00:00:00 IGIHE NETWORK KN KINYARWANDA EN ENGLISH FR FRANCAIS

USA: Doze ya gatatu ya Pfizer yagizwe itegeko ku bakuze n’abafite ibyago byo kwandura

Yanditswe na Dufitumukiza Salathiel
Kuya 5 Ukwakira 2021 saa 10:22
Yasuwe :
0 0

Ikigo gishinzwe Imiti n’Ibiribwa muri Leta Zunze Ubumwe za Amerika cyategetse ko abageze mu zabukuru n’abandi bafite ibyago byinshi byo kwandura bahawe urukingo rwa Pfizer, bahabwa doze ya gatatu mu gihe hagikorwa inyigo igaragaza niba abantu bose bakeneye kuyongerwa.

Reuters yatangaje ko icyo cyemezo cyafashwe nyuma yo gusesengura ubushakashatsi bwerekanye ko ubudahangarwa umubiri w’uwakingiwe Coronavirus hifashishijwe Pfizer uba ufite bugabanuka nyuma y’amezi atandatu ahawe doze ya kabiri; bukava kuri 88% bukagera kuri 47%.

Muri Kanama uyu mwaka hari hakozwe inyigo harebwa ku budahangarwa bwarwo. Lancet Medical Journal ni yo yayimuritse. Abagera kuri miliyoni 3,4 bakingiwe hagati ya Ukuboza 2020 na Kanama 2021 ni bo yakoreweho.

Ubusenguzi bwerekanye ko nibura mu mezi atandatu uwakingijwe Pfizer aba afite ubudahangarwa buri kuri 90% bumurinda kwicwa cyangwa kurembywa na COVID-19, haba no ku zihinduranya nka Delta.

Ni ibintu bimaze kugaragara n’ahandi kuko mu bihugu bitandukanye by’u Burayi ho abahawe urwo rukingo cyangwa urwa Moderna bari guterwa doze ya gatatu kugira ngo babashe kugumana ubudahangarwa. Doze ya gatatu bayitera uwakingiwe nyuma y’amezi atandatu ahawe iya kabiri.

Pfizer isanzwe ibarwa mu nkingo zidakunze guhangarwa na Coronavirus zihinduranya.

Ubwo Umuyobozi ushinzwe Ubuvuzi muri Pfizer-BioNTech, Luis Jodar, yabikomozagaho, yagize ati “Ubusesenguzi bwacu bwimbitse ku bwoko bwa Coronavirus zihinduranya butugaragariza neza ko urukingo rwa Pfizer rushobora guhangana nazo haba n’iya Delta.”

Mu kwezi kumwe umuntu ahawe doze ebyiri za Pfizer aba afite ubwirinzi bwa 93% imbere ya Delta, nyuma y’amezi ane bukagera kuri 53%. Ku bundi bwoko bwa Coronavirus zihinduranya ho ubudahangarwa buva kuri 97% bukagera kuri 67%.

Hagaragajwe ko nyuma y'amezi atandatu ubudahangarwa bw'uwakingijwe Pfizer bugabanuka bukava kuri 88% bukagera kuri 47%

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .