USA: Imyigaragambyo yafashe indi ntera nyuma y’iraswa ry’abirabura babiri

Yanditswe na Philbert Girinema
Kuya 21 Nzeri 2016 saa 12:12
Yasuwe : XX
0

Abapolisi 12 nibo bimaze kumenyekana ko bakomerekeye mu myigaragambyo ikurikiye iraswa ry’umwirabura mu Mujyi wa Charlote muri Leta ya Carolina ya Ruguru, warashwe n’umupolisi.

Abigaragambya bangije imodoka z’abapolisi zari zikikije inyubako uko kuraswa kwabereyemo, nk’uko byatangajwe na Polisi yo muri uwo Mujyi wa Charlotte, harimo umwe wakubiswe ibuye mu isura.

Kuri uyu wa Kabiri, umwirabura witwa Keith Lamont Scott w’imyaka 43, yarashwe n’umupolisi nawe w’umwirabura, aza gupfira mu bitaro.

CNN yatangaje ko ikivunge cy’abantu biganjemo abirabura ku mugoroba wo kuri uyu wa kabiri, bavugira icya rimwe bati “nta butabera, nta mahoro”, bari bitwaje n’ibyapa bivuga ko “ubuzima bw’abirabura bugomba kurengerwa”.

Polisi ivuga ko uyu mugabo warashwe yari yitwaje imbunda ndetse akaba yari “ateye ikibazo ku mutekano”, ariko abaturanyi be babwiye itangazamakuru ko uwo mugabo nta mbunda yari afite ahubwo cyari igitabo.

Umuvugizi wa Polisi muri uwo Mujyi, Keith Trietley, yavuze ko Scott yasohotse mu modoka afite imbunda ariko ahita yongera asubiramo, maze abapolisi begereye imodoka ye ahita yongera asohokanamo na ya mbunda, bahita bamumishaho amasasu.

Umugore uvuga ko ari umukobwa wa Scott yavuze nta mbunda yari afite ahubwo yasomaga igitabo ategereje umuhungu we wagombaga kuzanwa n’imodoka y’ishuri yigaho, ndetse ngo yabanje kuraswa amashanyarazi amuca intege mbere yo kuraswa amasasu ane kandi yari asanganywe ubumuga.

Polisi ntiyigeze isubiza ku byavuzwe n’uyu, ariko ivuga ko yatoye imbunda aho byabereye, ndetse ko yashakishaga umuntu ukekwaho icyaha ku nyubako Scott yiciweho, atari we wari ugambiriwe.

Iyi myigaragambyo ivutse nyuma y’undi mwirabura witwa Terence Crutcher warasiwe mu Mujyi wa Tulsa muri Oklahoma kuwa Gatanu w’icyumweru gishize, Polisi ikavuga ko yarashwe nta ntwaro afite.

Amashusho amugaragaza ari kugenda yashyize amaboko hejuru ubwo yaraswaga n’umupolisi witwa Brentley Vinson ubu uri gukurikiranwa, amagana y’abigaragambya ahita yuzura imihanda n’imbere y’Ibiro bya Polisi muri uwo mujyi.

Polisi yahanganye n'abigaragambya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza