00:00:00 IGIHE NETWORK KN KINYARWANDA EN ENGLISH FR FRANCAIS

Ukekwaho uruhare mu rupfu rwa Perezida wa Haiti yafashwe, Canada yibasiwe n’ibiza: Ay’ingenzi avugwa mu mahanga

Yanditswe na IGIHE
Kuya 17 Ugushyingo 2021 saa 10:17
Yasuwe :
0 0

Inzego z’ubutegetsi za Turikiya zafashe umucuruzi witwa Samir Handal, ukekwaho uruhare rukomeye mu rupfu rw’uwari Perezida wa Haiti, Jovenel Moise, wishwe muri Nyakanga uyu mwaka.

Itabwa muri yombi ry’uyu mugabo ryabye ku wa Mbere tariki 17 Ugushyingo 2021. Ni cyo gikorwa cya vuba mu gushakisha abishe Jovenel Moise mu gihe Haiti ihanganye n’imivurungano ya politiki, ibura rya lisansi, udutsiko tw’abanyarugomo n’inzara ikabije kubera umutingito ukomeye yahuye na wo muri Kanama.

Handal afite inkomoko muri Haiti nk’uko byatangajwe n’ibitangazamakuru binyuranye. Yafashwe ubwo indege yarimo yagwaga i Istanboul ivuye muri Amerika yerekeza muri Jordanie.

Ntibyatangajwe niba Haiti izasaba ko yohererezwa uyu mugabo ngo acirwe urubanza.

Turikiya yafashe umugabo ukekwaho uruhare mu rupfu rwa Perezida wa Haiti

====================================================

Benshi bakuwe mu byabo n’ibiza byibasiye Canada

Ibiza bikomoka ku mvura n’imyuzure bya mbere bifite ubukana mu myaka 100 ishize byibasiye Umujyi wa Vancouver muri Canada, bisiga benshi bakuwe mu byabo ndetse imihanda irangirika.

Iyo mvura yatangiye kugwa ku wa Mbere nk’uko inkuru ya BBC ibivuga. Umugore umwe yapfuye nyuma yo kugiwirwa n’inkangu mu muhanda naho abandi babiri baburirwa irengero.

Abaturage bagera ku bihumbi birindwi byabaye ngombwa ko bava mu byabo kubera imyuzure.

Minisitiri ushinzwe gutwara abantu n’ibintu mu ntara, Rob Fleming, yabwiye itangazamakuru ko icyo ari cyo cyiza kibi kibayeho mu myaka 100 ishize.

Amashusho yashyizwe ku mbuga za internet yerekanye imodoka zireremba hejuru y’amazi yakomotse ku rubura hirya no hino mu mujyi.

Byabaye ngombwa ko hitabazwa kajugujugu mu bikorwa by’ubutabazi bwakorewe abagera kuri 300 bari babuze uko bava aho bari kubera icika ry’imihanda.

Ibiza muri Canada byibasiye abatari bake mu Mujyi wa Vancouver

====================================================

Amerika ishobora kwirukana abasirikare banze gufata urukingo rwa Covid-19

Ingabo zirwanira mu mazi mu gisirikare cya Leta Zunze Ubumwe za Amerika zanze kwikingiza Covid-19, zishobora kuvanwa mu zindi kandi zigatakaza amwe mu mahirwe zari zigenewe nk’uko byatangajwe kuri uyu wa Kabiri.

Umunsi ntarengwa wo kwikingiza kuri aba basirikare ni ku wa 28 Ugushyingo 2021.

Inkuru ya VOA ivuga ko umusirikare ashobora gusaba kudakingirwa ku mpamvu z’ubuzima bwe n’imyizerere ishingiye ku idini ariko mu gihe ubusabe bwe butemewe agomba kwikingiza mu minsi itanu uhereye igihe bwangiwe.

Nyuma y’igihe ntarengwa, ubuyobozi bw’iri shami buzatangira igenzura no kwirukana abatarakingiwe. Abanze gukingirwa bashobora kwimwa amahirwe yo kwiga, kuzamurwa mu ntera no guhabwa agahimbazamusyi.

Abagera kuri 99% by’abasirikare barwanira mu mazi bamaze guhabwa nibura urukingo rumwe rwa Covid-19 naho 95% bakingiwe mu buryo bwuzuye. Abasigaye bagomba kuba bikingije bitarenze ku wa 28 Ugushyingo.

Abasirikare mu ishami ry'abarwanira mu mazi muri Amerika batemera kwikingiza Covid-19 bashobora kwirukanwa

====================================================
RDC: Umubare w’ababuriye ubuzima mu Kiyaga ukomeje kwiyongera

Umubare w’abapfiriye mu bwato bwarohamye mu Kiyaga cya Kivu mu cyumweru gishize muri Repubulika Iharanira Demokarasi ya Congo, ukomeje kwiyongera nyuma y’imirambo yakuwe mu mazi kuri uyu wa Kabiri wageze kuri 22.

Ubutegetsi muri iki gihugu bwari bwatangaje ko abantu umunani ari bo bapfuye ubwo ubwato bari barimo butwaye abantu n’ibicuruzwa bwashwanyukaga ku wa Kane.

Ku wa Mbere habonetse indi mirambo itanu na ho ku wa Kabiri tariki 16 Ugushyingo 2021 habonetse icyenda bituma umubare w’abamaze kumenyekana ko bapfuye ugera kuri 22.

Ibiro Ntaramakuru by’Abafaransa, byatangaje ko mu bantu 145 bari muri ubwo bwato, 111 bararokotse naho abandi barenga 10 baburirwa irengero.

Mu 2019 habaye impanuka ikomeye y’ubwato mu Kiyaga cya Kivu yahitanye abarenga 100, byatumye ubutegetsi busaba abakora ingendo zo mu mazi ko baba bambaye amajire atuma batarohama igihe habaye impanuka.

Abahitanywe n'impanuka y'ubwato mu Kiyaga cya Kivu muri Repubulika Iharanira Demokarasi ya Congo bamaze kugera kuri 22

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .