Uwahoze ayobora Rio de Janeiro yemeye ko yatanze ruswa ngo yakire imikino Olimpiki

Yanditswe na IGIHE
Kuya 5 Nyakanga 2019 saa 04:20
Yasuwe :
0 0

Uwahoze ari Guverineri wa Rio de Janeiro muri Brazil, Sérgio Cabral yavuze ko yishyuye miliyoni $2, za ruswa kugira ngo uyu mujyi wakire imikino Olimpiki ya 2016.

Cabral yabwiye umucamanza ko aya mafaranga yishyuwe kugira ngo bizere ko uyu mujyi uri butorerwe kwakira iyi mikino, mu nama yari bufate iki cyemezo mu 2009.

Yavuze ko amafaranga yahawe Lamine Diack wari Perezida w’Ishyirahamwe ry’imikino ngororamubiri ku Isi (IAAF), akaba yarakoreshejwe mu kugura amajwi icyenda.

Perezida wa Komite Olimpiki akaba n’umwe mu bakurikiranaga iyi dosiye, Arthur Nuzman, niwe wamumenyesheje Diack amusaba ko bishyura ziriya miliyoni mbere y’amatora ya 2009 yatumye uyu mujyi uhigika uwa Madrid, Chicago na Tokyo.

Cabral yabwiye umucamanza ati “Nuzman yaraje arambwira ngo Sergio, nshaka kukubwira kuri Perezida wa IAAF, Lamine Diack, ni umuntu witeguye kwakira ruswa”.

Ubucamanza muri Brazil mu Ukwakira 2017, bwashinje Nuzman kwishyura miliyoni $2, za ruswa kugira ngo Rio de Janeiro yemererwe kwakira imikino ya Olimpiki, urubanza rukaba rugikomeje nubwo avuga ko ari umwere.

Diack nawe ashinjwa n’abashinjacyaha ba Brazil nubwo avuga ko ari umwere. Mu kwezi gushize yanagaragaye mu rukiko rwo mu Bufaransa ku byaha we n’umuhungu we Papa Massata, bagize uruhare mu myaka myinshi. Birimo kwakira ruswa n’iyezandonke.

Cabral yabwiye umucamanza Marcelo Bretas ko Nuzman, yamwijeje ko nta kibazo akwiye kugira kuko Diack amenyerewe mu bikorwa nk’ibyo bya ruswa. Yavuze ko Diack yamwijeje amajwi atandatu mu gihe yaba yishyuye miliyoni $1.5, akaba yamuha andi igihe yishyuye andi $500 000.

Carbal (iburyo) yavuze ko yatanze ruswa ngo Rio de Janeiro yakire imikino Olimpiki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza