Vatican yijeje Trump amasengesho

Yanditswe na Uwishyaka Jean Louis
Kuya 10 Ugushyingo 2016 saa 12:29
Yasuwe :
0 0

Donald Trump wari uhagarariye ishyaka ry’Aba-Républicains mu matora y’Umukuru w’Igihugu, niwe watangajwe nk’uwegukanye intsinzi aba Perezida wa 45 wa Leta Zunze Ubumwe za Amerika. Kuva byamenyekana abanyacyubahiro batandukanye bamwifurije ishya n’ihirwe mu mirimo ye mishya, harimo n’abahagarariye Leta ya Vatican.

Reuters itangaza ko Umunyamabanga wa Leta ya Vatican, Cardinal Pietro Parolin, yavugiye kuri radio Vatican ko bamwifuriza ibyiza mu mirimo mishya ndetse avuga ko bazamusabira ku Mana ikamuha ubushishozi.

Ati “Turifuriza Perezida mushya ibyiza kugira ngo azagire guverinoma nziza. Tumwijeje kumusengera ku Mana kugira ngo imuyobore, inamufashe kuzuza inshingano zo kuyobora igihugu, ariko na none no mu mibereho myiza n’amahoro ku Isi muri rusange. Ntekereza ko uyu munsi buri wese akeneye gukora kugira ngo ahindure uko Isi imeze ubu, dore ko yuzuyemo intimba n’amakimbirane akomeye.”

Uretse Leta ya Vatican, Papa Francis nawe ubwe abinyujije ku rukuta rwe rwa Twitter, nyuma y’intsinzi ya Trump yasabye ko habaho ibiganiro, kwemera ibyavuye mu matora ndetse no kuzuzanya bya kivandimwe.

Mu ntangiriro z’uyu mwaka, Uyu mushumba wa Kiliziya Gatolika ku Isi, yari yatangaje ko Donald Trump atari ’umukirisitu’ bitewe n’igitekerezo afite cyo kubaka urukuta rutandukanya igihugu cye na Mexique.

Ubwo yasozaga uruzinduko yagiriraga muri Mexique muri Gashyantare uyu mwaka, Papa Francis yagize ati “Umuntu utekereza gusa kubaka inkuta aho kubaka ibiraro ntabwo ari umukirisitu.”

Nyuma gato Trump nawe yasubije Papa Francis ubwo yiyamamarizaga muri Leta ya Carolina y’Amajyepfo, avuga ko imyitwarire ya Papa ’ibabaje cyane’.

Yagize ati "Nk’umuyobozi w’idini, kwibaza ku myemerere y’umuntu birababaje cyane. Nta muyobozi, by’umwihariko uw’idini ufite uburenganzira bwo kwibaza cyane ku idini cyangwa imyemerere y’undi muntu."

Uretse ibyo kubaka urukuta, Trump yanavuze ko natorwa azirukana abirabura muri icyo gihugu, ibintu byafashwe nk’irondaruhu, gusa nyuma yo gutorwa yahise atangaza ko ari Perezida w’abanyamerika bose.

Cardinal Pietro Parolin avuga ko Leta ya Vatican yifurije ibyiza Trump

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza