Kwamamaza

USA: FBI yabuze ibimenyetso bihamya ko Trump akorana n’u Burusiya

Yanditswe kuya 2-11-2016 saa 13:07' na Jean Pierre Tuyisenge


Ibiro bishinzwe iperereza muri Leta Zunze Ubumwe za Amerika,FBI, bivuga ko bimaze iminsi bikora iperereza ku byashinjwaga Umukandika w’ishyaka ry’Aba Republicains mu matora y’umukuru w’igihugu, Donald Trump, ko akorana bya hafi n’Abarusiya ndetse bakanamushyigikira mu kwiyamamaza, gusa ngo mu byo babonye nta gihamya y’ibyo yagaragaye.

Kuva ku wa gatanu w’icyumweru gishize umuyobozi mukuru wa FBI, James Comey, atangaje ko hari ubutumwa bushya bwavumbuwe bufite aho buhuriye na Hillary Clinton muri mudasobwa ya Reid Weiner, wahoze ari umugabo wa Huma Abedin, usanzwe ukorana bya hafi na Clinton, aba-democrates barangajwe imbere na Harry Reid, batangaje ko ibyo ari ukurenga ku mategeko y’iki gihugu no gushaka gushyigikira ishyaka ry’aba-republicains bahanganye mu matora azaba tariki ya 8 Ugushyingo 2016.

Yanavuze kandi ko atumva ukuntu umuyobozi wa FBI asohora ubutumwa (emails) bushya bwerekeye kuri Hillary Clinton mu gihe we yamugejejeho ikirego cy’uko Trump akorana bya hafi na Leta y’u Burusiya, ariko akaba nta cyo yabikozeho.

Abanyamategeko n’abakuriye ibiro by’iperereza bya Amerika bavuga ko mu iperereza ku mabanga yibwe mu ishyaka ry’Aba-democrates basanze inzego z’ubutasi z’u Burusiya zari zigamije kwica amatora, ariko ko batari bagamije gufasha umukandida runaka.

CNN yanditse iyi nkuru ivuga ko Amerika yashinje ku mugaragaro abayobozi bakomeye bo mu u Burusiya kwinjira mu mabanga y’iki gihugu rwihishwa bakaza no gusohora zimwe mu nyandiko zikomeye bakoresheje internet. Muri ibyo birego iki gihugu cyatangaga, harimo no kuba amatora y’umukuru w’igihugu yazamo kidobya.

FBI ngo yakomeje kugenzura amakuru y’imikoranire mu bikorwa byo kwiyamamaza iri hagati y’u Burusiya na Donald Trump, gusa ngo nta bimenyetso yabonye.

Mu minsi yashize FBI yakoze iperereza ku birego byashyirwaga k’uwahoze akuriye ibikorwa byo kwiyamamaza bya Trump, Paul Manafort n’abandi bakorana ko bafite imikoranire idasanzwe n’abashyigikiye Perezida w’u Burusiya, Vladimir Putin, bo muri Ukraine.

FBI kandi yakoze iperereza ku mujyanama wa Trump, Carter Page ushinjwa gukorana inama mu Burusiya n’abari barafatiwe ibihano na Amerika. Gusa FBI yatangaje ko nta byinshi byagaragaye nyuma y’ibyo birego ndetse na Page ahakana ibyo ashinjwa byose ananenga Aba-democrates bazamuye icyo kirego.

Yagize ati “ Ibyo ni ibinyoma, sinzi n’aho nabihera, ibyinshi muri ibi birego bihora bigaruka, bizenguruka mu bitangazamakuru no mu nkuru zanditswe n’abashyigikiye Clinton bandwanya.”

FBI kandi ikomeje iperereza imaze imyaka itandatu ikora kuri Roger Stone ushyigikigiye Trump, ushinjwa kugirana imikoranire n’urubuga rushyira hanze amabanga adasanzwe y’ibigo n’abategetsi bakomeye rwa WikiLeaks.

Ibi birego bimushinja kugambana na Julian Assange nyir’urwo rubuga kugira ngo bashyire hanze emails zibwe abategetsi bakomeye bo mu Ishyaka ry’Aba-democrates.

Stone yabwiye ikinyamakuru NBC News mu Ukwakira ko Julian Asange ari inshuti ye isanzwe, bityo ko nta emails bafatanyije gushyira hanze.

Mu gihe habura iminsi mike ngo aya matora abe, imibare igaragaza uko abaturage babona uzegukana intsinzi, yerekana ko Donald Trump yigaranzuye Clinton aho amurusha inota rimwe kuko Trump afite 46% mu gihe Clinton bahanganye afite 45%.

FBI yavuze ko nta kigaragaza ko u Burusiya bufasha Trump mu kwiyamamaza nkuko byavugwaga

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved