Zika ntikiri icyorezo gihangayikishije isi

Yanditswe na Kanamugire Emmanuel
Kuya 20 Ugushyingo 2016 saa 08:26
Yasuwe : XX
0

Ishami ry’Umuryango w’Abibumbye ryita ku buzima, OMS ryatangaje ko Virus ya Zika itakiri icyorezo gihangayikishije isi cyane muri iki gihe.

Komisiyo ya OMS ishinzwe ubutabazi ku wa Gatanu yagaragaje ko nubwo virus ya Zika itakiri ikibazo gikomeye, urugamba rwo gushaka igisubizo kirambye rugikomeje.

Muri Gashyantare 2016 nibwo OMS yatangajeko Virus ya Zika ari icyorezo gihangayikishije isi yose ku buryo hari n’impungenge ko abazitabira imikino Olympique bazayandura.

Iyi komisiyo yakomeje ivuga ko muri Brazil ibihe bidasanzwe byo guhashya virus ya Zika bizakomeza dore ko ari na cyo gihugu yibasiye cyane.

Benshi mu bana 2000 bavukanye ikibazo cy’umutwe muto (microcephaly) kubera ingaruka za Virus ya Zika bakomoka muri Brazil.

Ikigo gishinzwe gukumira indwara z’ibyorezo muri Amerika kandi cyongeye gusaba abagore batwite kwirinda kujya mu duce tugaragaramo virus ya Zika bitewe n’ingaruka zigera ku mwana ukiri mu nda.

Virusi ya Zika isakazwa n’imibu yo mu bwoko bwa Aedesaegypti, ifite inkomoko mu ishyamba rya Zika muri Uganda, ikaba yarabonetse bwa mbere mu maraso y’inkende yabaga muri iryo shyamba mu 1947.

Umuntu ashobora no kuyandura kandi mu gihe akoze imibonano n’umuntu uyifite batabanje kwikingira.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza