Kwamamaza

USA: Umupasiteri yarogoyeTrump ubwo yavugiraga ijambo mu rusengero

Yanditswe kuya 15-09-2016 saa 13:45' na Cyprien Niyomwungeri


Umupasiteri wari wakiriye mu rusengero rwe umukandida w’Umu-Republicain, Donald Trump, yamuciye mu ijambo amubuza gukomeza kwibasira Hillary Clinton bahanganiye intebe y’umukuru w’igihugu muri Leta Zunze Ubumwe za Amerika.

Ejo ku wa Gatatu tariki 14 Nzeri 2016, ni bwo Rev. Faith Green Timmons wo mu itorero rya Bethel United Methodist riherereye i Flint muri Leta ya Michigan, yakiriye Donald Trump muri urwo rusengero, ariko biza gutungurana amusanze aho yavugiraga ijambo amubuza kwibasira Hillary Clinton.

Yamubwiye ati “Trump, nagutumiye hano ngo udushimire ibyo twakoze muri Flint ntabwo ari ugutanga imbwirwaruhame za politiki.”

Trump yiyoroheje yamusubije ati “Nibyo, ni byiza. Ngiye kugaruka kuri Flint, si byo? Akababaro ka Flint gakomoka ku byakozwe nabi byinshi.”

Mu ijambo rye, Pasiteri Timmons yatangaje ko itorero rye ritanga ikaze ku bantu bose nkuko CNN yabitangaje.

Yagize ati “Iki gikorwa gifunguye kuri buri wese, uyu munsi Donald Trump yaje kureba. Kuza kwe muri Bethel United Methodist, ntaho bihuriye n’ibikorwa bye byo kwiyamamaza.”

Mbere y’uko Timmons amurogoya, Trump yari atangiye kwibasira Clinton avuga ko yashyigikiye amasezerano yo koroshya ubucuruzi, nka kimwe mu bintu yemeza ko cyatumye ubukungu bwa Flint bujya mu kaga.

Yagize ati “Hillary yaratsinzwe mu bijyanye n’ubukungu. Mu by’ukuri yatsinzwe muri politiki mpuzamahanga. Buri kimwe akozeho ntigitungana. Nta nakimwe.”

Kuba Trump yasuye agace ka Flint kamwe mu dutuwe n’Abanyafurika b’Abanyamerika benshi, bigaragaza imbaraga akomeje gushyira mu kwigarurira imitima yabo ngo bazamutore nyuma yo gusa n’ubibasira abatuka.

Uru ruzinduko rukurikiye urwo yagiriye mu rundi rusengero narwo rw’Abanyafurika b’Abanyamerika ruherereye muri Detroit, aho abasaga 200 mu bamurwanya bateraniye hanze yarwo bamwamagana.

Uretse uyu mupasiteri, hari n’umukirisitu waciye mu ijambo Trump amushinja kwibasira abirabura baba muri iki gihugu abita abanebwe.

Donald Trump kandi mu bihe bishize ubwo yabaga ari kwiyamamariza kuzayobora Amerika, yakunze kumvikana anenga abirabura avuga ko nta kindi bashoboye uretse gukora imibonano mpuzabitsina ndetse ngo banakeneye ubundi bukoloni bw’imyaka 100.

Mu ntangiriro z’uyu mwaka kandi Donald Trump yatangaje benshi ubwo yavugaga ko natorerwa kuyobora Amerika azafunga Perezida Yoweri Museveni wa Uganda ndetse na Perezida Robert Mugabe abita abanyagitugu bashaka gupfira ku butegetsi.


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved