00:00:00 IGIHE NETWORK KN KINYARWANDA EN ENGLISH FR FRANCAIS

Ubwoko bushya bwa Covid-19 bugiye kujya bwitwa amazina y’inyuguti z’Ikigereki

Yanditswe na Rosine Ingabire
Kuya 1 Kamena 2021 saa 07:51
Yasuwe :
0 0

Ishami ry’Umuryango w’Abibumbye wita ku Buzima (OMS), watangaje ko ugiye gutangira guha amazina ubwoko bushya bwa Covid-19 hashingiwe ku nyuguti z’Ikigereki.

Hashize iminsi hirya no hino ku Isi haboneka ubwoko bushya bwa Covid-19 butandukanye n’ubwari busanzwe. Ahanini ubwo bwoko bushya hari ubwo buba bwandura cyane kurusha ubwari busanzwe. Ubwoko buhangayikishije kuri ubu harimo ubwabonetse bwa mbere mu Buhinde, muri Afurika y’Epfo no mu Bwongereza.

OMS yatangaje ko ubu bwoko bushya bwajyaga bwitirirwa amazina y’ibihugu bwabonetsemo bwa mbere, nyamara bimwe muri ibyo bihugu byagaragaje ko kwitirirwa amazina y’icyorezo nka Covid-19 ari ukubiha akato.

Kuva ubu noneho ubwoko bushya bwabonetse mu Bwongereza buzajya bwitwa Alpha, ubwo muri Afurika y’Epfo bwitwe Beta mu gihe ubwo mu Buhinde buzitwa Delta.

Nubwo ubwo bwoko bushya bwari busanganywe amazina ya gihanga nk’aho ubwo mu Buhinde bwiswe B.1.617.2, abantu batandukanye harimo n’itangazamakuru bakundaga kubwitirira igihugu bwabonetsemo mbere.

Umwe mu bashinzwe kurwanya indwara z’ibyorezo muri OMS, Maria Van Kerkhove abinyujije kuri Twitter, yatangaje ko nta gihugu gikwiriye guhabwa akato cyitirirwa ubwoko runaka bwa Covid-19 kuko ari cyo cyabubonye mbere.

Ubwoko buzajya buhabwa amazina ashingiye ku nyuguti z’Ikigereki ni ubuzajya bugaragara ko buteye inkeke kurusha ubundi.

OMS yatangaje ko amazina mashya atazasimbura ayari asanzwe akoreshwa mu buryo bwa gihanga.

Ubusanzwe inyuguti z’Ikigereki ni 24, ni ukuvuga ko niharamuka habonetse ubwoko bushya bwa Covid-19 bukomeye kandi burenze uwo mubare, amazina azashira. OMS yatangaje ko amazina nashira bazashaka ubundi buryo.

OMS yatangaje ko nta gihugu gikwiriye kwitirirwa ubwoko runaka bwa COVID-19 kubera ko ari cyo cyabubonye mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .