Washington DC mu nzira yo guhinduka Leta ya 51 mu zigize Amerika

Yanditswe na Muhonzire Sylvine
Kuya 21 Mata 2021 saa 11:24
Yasuwe :
0 0

District of Columbia, izwi cyane nka Washington DC iri mu nzira yo guhinduka leta ya 51 mu zigize Leta Zunze Ubumwe za Amerika nyuma y’imyaka 62 iki gihugu kitarongera gushyiraho indi leta nshya, aho iziheruka komekwa kuri Amerika ari Hawaii na Alaska mu 1959 zatumye iki gihugu kigira leta 50.

Mu itangazo ryasohotse ejo kuwa Kabiri tariki 20 Mata 2021, rivuye muri White House, ryagaragaje ko ubuyobozi bwa Joe Biden bushyigikiye cyane igitekerezo cyatanzwe na Washington DC cyo guhindura uyu umujyi utuwe n’abantu barenga 700.000 imwe muri leta zigize Amerika.

Iryo tangazo ryagiraga riti “Mu gihe kirekire gishize, abantu barenga 700.000 batuye Washington DC ntibigeze bemererwa kugira ubahagararira bya nyabo muri Kongere ya Amerika. Iyi misoro idafite uyihagarariye no kwangirwa ubwigenge busesuye, ni nk’igitutsi ku ndangagaciro za demokarasi igihugu cyacu cyashyizeho.”

District of Columbia nimara kwemererwa kuba leta ya 51 ya Amerika, izahabwa izina rya Douglas Commonwealth mu rwego rwo guha icyubahiro umwe mu birabura wari umucakara, Frederick Douglass, waharaniye uburenganzira bwa muntu n’ihagarikwa ry’ubucakara muri Amerika.

Itangazo ryakomeje rigira riti “Kugira Douglass Commonwealth leta ya 51 bizatuma igihugu cyacu gikomera kurushaho. Washington DC ifite ubukungu buhamye, ikungahaye ku muco ndetse ifite n’abaturage b’abanyamerika baturuka mu byiciro byose by’ubuzima, bafite uburenganzira bwo kugira uruhare rusesuye muri demokarasi yacu.”

Ikinyamakuru The Independent kivuga ko nubwo leta ya Biden ishyigikiye ko Washington DC iba leta ya Amerika bitavuze ko izahita igirwa yo, ahubwo nk’uko andi mategeko yose atorwa bizabanza guca muri Sena ya Amerika igiziwe n’abasenateri 100 bahagarariye leta 50 z’iki gihugu.

Kugira ngo ubu busabe bwemezwe bisaba ko buzagira amajwi 60, bivuze ko aba-démocrate bose babyemeye, ndetse n’aba- républicain byibura 10 bakaryemeza Washington DC ifite ubuso bwa kirometero kare 117, (Kigali iyiruta inshuro 6), izahita iba leta ya 51 ya Amerika.

Washington DC ishobora kugirwa Leta ya 51 mu zigize Amerika
Washington DC ifatwa nk'Umurwa Mukuru wa Leta Zunze Ubumwe za Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .