Zuckerberg arasobanurira Inteko iby’amakuru y’abakoresha Facebook yibwe

Yanditswe na Mukaneza M.Ange
Kuya 10 Mata 2018 saa 09:41
Yasuwe :
0 0

Mark Zuckerberg washinze ndetse akaba Umuyobozi Mukuru wa Facebook agiye kwitaba Inteko Ishinga Amategeko ya Leta Zunze Ubumwe za Amerika aho ari busobanure ibijyanye n’amakuru y’abakoresha uru rubuga yibwe ndetse agakoreshwa mu buryo bunyuranyije n’amategeko.

Mu kwezi gushize nibwo byamenyekanye ko Ikigo Cambridge Analytica cyakusanyije amakuru y’abakoresha Facebook bagera kuri miliyoni 50 biganjemo Abanyamerika, kikayakoresha mu bikorwa byo kwamamaza Donald Trump waje gutorerwa kuba perezida.

Nk’uko bigaragara mu ijambo ryashyizwe hanze na Komisiyo y’ingufu n’ubucuruzi, Zuckerberg arateganya kwemerera Inteko ko ibyabaye byose ari amakosa ye, kandi bakomeje gufata ingamba ngo bitazasubira.

Muri iri jambo ryateguwe mbere y’igihe akaba ari naryo aza gusoma, Zuckerberg uherutse gusaba imbabazi abakoresha Facebook yavuze ko bakosa ikosa rikomeye ryo kudafata ingamba zikarishye zikumira abakoresha amakuru y’abandi mu buryo bunyuranyije n’amategeko.

Ati “Ibi birajyana n’amakuru y’ibinyoma, kwivanga kw’amahanga mu matora, imvugo zuzuye urwango, ndetse n’abakora porogaramu n’ibirebana n’uburenganzira ku makuru ku buzima bwite.”

Yakomeje agira ati “ Ntabwo twigeze tureba inshingano zacu mu buryo bwagutse, kandi iryo ryari ikosa riremereye. Ryari ikosa ryanjye, ndetse ndasaba imbabazi. Natangije Facebook, ndayiyobora, ndetse ibibera hano byose biri mu nshingano zanjye.”

Kuri uyu wa Kabiri nibwo Zuckerberg aza kwitaba Komisiyo ya Sena ishinzwe ubutabera n’ishinzwe ubucuruzi, ku wa Gatatu akazitaba Komisiyo y’abadepite ishinzwe ingufu n’ubucuruzi.

CNN dukesha iyi nkuru ivuga ko nyuma yo gusaba imbabazi, Zuckerberg agomba kwereka izi komisiyo ingamba yafashe ngo arinde amakuru y’abakoresha Facebook.

Muri izi ngamba harimo no kujya hakorwa iperereza kuri porogaramu (apps) ziri kuri uru rubuga zishobora gukusanya amakuru, bityo abakoresha Facebook boroherwe no kuzimenya.

Uretse kuvuga ku bibwe amakuru na Cambrigde Analytica aho Facebook igaragaza ko bagera kuri miliyoni 87, Zuckerberg aranasobanura ibijyanye no kuba u Burusiya bwarivanze mu matora ya Amerika yo mu 2016, no kuba baragenze biguru ntege mu kuvumbura iki kibazo.

Facebook igaragaza ko kugeza ubu habarurwa abagera kuri miliyoni 126 bakoresha uru rubuga n’abari kuri Instagram miliyoni 20 bagiye bahabwa amakuru n’ikigo gifitanye isano na Leta y’u Burusiya.

Mark Zuckerberg washinze Facebook yiteguye kwemerera Inteko Ishinga Amategeko ko yagize uburangare mu kurinda amakuru y'abakoresha uru rubuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza