Umuherwe Mark Zuckerberg yaciye amarenga yo kwinjira muri politiki

Yanditswe na M Moïse
Kuya 5 Kanama 2017 saa 12:46
Yasuwe :
0 0

Umuyobozi Mukuru wa Facebook, Mark Elliot Zuckerberg, yahaye akazi k’ubujyanama umunyepolitiki wahoze ari umuyobozi mukuru mu bikorwa byo kwiyamamaza kwa Hillary Clinton, bica amarenga ko yaba ashaka kwinjira mu bikorwa bya politiki.

Mark Zuckerberg nyuma yo gutangaza ko yahaye akazi Joel Benenson wanahoze ari umujyanama mukuru wa Barack Obama, benshi batangiye kubihuza no kuba uyu muherwe ashaka kwinjira mu buryo bweruye muri politiki.

Joel Benenson yahawe akazi ko kugenzura Ikigo cya Chan Zuckerberg Initiative gifasha abatishoboye kiyoborwa n’umugore we Priscilla Chan.

Uyu mugabo w’imyaka 65 ufite Sosiyete yitwa Benenson Strategy Group, yakoranye n’abanyapolitiki bakomeye harimo Perezida ucyuye igihe wa Leta Zunze Ubumwe za Amerika, Barack Obama na Hillary Clinton watsinzwe na Donald Trump mu matora aheruka mu 2016.

Politico dukesha iyi nkuru itangaza ko n’ubwo nta byinshi byatangajwe kuri aka kazi uyu munyepolitiki azakora, bivugwa ko yashinzwe iby’ubushakashatsi ku birebana n’imbuga nkoranyambaga z’uyu muryango utagamije inyungu.

Benshi bagaragaza ko guha imbaraga iki kigo byafasha uyu mugabo kwigarurira imitima ya benshi ndetse bikaba byanamubera iturufu imuganisha muri politiki.

Muri Mutarama uyu mwaka, Zuckerberg n’umugore we bahaye akazi ku mwanya w’ubuvugizi muri iki kigo, David Plouffe, wari ukuriye ibikorwa byo kwamamaza Obama mu 2008 na Amy Dudley wahoze akorana na Senateri wa Leta ya Virginia ahabwa umwanya w’ubujyanama mu by’itangazamakuru muri njyanama y’ikigo bayoboye.

Mark Zuckerberg n'umugore we Priscilla Chan bayoborana Ikigo Chan Zuckerberg Initiative gifasha abatishoboye

Ibi byose bije bikurikira ingendo za Mark Zuckerberg mu bice bitandukanye by’iki gihugu bikaba biri kuzamura umwuka w’uko uyu muyobozi yaba yifuza guhangana na Donald Trump mu matora ataha ya 2020.

Imibare yavuye muri Leta ya Carolina ya Ruguru yagaragaje ko abasaga 40% bo mu ishyaka ry’Aba- Démocrates bifuza Zuckerberg, abandi 40% nabo bari inyuma ya Trump. Umwe muri batanu bavugaga ko bigoye kugira uwo ahitamo cyane ko bose uko ari babiri ubushobozi bwabo bujya kungana.

Uyu muherwe w’imyaka 33 utunze akayabo ka miliyari $70.4 yigaruriye imitima ya benshi mu ngendo zizenguruka igihugu yakoze muri Leta 50 mu ntangiriro z’uyu mwaka.

Ingendo yakoreye mu bice bitandukanye muri North Dakota aho yasuye ibitaro byita ku bazahajwe n’ibiyobyabwenge ziri mu byatumye bikekwa ko ashobora kuba agiye kujya muri politiki.

Muri Gicurasi yanditse ku rubuga rwe rwa Facebook avuga ko abamubaza niba ibi abikora yifuza umwanya mu buyobozi ko atari byo ahubwo agamije kureba niba abarenga miliyari ebyiri bose bakoresha Facebook babona serivisi nziza.

Umuherwe Mark Zuckerberg w’imyaka 33 atunze akayabo ka miliyari $70.4
Umuherwe Mark Zuckerberg yiyegereje umwe mu banyapolitiki bakomeye muri Amerika bica amarenga ko ashaka kwinjira muri politiki
Joel Benenson asanzwe azwi cyane kuba inyuma y’abanyapolitiki bakomeye yakoranye na Barack Obama na Hillary Clinton

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza