Urukiko rwa Loni rwasabye Amerika kugabanya bimwe mu bihano yafatiye Iran

Yanditswe na Evariste Nsengimana
Kuya 3 Ukwakira 2018 saa 09:52
Yasuwe :
0 0

Urukiko Mpuzamahanga rw’Umuryango w’Abibumbye (ICJ), rwategetse Leta Zunze Ubumwe za Amerika kudohora ku bihano zafatiye Iran, cyane cyane ibigira ingaruka ku bufasha buhabwa ikiremwamuntu n’umutekano w’ingendo z’indege za gisivili.

Muri Gicurasi uyu mwaka nibwo Amerika yivanye mu masezerano mpuzamahanga yo guhagarika icura n’ikoreshwa ry’intwaro za kirimbuzi, bigira ingaruka ku bucuruzi bwa Iran.

Kuri uyu wa Gatatu abacamanza b’uru rukiko batangaje ko ibyo Amerika yakoreye Iran bigamije gukoma mu nkokora ubucuruzi bwayo, binyuranyije n’amasezerano ya gicuti byasinyanye mu 1955.

Perezida w’Urukiko, Abdulqawi Yusuf, yavuze ko Amerika ‘Igomba gukuraho uburyo yahisemo bukumira gushyira ubufasha abantu muri Iran.

Ati “Ibihano ntibigomba kubangamira kwinjiza butaka bwa Iran, ibintu bishobora gufasha abantu nk’imiti, ibikoresho byo kwa muganga, ibiribwa, ibikomoka ku buhinzi n’izindi serivisi zirebana n’ingendo zo mu kirere.”

Abacamanza bavuze ko nubwo ibihano Amerika yafashe bitareba ibyo bavuze, hari ubwo bibangamira abacuruzi n’abandi banya-Iran mu buhahirane mpuzamahanga, bikagorana kugura ibintu.

Minisitiri w’Ububanyi n’Amahanga wa Leta zunze Ubumwe za Amerika, Mike Pompeo, yamaganye icyemezo cy’urukiko, avuga ko nta bubasha rufite ku bihano igihugu cye cyafashe kubw’inyungu z’umutekano.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza