00:00:00 IGIHE NETWORK KN KINYARWANDA EN ENGLISH FR FRANCAIS

WhatsApp yongereye itariki ntarengwa yo gusiba konti zitazemeza amabwiriza mashya yayo

Yanditswe na Umwali Zhuri
Kuya 11 Gicurasi 2021 saa 03:26
Yasuwe :
0 0

Urubuga nkoranyambaga rya WhatsApp, rwatangaje ko rutazasiba konti z’abantu batazemeza amabwiriza mashya ruherutse gushyiraho, gusa ruvuga ko ba nyiri izo konti bazakomeza gusabwa kwemeza ayo mabwiriza, bakomeza kwinangira bakazasibirwa konti zabo.

WhatsApp yari yaratangaje ko ku itariki ya 15 Gicurasi, umuntu utazaba yaremeje amabwiriza mashya yari yarashyizeho konti ye itazakomeza gukora.

Kuri iyi nshuro, itangazo ry’uru rubuga nkoranyambaga rukoreshwa n’abarenga miliyari imwe ku Isi, ryavuze ko nta konti y’umuntu izasibwa naramuka atemeje amabwiriza yayo bitarenze kuwa 15 Gicurasi, gusa ko azakomeza kwibutswa binyuze mu butumwa bugufi azajya yohererezwa.

Mu gihe akomeje kwinangira, umuntu azakomeza kwibutswa inshuro nyinshi, mu cyo WhatsApp yise ‘Kwibutswa guhoraho’, uko akomeza kwinangira atangire kubura uburenganzira bumwe na bumwe, burimo nko kureba urutonde rw’abantu afite kuri WhatsApp ye.

Ibi bizakomeza gutyo, bigere aho umuntu afungirwa konti ye burundu. Nyuma y’iminsi 120 atemeye amabwiriza mashya ya WhatsApp, konti ye izasibwa burundu. Itandukaniro ni uko ibi bikorwa bizamara igihe kinini, ariko n’ubundi utazemeza amabwiriza mashya ya WhatsApp, azasibirwa konti ye.

Aya mabwiriza mashya ya WhatsApp avuga ko uru rubuga ruzajya rusangiza amwe mu makuru y’abarukoresha, n’urubuga rwa Facebook, byose bihuriye mu kigo cya Facebook cya Mark Zuckerburg.

Konti zizagirwaho ingaruka n’iki cyemezo, ni konti za WhatsApp za business. Amakuru azajya asangizwa arimo numero za telefoni z’umuntu utunze WhatsApp yagizweho ingaruka, ibirango bya telefoni ye ndetse n’ibindi. Icyakora ibiganiro bitandukanye hagati y’abantu ndetse n’aho baherereye, byose ntibizajya bitangarizwa Facebook.

WhatsApp yongereye igihe cyo gufunga konti z'abantu batazemeza amabwiriza yayo mashya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .