USA: Amatora yatumye idolari rya Amerika rita agaciro ku isoko ry’ivunjisha mpuzamahanga

Yanditswe na Philbert Girinema
Kuya 9 Ugushyingo 2016 saa 09:07
29 26

Mu ijoro ry’amatora y’Umukuru w’Igihugu cya Leta Zunze Ubumwe za Amerika, ibintu byinshi byahindutse by’umwihariko mu bukungu aho idolari ryataye agaciro ugereranyije n’andi mafaranga mpuzamahanga.

Kugeza ubu amajwi aragaragaza ko umukandida Donald Trump ari imbere mu matora kuko amaze guhigika Hillary Clinton muri leta nyinshi.

Mu gitondo cyo kuri uyu wa Gatatu ifaranga ya Mexique ryamanutse cyane mu mateka ugereranyije n’idolari, aho ku nshuro ya mbere ryataye agaciro ka 13% bitewe na politiki ya Donald Trump yo guhagarika burundu amasezerano mu by’ubucuruzi hagati ya Amerika na Mexique.

Reuters iratangaza ko idolari rya Amerika ryataye agaciro ka 2.5% ugereranyije n’ama-Euro, rita agaciro kangana na 3.7% ugeraranyije n’ama-Yen (akoreshwa mu Buyapani), naho agaciro ka zahabu kiyongeraho 4.7%.

Idolari rimwe ryavunjaga ama-Yen 101.46 ryageze ku 105.47, idolari rimwe riva ku ma-euro 1.0989 rigera kuri 1.1222. Ifaranga ry’u Busuwisi ryazamutse riva kuri 0.9576 ku idolari rimwe rigera kuri 0.9835.

Jack Ablin, Umuyobozi ushinzwe ishoramari muri Banki ya BMO i Chicago, yavuze ko Trump natorwa ubukungu bushobora kugabanukaho 10% mu gihe gito cyane.

“Abashoramari ntibazi icyo azakora, ugereranyije n’imirongo ya politiki n’imyitwarire ye yagiye agaragaza. Isoko ryo hanze ntabwo rizakora neza. Iri ni isoko ritunzwe n’ibyo ritugurisha kuruta ibyo turigurisha.”

Trump yamaze gutsinda muri Alabama, Arkansas, Mississippi, Oklahoma, Tennessee, Indiana, West Virginia, South Carolina, Kansas, Missouri, Montana, Nebraska, North Dakota, South Dakota, Texas, Wyoming, Louisiana na Kentucky.

Ni mu gihe Hillary Clinton we yatsinze muri Connecticut, Delaware, Illinois, Maryland, Massachusetts, New Mexico, New Jersey, New York, Rhode Island, Vermont na Washington D.C.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE