Kwamamaza

Havutse impaka ku nkiko Gacaca mu rubanza rwa Ngombwa wisanishije na Twagiramungu

Yanditswe kuya 24-09-2016 saa 20:48' na Rabbi Malo Umucunguzi


Umwarimu muri Kaminuza ya London, yatanze ubuhamya ko Inyangamugayo za Gacaca zacishije mu kuri kandi izi nkiko zatanze umusaruro mu gukurikirana ibihumbi by’imanza z’abakekwagaho uruhare muri Jenoside yakorewe abatutsi mu 1994, igahitana abasaga miliyoni.

Dr. Phillip Clark wigisha ibijyanye na politiki mpuzamahanga wanakoze ubushakashatsi ku kongera kwiyubaka k’u Rwanda n’ubwiyunge guhera mu 2002, yatanze ubuhamya ko izi nkiko 11 000 zashyizweho hatoranyijwe abantu b’inyangamugayo, bifasha abantu kuvuga ibyo babonye kuko Jenoside yakozwe babireba.

Dr. Clark yatangaga ubuhamya ku ruhande rw’Ubushinjacyaha, mu rubanza rwa Gervais “Ken” Ngombwa Ngombwa w’imyaka 56, yafunzwe muri Mutarama akurikiranweho kugerageza guhabwa ubwenegihugu binyuranyije n’amategeko, gutunga ubwenegihugu atabyemerewe no kubeshya urwego rushinzwe umutekano rukurikirana ibijyanye n’abinjira n’abasohoka.

Ikinyamakuru The Gazette cyatangaje ko uyu mugabo ashobora gufungwa imyaka 20 ariko Ubushinjacyaha buri kumusabira kongererwa imyaka y’igifungo kubera uruhare akekwaho muri jenoside yakorewe abatutsi mu 1994.

Ni ibyaha Ngombwa yanahamijwe n’inkiko Gacaca eshatu zo mu Rwanda n’ubwo atari ahari, harimo urwa Maranyundo, Kayumba na Nyamata zo mu Karere ka Bugesera, zamukatiye ibihano biri hagati yo gufungwa imyaka 15 na burundu.

Nk’umuntu wari umucuruzi ukomeye mu Bugesera, ari mu bashinjwa kugaba ibitero kuri Kiliziya ya Ntarama yaje no guhindurwa urwibutso rwa Jenoside, yiciwemo Abatutsi basaga 5000.

Ubuhamya bwa Dr. Clark kuri uyu wa Gatanu bwavuguruzaga ubw’indi mpuguke yatanze kuwa Kane, ikavuga ko izo nkiko zakoreshaga ruswa, agamije gutesha agaciro ibyemezo inkiko Gacaca zafatiye Gervais Ngombwa zikanasaba ko atabwa muri yombi.

Perezida w’Urukiko rw’akarere ruherereye muri Cedar Rapids [Umujyi wa Kabiri muri Leta ya Iowa], Linda Reade, ntiyatangaje umwanzuro w’urubanza, ahubwo yavuze ko hazagenwa indi tariki kugira ngo ababuranyi bombi batange imyanzuro yabo.

Ibimenyetso byatanzwe mu rukiko byagaragazaga ko Ngombwa yabeshye ubuyobozi bushinzwe abinjira n’abasohoka ko ari umuvandimwe w’uwahoze ari Minisitiri w’Intebe mu Rwanda uri mu buhungiro [Faustin Twagiramungu], yumvikanisha ko kugaruka mu Rwanda bitamworohera.

Muri Gicurasi umucamanza yamwambuye ubwo bwenegihugu n’ubundi burenganzira yari yarahawe mu Ugushyingo 2004.

Mu iburanisha ryo kuwa Kane, impuguke yatangaga ubuhamya ku ruhande rw’uregwa, yavuze ko Inkiko Gacaca zamuhamije ibyaha zitari zifite uburenganzira bwo kwifashisha abavoka ndetse n’Inyamangamugayo zitari zarahuguwe.

Imiterere y’izi nkiko Clark yayemeranyijeho n’iyo mpuguke, ariko avuga ko ikibazo gikomeye cyari ugukurikirana umubare munini w’abakekwagaho ibyaha, ndetse igihugu kikaba cyari gifite abacamanza bake kimwe n’abavoka kuko abenshi bishwe cyangwa bagahunga muri jenoside.

Clark yavuze ko Inyangamugayo za Gacaca zari zifite amategeko zigomba gukurikiza, ndetse mbere yo gutangira guca imanza zahuguwe ibyumweru bibiri, zikomeza kujya zihabwa amahugurwa uko amategeko ahinduka.

Yavuze ko izi nkiko zitari zubakitse kimwe n’inkiko zisanzwe, ariko yize neza imikorere yazo imyaka myinshi ndetse yitabira imanza zigera ku 105 guhera mu 2003 kugeza mu 2012 mu bice bitandukanye by’u Rwanda, agasanga zaratanze umusaruro ufatika.

Umwunganizi wa Ngombwa, Ray Scheetz, yavuze ko raporo y’Ishami rishinzwe ububanyi n’amahanga muri Leta Zunze Ubumwe za Amerika mu 2012, itandukanye n’umwanzuro wa Clark kuko yo yavugaga ko abacamanza bafataga umwanzuro mu munsi umwe ndetse abaregwa bakamenya ibyaha baregwa ku munsi w’urubanza.

Clark yasubije ko atari byo yabonye mu bushakashatsi bwe, ndetse yasomye iyo raporo ariko iryo shami rikaba ryaragendeye ku byo izindi nzego zagiye zitangaza, bitandukanye n’ubushakashatsi we yikoreye.

Kuwa Kane kandi intumwa y’ishami rishinzwe umutekano yatanze ubuhamya ko hari abatangabuhamya benshi bavuze ko Ngombwa yari umurwanashyaka wa MDR-Power, ishyaka ryagize uruhare muri Jenoside yakorewe abatutsi.

Uwo mukozi yanavuze ko Ngombwa ko hari urukiko rwamukatiye gufungwa imyaka 30 n’urundi rwamukatiye gufungwa burundu, uyu mugabo akaba yarahunze igihugu hamwe n’umugore n’abana nyuma ya Jenoside yakorewe abatutsi mu 1994.

Amakuru ku byangombwa nyakuri bya Ngombwa yamenyekanye mu 2014 ubwo u Rwanda rwoherezaga inyamdiko muri Leta Zunze Ubumwe za Amerika rusaba ko atabwa muri yombi kubera ibyaha bya jenoside akekwaho.

Nk’umuntu wakatiwe n’inkiko adahari, aramutse yoherejwe mu Rwanda ashobora gusaba ko urubanza rwe rusubirwamo.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved