Kigali ku buryo ngo yari yaranasabye ko Abafaransa bamusanira radar yari yarapfuye cyangwa bakaba bamuha indi nshyashya.

Raporo yakozwe na Komisiyo yari iyobowe na Dr Mutsinzi Jean ku ihanurwa ry’indege ya Habyarimana, igaragaza ko yapfuye yari amaze igihe abyiyumvamo ndetse akaba yari yaragiye asubika ingendo zitandukanye nk’urwo gushyingura Melchior Ndadaye wari Perezida w’u Burundi na Félix Houphouët-Boigny wa Côte d’Ivoire.

Iyi raporo igaragaza ko Johann Scheers wari inshuti ya Habyarimana akaba n’Umujyanama we mu by’Amategeko, yahishuye ko uyu mugabo yari yaramugaragarije impungenge z’uko ashobora kwicwa.

Johann Scheers yavuze ko muri Gashyantare 1994 Habyarimana yari yaramubwiye ko hari ibyago byinshi byo kwicwa mu gihe yaba agiriye urugendo hanze y’igihugu, iki gihe ngo yamubwiye ko u Bubiligi butakimuba hafi kuva Umwami Baudouin yapfa.

Mu rwego rwo kuganira kuri iki kibazo, ngo Johann Scheers yamubwiye ko bazahura mu muhango wo gushyingura Félix Houphouët-Boigny bakanabiganiraho bari kumwe n’Igikomangoma cy’u Bubiligi, Phillippe.

Mu buryo butunguranye ku wa 7 Gashyantare, Habyarimana ngo yaje kwanga ubu butumire kubera impamvu z’umutekano.

Nyuma yo kumva aya makuru Johann Scheers yabwiye Habyarimana ati “Bwana Perezida, nizere ko ufite impamvu zumvikana kubera ko nta bundi buryo mfite nabisobanura.”

Habyarimana ngo mu kumusubiza yavuze ko ahangayikishijwe n’umutekano we. Ati “Mfite ubwoba bw’uko hazagira ikimbaho nsohotse mu gihugu.”

Johann Scheers yavuze ko Habyarimana yari afite impungenge z’uko indege ye yahanurwa mu gihe yaba agiriye urugendo hanze y’igihugu.

Iyi ndege Habyarimana yari yarayihawe na Leta y'u Bufaransa

Abamurindaga bari babizi ndetse n’abasirikare bamwe bamubika

Raporo ya Duclert igaragaza ko uretse ubwoba Habyarimana yari afite ku giti cye, n’abamurindaga bari bafite amakuru y’uko ashobora kwicwa cyane ko no mu gisirikare byari bimaze iminsi bihwihwiswa ndetse bamwe ntibatinye no kumubika.

Twagirayezu Innocent wari mu itsinda rishinzwe umutekano wa Habyarimana yabwiye Komisiyo Mutsinzi ko urupfu rw’uyu mugabo rutamutunguye.

Ati “Urupfu rwa Habyarimana ntabwo rwaje nk’ikintu gitunguranye kuri twe twari dushinzwe kumurinda. Ndibuka ko mu gihe cy’urupfu rwa mugenzi we wa Côte d’Ivoire, Houphoüet Boigny, Perezida Habyarimana yari yateguye kwitabira imihango yo kumushyingura.”

“Ku munota wa nyuma, yakiriye amakuru avuye mu butasi amubwira ko indege ye iri mu byago byo guhanurwa cyangwa agahura n’ikindi kibazo mu gihe yaramuka agiyeyo. Yanze kujyayo yohereza umuhagarariye.”

Amakuru y’uko Habyarimana yanze kujya gushyingura mugenzi we wa Côte d’Ivoire Twagirayezu ayahuriyeho na Senkeri Salathiel na we wari mu bashinzwe umutekano ndetse akaba n’umwe mu bari bagize itsinda ryamurinze bwa nyuma i Dar es Salaam.

Senkeri yagize ati “Nk’umwe mu bakoraga mu itsinda rya hafi rishinzwe umutekano wa Perezida wa Repubulika, nabwiwe n’abo mu butasi ko indege ya Perezida iri mu byago byo guhanurwa ava muri Côte d’Ivoire, byari mbere ho amezi atatu ngo ku wa 6 Mata 1994 bigere.”

Iby’amakuru ku rupfu rwa Habyarimana kandi byatanzwemo ubuhamya na Major Bernard Ntuyahaga wabwiye ICTR ko yanze kujya gushyingura Ndadaye atinya kwicwa.

Ati “Yanze kujya mu muhango wo gushyingura Melchior Ndadaye kubera ko yashoboraga kwicirwa muri urwo rugendo.”

Uyu mugambi wo kwica Habyarimana ngo wacurwaga n’abasirikare b’abahezanguni batakozwaga ibyo gusangira ubutegetsi na RPA ndetse bakaba bavanga n’igisirikare.

Furayide Jean Paul wari ufite ipeti rya Sergeant mu gisirikare cya FAR, yavuze ko aho yabaga mu Kigo cya Gisirikare cya Kigali yiyumviye umwe muri aba basirikare b’abahezanguni abika Habyarimana.

Ati “Mbere gato y’ihanurwa ry’indege yari irimo Habyarimana, abasirikare baturukaga Gisenyi na Ruhengeri bari bamaze gufata umuco wo kuganira mu kigo bavuga ko Perezida azapfa vuba ‘ahanuwe mu ndege cyangwa akamanikwa nk’imbwa’.”

“Sergeant Major Ruhamanya twabanaga mu cyumba akaba n’umwe mu bagize itsinda rishinzwe Ubutasi, yari umwe mu basirikare bakundaga kutubwira iyo twabaga turi mu buriri uburyo Perezida azapfa. Yagaragaraga nk’uzi neza ibyo ari kuvuga, kandi ntibyasaga n’amashyengo.”

Furayide Jean Paul yavuze ko mbere y’iminsi ibiri n’itatu ngo indege ya Habyarimana igwe Sergeant Harerimana n’uwo bahimbaga ‘Kwetu’ bari baratangiye kumubika.

Mbere y’uko Habyarimana apfa ngo yari amaze iminsi yarijunditswe n’abasirikare bashakaga ishyirwa mu bikorwa ry’amasezerano ya Arusha bamushinjaga kubogamira mu ruhande rw’Abatutsi na RPA. Muri aba basirikare bari barijunditse Habyarimana harimo na Colonel Bagosora Théoneste.

Mu buhamya bwatanzwe na General Laurent Munyakazi ubwo yagezwaga imbere y’Inkiko Gacaca yavuze ko ku wa 4 Mata 1994 Colonel Bagosora ubwo yari muri Hotel Merdien, yatangaje ko atemera amasezerano ya Arusha ndetse ko adashyigikiye urugendo rwa Habyarimana rwo kujya Dar es Salaam.

Iki gihe ngo Bagosora yavuze ko najyayo indege ye izaraswa kandi Abatutsi bakicwa. Umugambi wo kwikiza Habyarimana kandi wagaragajwe na Colonel Anatole Nsengiyumva wari ushinzwe Iperereza mu Gisirikare.

Mu rwandiko uyu mugabo yandikiye Umugaba Mukuru w’Ingabo z’u Rwanda ku wa 27 Nyakanga 1992, yagaragaje ko adashyigikiye amasezerano ya Arusha ndetse n’ibyo kuvanga ingabo.

Colonel Anatole Nsengiyumva yavuze ko abasirikare batengushywe cyane n’Uwari Minisitiri w’Intebe, Dismas Nsengiyaremye uw’Ububanyi n’Amahanga, Boniface Ngulinzira ndetse anasaba ko Perezida Habyarimana yakwegura niba yarananiwe gukomeza gushyigikira umugambi wo gutsemba Abatutsi.

Ibi ni bimwe mu bisigazwa by'indege yatwaraga Habyarimana
Indege yari itwaye Perezida Habyarimana na mugenzi we w'u Burundi, Ntaryamira Cyprien, yarashwe ivuye muri Tanzania
Ibisigazwa by'iyo ndege byagaragaye hafi y'aho yarasiwe i Kanombe
Indege yarimo abantu 12 yarashwe n'igisasu cya missile cyo mu bwoko bwa SAM16, yaguye mu busitani bwo mu rugo rwa Perezida Habyarimana muri metero 500 uvuye muri Camp Kanombe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .