Umudepite wo muri Australia yasabye umugabo mugenzi we ko bashyingiranwa imbere y’abagize inteko bose

Yanditswe na Rabbi Malo Umucunguzi
Kuya 4 Ukuboza 2017 saa 10:22
Yasuwe :
0 0

Abadepite bo muri Australia kuri uyu wa Mbere bazindukiye mu mirimo y’Inteko Ishinga Amategeko nk’uko bisanzwe, mu biganiro mpaka biganisha ku kwemeza mu mategeko ugushyingiranwa kw’abahuje ibitsina.

Gusa mugenzi wabo Tim Wilson w’imyaka 37, yari yazindukanye ubutumwa budasanzwe yatangiye mu ruhame, bwo gusaba umugabo mugenzi we bamaranye igihe, ko bashyingiranwa.

Nk’uko ibinyamakuru bitandukanye byabitangaje, Tim Wilson udasanzwe ahisha ubutinganyi bwe, mu ijambo yavuze yabanje kubwira bagenzi be inzira y’inzitane we n’umukunzi we Ryan Bolger banyuzemo, nk’abantu bakundana kandi bombi ari abagabo.

Mu gihe biyemerera ko bambikanye impeta mu myaka irindwi ishize, Wilson yavuze ko zishushanya igisubizo cy’ikibazo yari amaze igihe adashobora kubaza yatuye.

Yateruye mu ijwi ridasohoka neza kubera amarangamutima, ati “Rero hasigaye ikintu kimwe cyo gukora”, arahindukira areba mu baturage ahari hicaye uwo yihebeye, akomeza agira ati “Ryan Patrick Bolger, wemeye ko dushyingiranwa?”

Bolger nawe yahise amwenyura amwemerera atazuyaje, abadepite babaha amashyi maze na Perezida w’Inteko, Rob Mitchell, abafasha mu buryo icyo gikorwa kizasigara mu mateka y’icyo gihugu, asaba ko bishyirwa mu nyandiko y’ibikorwa by’inteko ko Bolger yavuze ‘Yego’.

Muri Australi hari kuba ibiganiro bya nyuma ku itegeko ryemera ugushyingiranwa kw’abahuje ibitsina, nyuma y’uko abaturage baheruka kubyemeza binyuze muri kamarampaka.

Abadepite bagenzi ba Wilson bagiye batangaza ko yakoze agashya, ko ariwe mudepite wa mbere usabye umuntu ko bashyingiranwa imbere y’abagize Inteko Ishinga Amategeko.

Depite Warren Entsch yahobeye Tim Wilson nyuma yo kuvuga ijambo rye
Tim Wilson na Ryan Bolger basanzwe bakundana
Tim Wilson imbere y'Inteko Ishinga Amategeko

Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza