Uwahoze ari Perezida wa Yemen, Ali Abdullah Saleh yishwe

Yanditswe na IGIHE
Kuya 4 Ukuboza 2017 saa 10:06
Yasuwe :
0 0

Uwahoze ari Perezida wa Yemen, Ali Abdullah Saleh, kuri uyu wa Mbere yiciwe mu mirwano yashyamiranyije abamushyigikiye n’inyeshyamba z’aba-Houthi bahoze bafatanyije kurwanya uwamusimbuye.

Abayobozi bo mu ishyaka rye, GPC, bavuze ko Saleh yaguye mu gitero cyagabwe mu majyepfo y’umurwa Mukuru wa Yemen, Sanaa, ubwo we n’abo bari kumwe bageragezaga guhungira ahitwa Sanhan.

Mu myaka ibiri n’igice ishize nibwo Saleh afatanyije n’inyeshyamba z’aba-Houthi bafatanyije kurwanya Perezida uriho, Abdrabbuh Mansour Hadi, ufashwa n’ingabo za Arabia Saoudite. Gusa kuwa Gatandatu w’icyumweru gishize nibwo yiyemeje gutandukana n’izi nyeshyamba akiyunga ku ngabo ziyobowe na Arabia Saoudite. Ibi byatumye ziyemeza kumwica kuko zamufata nk’umugambanyi ukomeye.

BBC yanditse ko ejo ku Cyumweru ari bwo inyeshyamba z’aba-Houthi, zari zigaruriye umujyi wose ndetse zigaba ibitero bikomeye mu bice biherereyemo umuryango wa Saleh n’abo bari bafatanyije. Ingabo zishyize hamwe ziyobowe na Arabia Saudite ntizabashije guhagarika ibyo bitero byaguyemo uwahoze ari Perezida wa Yemen, ubwo urugo rwe rwaterwagaho igisasu.

Hari amafoto n’amashusho byakomeje kuzenguruka ku mbuga nkoranyambaga byerekana umurambo bivuga ko ari uwa Saleh ufite igikomere mu mutwe kinini.

Umuyobozi w’inyeshyamba z’aba-Houthi, Abdul Malik al-Houthi, yishimiye urupfu rwa Saleh, avuga ko ari umunsi wo gutsindwa kw’umugambanyi. Yakomeje avuga ko abarwanyi be nta kibazo bafitanye n’ishyaka GPC cyangwa abayoboke baryo.

Gusa umwe mu bayobozi ba GPC yavugiye kuri Televiziyo ko abaturage ba Yemen bagomba guhaguruka bakamagana abarwanyi b’aba-Houthi. Ibintu bisobanuye ko inzira y’ibiganiro by’amahoro igenda inanirana.

Saleh, w’imyaka 77 yagiye ku butegetsi nka Perezida wa Yemen y’Amajyaruguru mu 1978, ubwo yiyungaga na Yemen y’Amajyepfo mu 1990, yabaye Perezida w’igihugu gishya.

Inyeshyamba z’aba-Houthi zigizwe n’Abashia, zarwanyije Saleh hagati ya 2004 na 2010 ndetse mu 2011 zigira uruhare mu kumukura ku butegetsi zishyiraho uwari umwungirije, Hadi.

Mu 2014 Saleh yifatanyije n’inyeshyamba z’aba-Houthi, bigarurira umujyi wa Sanaa bituma mu 2015 Perezida Hadi ahunga igihugu, ari na byo byabaye intandaro y’uko Arabia Saoudite yinjira muri iyi ntambara. Kuva icyo gihe abagera ku 8670 barishwe abandi 49,960 barakomereka na ho abagera kuri miliyoni 20.7 barahunga abandi baba mu buzima bubi bw’inzara na Cholera imaze guhitana abagera ku 2211 kuva muri Mata.

Uwahoze ari Perezida wa Yemen, Ali Abdullah Saleh yishwe

Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza