Kwamamaza

Umurambo wa Shimon Peres wajyanwe ku Nteko mbere yo gusezererwa

Yanditswe kuya 29-09-2016 saa 13:21' na Jean Pierre Tuyisenge


Shimon Peres wabaye Perezida wa Israel kuva 2007–2014 akaza kwitabye Imana ku wa 28 Nzeri 2016, Umurambo we wabanje kujyanwa ku Ngoro y’Inteko Ishinga Amategeko y’icyo gihugu izwi nka Knesset, aho uteganyijwe kumara amasaha 12 kugira ngo asezerweho bwa nyuma.

Peres ufatwa nk’umwe mu bashinze Leta ya Israel mu 1948, yishwe n’uburwayi bwo kuva amaraso mu bwonko.Tariki ya 13 Nzeri 2016 nibwo yajyanywe kwa muganga igitaraganya.

RFI dukesha iyi nkuru ivuga ko imodoka yari itwaye umurambo we yahageze mu masaha ya mu gitondo cyo kuri uyu wa 29 Nzeri 2016, iherekejwe n’iy’abapolisi.

Isanduku wari urimo yari itwikirije ibendera ry’igihugu, ishyirwa imbere y’Ingoro nk’ikimenyetso cyo kumusezeraho ku rwego rw’igihugu.

Inkuru ikomeza ivuga ko Perezida wamusimbuye, Reuven Rivlin n’umugore we baherekeje umurambo bawushyiraho indabo.

Minisitiri w’Intebe, Benajamin Netanyahu, ari kumwe na Perezida wa Knesset, aho Peres yarahiriye mu myaka 50 ishize, na we yari ahari.

Umurambo wa Shimon Peres ngo ugomba kugeza nibura i saa tatu za nijoro uri imbere y’inteko Ishinga Amategeko.

Minisitiri w’Ububanyi n’Amahanga w’u Rwanda akaba n’Umuvugizi wa Guverinoma, Louise Mushikiwabo, yifashishije Twitter yavuze ko u Rwanda rwifatanyije na Israel, imiryango n’inshuti nyinshi za Shimon Peres.

Peres yavutse mu 1923 i Vishnyeva muri Belarus ahahoze ari muri Pologne, yinjira mu Nteko Ishinga Amategeko ya Israel mu 1959.

Mu 1994, yahawe igihembo cyitiriwe Nobel kubera uruhare rwe mu isinywa ry’amasezerano y’amahoro hagati ya Israel na Palestine mu 1993. Ni Igihembo yakiriye ari kumwe n’uwari Minisitiri w’Intebe wa Palestine, Yitzhak Rabin na Yasser Arafat wari Perezida.

Yasezeye muri politiki mu 2014 nyuma ya manda ye y’imyaka irindwi nka Perezida. Yari abaye muri politiki ya Israel hafi imyaka 50, akaba yaragize imyanya inyuranye irimo Minisitiri w’Ingabo mu 1976, nyuma aba Minisitiri w’Intebe na Perezida kuva 2007 kugeza 2014.

Perezida Reuven Rivlin ari imbere y'isanduku irimo umurambo wa Shimon Peres

Inkuru wasoma bijya gusa: Shimon Peres wabaye Perezida wa Israel yitabye Imana ku myaka 93, U Rwanda rwihanganishije Israel nyuma y’urupfu rwa Shimon Peres


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved