Urubanza rw’umugabo ushinja umugore we kumuriganya arenga miliyari 1.5 Frw rwongeye gusubikwa

Yanditswe na Ntabareshya Jean de Dieu
Kuya 15 Mutarama 2021 saa 04:17
Yasuwe :
0 0

Urukiko Rukuru rwongeye gusubika mu bujurire urubanza rw’umugabo witwa Paul Ntizimira wari afite ubucuruzi bw’ibikoresho by’ubwubatsi n’ikinamba, aho avuga ko Mukamwiza Djamila bari barashakanye yamuhuguje arenga miliyari 1,5 Frw.

Ni urubanza rwagombaga kuba hifashishijwe ikoranabuhanga kubera impamvu zo kwirinda icyorezo cya Coronavirus, dore ko ubu buryo ari bwo buri kwifashishwa cyane n’inkiko muri ibi bihe.

Ubushinjacyaha bwari ku cyicaro gikuru kiri ku Kacyiru mu gihe abandi bari i Nyamirambo ku rukiko Rukuru.

Inteko y’abacamanza yinjiye igizwe n’abacamanza babiri, aho kuba batatu nk’uko byari bisanzwe, bitewe n’uko uwagombaga kuba uwa gatatu ari mu kiruhuko.

Ubwo umucamanza yabazaga niba ababuranyi bombi bahari, uruhande rwa Mukamwiza rwagaragaje ko akirwaye ku buryo atabonetse mu rukiko, ndetse abamwunganira mu mategeko bahita berekana impapuro zo kwa muganga zihamya ibyo bavugaga.

Ibi byatumye inteko y’abacamanza, ihita ifata umwanzuro wo gusubika urubanza, ivuga ko ruzasubukurwa ku wa 26 Gashyantare uyu mwaka.

Ku ruhande rwa Paul Ntizimira n’umwunganizi we, banenze iki cyemezo bavuga ko Inteko y’abacamanza yakabanje gusuzuma impamvu z’uburwayi bwa Mukamwiza kugira ngo hasuzumwe niba atari ugutinza urubanza ku bwende.

Ku ruhande rwa Ntizimira, yagaragaje ko Mukamwiza ashobora kuba ari gutinza urubanza ku bushake, ati “Ubundi dufitanye imanza ebyiri, harimo uru n’urundi rwo kwaka gatanya, uko njye mbibona agamije kugira ngo urubanza rwa gatanya rurangire, ayibone ahite yigendera ajyanye iyo mitungo yose.”

Yongeyeho ati “Cyane ko byamaze hamaze kugaragaza urutonde rumaze gutahurwa n’ubushinjacyaha rwanyererejweho umutungo w’ikigo Agenda hardware twari dufatanyije yanyerereje mu kigo cya Acts Vision Company, gusa urwo rutonde uyu munsi rwamaze kugera muri sisitemu y’urukiko.”

Ntizimira yasabye ko urubanza rwihutishwa kugira ngo Mukamwiza atazacika ubutabera.

Mukamwiza asanzwe yarahamwe n’icyaha cyo gukoresha impapuro mpimbano, aho yahanishijwe iggihano cy’imyaka itanu isubitse, yahise ajuririra kugeza n’ubu rukaba rukigeretse mu rukiko.

Byagenze bite ngo hitabazwe inkiko?

Ntizimira na Mukamwiza bashinze urugo mu 2009, bahita binjira mu bucuruzi bw’ibikoresho by’ubwubatsi, bashinga ibigo by’ubucuruzi byitwa Agenda Hardware Ltd na UHURU Service Ltd.

Muri 2013, Agenda Hardware Ltd yaje kugura inzu z’ubucuruzi ebyiri ibifashijwemo n’inguzanyo ya banki ya KCB. Inzu ziherereye mu Karere ka Nyarugenge, zifite agaciro karenga miliyoni 600 Frw.

Muri 2014, uyu muryango waje kugura ikibanza cyegeranye n’izo nzu, ugikoresha mu bucuruzi bw’ikinamba cyogerezwamo imidoka zikanacumbikirwamo.

Ubu bucuruzi bwa ‘Agenda Hardware Ltd’ ndetse n’ikinamba byagenzurwaga na Mukamwiza, ari na we wari ushinzwe kujya kurangura ibicuruzwa hanze y’igihugu akanabicuruza, ndetse akanamenyekanisha imisoro.

Ku rundi ruhande, Ntizimira yakurikiranaga ubundi bucuruzi bw’amakamyo atwara imizigo, nk’uko bari barabyumvikanye nk’umuryango.

Mu mwaka wa 2015, ubucuruzi bwa Agenda Hardware Ltd bwatangiye kugenda biguru ntege, kubera icyo Ntizimira yita ‘uburiganya bwatangiye kuranga umugore we’, aho byagaragaye ko yari afite izindi konti zanditse mu mazina ye bwite, yashyiragaho umutungo w’ikigo ‘Agenda Hardware Ltd’ umugabo we atabizi. Izo konti zigaragaza ko byatangiye kuva 2010.

Inyandiko z’inkiko zigaragara mu iperereza ry’Urwego rw’’Igihugu rw’Ubugenzacyaha (RIB), byagaragaye ko Mukamwiza ku giti cye yari afite konti enye, harimo n’iyanditse ku mwana wabo. Konti ebyiri muri izi, zanyujijweho amafaranga 297 200 490 Frw. Konti ya Agenda Hardware Ltd nayo yafungujwe umugabo we atabizi, yanyujijweho agera kuri 802 873 027 Frw.

Mu nkiko, Ntizimira yavugaga ko kuba izi konti zose zarafungujwe n’umugore we atabizi ari amakosa, akavuga ko ari yo mpamvu yaregeye ko uwo mutungo ungana na 1 100 073 517 Frw kugira ngo ugarurwe mu mutungo w’umuryango.

Urukiko rwaje kwanzura ko nta kigaragaza ko aya mafaranga ari aya ba nyiri izi konti, ariko ngo ntirwagaragaje undi nyirayo.

Ntizimira yavuze ko umugore we yaje gutwara imitungo bari bafatanyije akoresheje inyandiko mpimbano yiswe icyemezo cy’ubutane, kandi bataratandukana, atwara imitungo igizwe n’inzu ebyiri zifite agaciro karenga miliyoni 600 Frw.

Urukiko rwaje guhamya Mukamwiza icyaha cyo gukoresha impapuro mpimbano, rumuhanisha igihano cy’imyaka itanu isubitse ahita ajurira.

Ku ruhande rwa Ntizimira ndetse n’Ubushinjacyaha, bavuga ko ibi bihano uyu mugore n’uwo bafatanyije bahawe bidakurikije amategeko, kuko icyaha cy’impurirane mbonezamugambi “gihanishwa igihano ntarengwa cyo hejuru giteganyirijwe icyaha kirusha ibindi gukomera”.

Ubushinjacyaha bwanavuze ko kuba aba bombi barahanishijwe ibihano bisubitse, nyamara batarigeze babisaba mu iburanisha, ngo na byo n’ababuranyi babijyeho impaka, bidakurikije amategeko, bukavuga ko bahawe ibyo batasabye.

Andi makosa Ntizimira ashinja Mukamwiza akomeye akaba ari nayo ntandaro y’ibibazo, ni inyerezwa ry’ibicuruzwa by’ibigo byabo, harimo ko mu mwaka wa 2015, uyu mugore yagiye mu Bushinwa, akarangura ibicuruzwa bifite agaciro karenga miliyoni 400 Frw harimo na miliyoni 118 Frw yahawe na Cogebanque mu rwego rwo kongera ibicuruzwa bya Agenda Hardware Ltd. Mu kubizana, Mukamwiza ngo yabinyujije mu izina ry’ikigo cy’ubucuruzi cyitwa ‘Tech Plus Business Solution Ltd’.

Ntwali Justin, nyir’ikigo cya Tech Plus Business Solution Ltd. yahakanye iby’uko yari aziranye na Mukamwiza mbere yo kumutiza ikigo cye cy’ubucuruzi.

Mu ibazwa rye, yagize ati “Mukamwiza Djamilla yansabye ko namutiza ikigo cyanjye cy’ubucuruzi (muha Tin number yanjye) ngo agicisheho ibicuruzwa mu rwego rwo kubihisha umugabo we ngo batazabigabana kuko bari mu rubanza rwa gatanya, ambwira ko azabyishyurira imisoro kandi ko azampa n’akazi”.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .