Kwamamaza

Umuyobozi mu Bufaransa yasabye abaturage gutera umugongo Juppé mu matora ya Perezida

Yanditswe kuya 18-10-2016 saa 11:14' na Rabbi Malo Umucunguzi


Mu gihe uruhande rwa Perezida François Hollande rwakunze guhangana na Nicolas Sarkozy, kuri iyi nshuro hari kwigaragaza Alain Juppé, uri no guhabwa amahirwe ko ashobora gutorerwa kuyobora u Bufaransa mu matora ateganyijwe mu minsi iri imbere.

Mu gushaka gucubya Juppé, umwe mu bantu ba hafi mu ngoro ya Perezida Hollande, yashyize hanze ibaruwa igaragaza amakosa akomeye yagiye akora ku buryo adakwiriye kuba ariwe uhabwa amahirwe yo kuyobora u Bufaransa muri iki gihe.

Politiki ye y’ahahise itanga icyuho

Juppé usanzwe ari Meya w’Umujyi wa Bordeaux yagarutsweho muri iyo baruwa y’umwe mu bayobozi ba hafi ya Perezida Hollande, igaragaza ko adakwiriye gutorwa mu matora y’ibanze ategerejwe mu mpera z’Ugushyingo.

Muri ubwo butumwa, Juppé anengwa cyane kuri politiki ye y’ahahise by’umwihariko, hagashingirwa ku byemezo yagiye afata.

Buti "Yabaye Minisitiri w’Intebe wa Jacques Chirac mu 1995, yashize u Bufaransa mu kibazo biturutse ku mavugurura yakoze mu buryo bubi mu bijyanye na pansiyo.’’

Juppé anakomozwaho ku izina yasize mu butabera, iyo baruwa igakomeza igira iti ‘‘We nka Perezida, ntabwo yaba ari Repubulika watangaho urugero. (…) Yagize uruhare mu buyobozi bwishyuraga amafaranga ku myanya y’imirimo itagaragara ubwo yari mu ishyaka RPR,"

Icyo ni icyaha Juppé yahamijwe mu 2004 ndetse akatirwa gufungwa amezi 18 ariko mu bujurire ayo mezi aza kugabanywa agera kuri 14, ubwo yari Umunyamabanga Mukuru w’Ishyaka RPR akaba n’umuyobozi wungirije ushinzwe imari mu Mujyi wa Paris.

Hananengwamo kandi gahunda za Alain Juppé, zirimo ko ateganya kongera imyaka yo kujya mu kiruhuko cy’izabukuru cyangwa gukuraho imisoro ku mitungo, ISF.

Aba -Socialiste basabwe kwirinda Juppé

Mu matora y’ibanze mu Bufaransa, bikemangwa ko hari n’abashobora gutora Juppé bo ku zindi mpande.

Umuhanga mu bya politiki, Jérôme Sainte-Marie, yabwiye BFMTV ati ‘‘Biragaragara ko hari amatsiko ndetse n’ibigambiriwe. Kuba ibiganiro mpaka by’abakandida bahatana mu matora y’ibanze byanyuze kuri televiziyo byararebwe na miliyoni hafi esheshatu, bigaragaza neza ko amatora y’ibanze agenda ahengamira ku ruhande rw’aba- Républicains (habarizwamo Juppé na Sarkozy).’’

Alain Juppé wanabaye Minisitiri w’Ububanyi n’Amahanga w’u Bufaransa mu gihe cya Jenoside yakorewe Abatutsi mu 1994, anagarukwaho ku ruhare ubuyobozi bwe bwagize muri ibyo bihe, ariko kugeza uyu munsi ntibarabyemera.

Ubusabe nk’ubu bukangurira abantu gutera umugongo Juppé, buheruka gushimangirwa na Komisiyo y’Igihugu yo kurwanya Jenoside, CNLG, yavuze ko bitewe n’uruhare yagize muri Jenoside, Juppé adakwiye kugirirwa icyizere n’Abafaransa mu matora ya perezida.

Mu kiganiro CNLG n’ihuriro ry’abahanzi b’Abafaransa ‘Uz et Coutumes’ mu Ukuboza umwaka ushize, Umujyanama wa CNLG mu by’amategeko, Dr Diogène Bideri, yagize ati ‘‘Nkeka ko abaturage badashobora gutora n’uwo Alain Juppé. Ndagira ngo ntibazamutore kuko yagiriye nabi Abanyarwanda,… mugende mubivuge hose ko tumufata nk’umuntu watugiriye nabi.’’

Alain Juppé yatangiye kwikomwa n'abayobozi batandukanye

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved