Kwamamaza

USA: Trump yifurije Hillary Clinton gukira, anizeza kuvuga akari imurori ku buzima bwe

Yanditswe kuya 13-09-2016 saa 08:48' na Philbert Hagengimana


Hillary Clinton yatangaje ko yatangiye koroherwa nyuma y’uburwayi bwatumye adasoza umuhango wo kwibuka igitero cyagabwe muri Amerika kuya 11 Nzeri 2001 , Donald Trump bahanganiye umwanya w’Umukuru w’Igihugu yamwifurije gukira vuba, anizeza ko agiye gushyira ahagaragara ibireba ubuzima bwe.

Kuri iki cyumweru tariki ya 11 Nzeri ni bwo muri Leta Zunze Ubumwe za Amerika hibukwaga ku nshuro ya 14 igitero cyagabwe Ku nyubako y’ubucuruzi (World Trade Center) no kuri Minisiteri y’Ingabo (Pentagon) kigahitana abasaga 2,996.

Hillary Clinton uhagarariye ishyaka ry’aba-Democrates mu matora y’Umukuru w’Igihugu, yari muri uwo muhango wabereye i New York, ariko awukurwamo igitaraganya, nyuma y’aho umubiri we wari umaze gucika intege ku buryo yari hafi kwitura hasi.

Nyuma yo kumurandata no kumusindagiza bakamwinjiza mu modoka yahise imujyana kwa muganga, byaje gutangazwa ko yari afite uburwayi bw’umusonga, ariko akaba n’amazi mu mubiri yari yamubanye make.

N’ubwo nyuma y’amasaha make umuganga uvura Hillary Clinton yaje gutangaza ko ameze neza, Donald Trump bahatanira umwanya w’Umukuru w’Igihugu cya Leta Zunze Ubumwe za Amerika yahise atangaza ko amwifuriza gukira vuba.

BBC itangaza ko Trump yakomeje avuga ko bidatinze azashyira ahagaragara ibirambuye ku buzima bwe bwite.

Ubwo burwayi bwa Hillary Clinton bwari bwamenyekanye kuwa Gatanu w’icyumweru gishize, ndetse ngo anagirwa inama yo kuruhuka, ari nayo mpamvu yahise asubika urugendo yagombaga kugirira i California mu rwego rwo kwiyamamaza.

Ibi bibaye mu gihe umukandida uhagarariye ishyaka ry’aba- Républicains, Donald Trump bahanganye mu matora azaba mu Ugushyingo uyu mwaka aherutse gutangaza ko atewe amakenga n’ubuzima bw’uwo bahanganye, yemeza ko nta bitekerezo ndetse nta n’imbaraga z’umubiri afite zo kuba yayobora Amerika cyangwa se ngo abe yahangana n’abarwanyi b’umutwe wa Islamic state.

Umuganga w’umwihariko wa Clinton, Dr Lisa Bardack we mu kwezi gushize yari yatangaje ko uyu mukandida afite ubuzima bwiza kandi ko yiteguye gukora inshingano z’Umukuru w’Igihugu.

Uyu muganga kandi yemeza ko Clinton yari amaze igihe kinini yarakize neza nyuma y’uko mu 2012 abazwe indwara ifata amaraso yari arwaye.

Kuri ubu abafasha Clinton mu bikorwa byo kwiyamamaza bari gushinja abafasha ba Trump gutangaza ibihuha by’uko Clinton yaba adafite ubuzima bwiza.

Clinton aherutse gusaba imbabazi nyuma y’uko yari yavuze ko abashyigikiye Donald Trump basa n’abatariho bitewe n’uko ngo abizeza ibitangaza bakanga bakamuyoboka.

Intambara y’amagambo hagati y’aba bakandida bombi imaze iminsi kuko baherutse gushinjanya kuvuga amagambo y’irondaruhu ku baturage b’iki gihugu kibarizwamo umubare munini w’abirabura.

Amatora y’Umukuru w’Igihugu muri Leta Zunze Ubumwe za Amerika ateganyijwe kuba ku wa 8 Ugushyingo 2016.

Trump yatangaje ko agiye gushyira ahagaragara amakuru ku buzima bwe
Hillary Clinton yafashwe n'indwara itunguranye ahita ajyanwa kwa muganga igitaraganya
Clinton yatangaje ko yongeye kumera neza

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved