USA: Abana 757 b’abimukira ntibarahuzwa n’ababyeyi babo

Yanditswe na Evariste Nsengimana
Kuya 28 Nyakanga 2018 saa 12:37
Yasuwe :
0 0

Abana 757 b’abimukira batandukanyijwe n’imiryango yabo ubwo bageragezaga kwinjira muri Leta Zunze Ubumwe za Amerika (USA) banyuze ku mupaka wa Mexique, ntibarahuzwa n’ababyeyi babo.

Abo bana barimo 46 bari munsi y’imyaka itanu batandukanyijwe n’ababyeyi babo hagendewe kuri politiki ya Perezida Donald Trump, ikumira abimukira mu gihugu ayobora.

Kuva iyo Politiki yashyirwaho, hari abana 2634 batandukanyijwe n’ababyeyi, gusa bagiye bahuzwa hasigara 757.

Abakurikiranira hafi iby’iki kibazo bavuga ko nubwo Perezida Trump yakunze gutanga imbwirwaruhame zikakaye ku gukumira abimukira mu gihugu ayoboye, kuri ubu bisa n’aho bigoye kwemeza ko bizashoboka.

RFI yanditse ko ubuyobozi buvuga ko muri abo bana harimo abo bigoye guhuza n’ababyeyi kuko kumenya aho baherereye bitoroshye, abandi ntibizere neza niba koko aho bavuga bakomoka ariho. Hari kandi impungenge z’uko imiryango yabo ishobora kuba yarahise yirukanwa itaragera muri Amerika.

Abakozi bashinzwe abinjira n’abasohoka muri Amerika, basobanuye ko impunzi zahawe amahirwe yo gusubiranayo n’abana ariko benshi bagahitamo kubasigayo biringiye ko bazahabwa amahirwe yo gutura muri Amerika.

Kuri ubu ikibazo gisigaye ku hazaza h’abo bana ariko imiryango itari iya Leta yemeye gufasha mu gushakisha aho ababyeyi babo baherereye.

Mu ijambo rya buri cyumweru yavuze kuri uyu wa Gatanu, Perezida Trump yibanze ku bikorwa by’iterabwoba, ubucuruzi bw’abantu, amabandi nka bimwe mu bikorwa Polisi itagomba kwihanganira na gato.

Bamwe mu bana bongeye guhuzwa n'imiryango yabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza