Ubwiza bw’imideli yambawe n’ibyamamare byitabiriye irahira rya Biden bwanyuze benshi (Amafoto)

Yanditswe na Muhonzire Sylvine
Kuya 22 Mutarama 2021 saa 02:42
Yasuwe :
0 0

Mu irahira rya Joe Biden ugiye kuba Perezida wa 46 wa Leta Zunze Ubumwe za Amerika mu myaka ine iri imbere, kimwe mu byagarutsweho cyane mu byaranze uwo munsi harimo imideli igezweho yari yambitswe ibyamamare byitabiriye uwo muhango w’akataraboneka.

Joe Biden yarahiriye kuyobora Leta Zunze Ubumwe za Amerika ku wa 20 Mutarama 2021. Ni umuhango wari ubereye ijisho ndetse byageze ku myambaro abawitabiriye baserukanye birushaho.

Kuva kuri Visi Perezida Kamala Harris; Jill Biden, umufasha wa Perezida Joe Biden; Michelle Obama, umufasha wa Barack Obama wahoze ayoboye Amerika; umuhanzi Lady Gaga na Jennifer Lopez n’abandi benshi baserutse kuri uwo munsi w’ibirori, imyambarire yabo ni kimwe mu byagarutsweho cyane byaranze uwo munsi w’amateka, ahanini bishingiye ku buryo yari iteye ubwuzu kuyireba.

Buri uko umwe yasesekaraga mu ruhame, urufaya rw’amashyi n’akamo rwakwiraga hose na cyane ko ibi byamamare byari byabukereye, gusa urukundo rweretswe Barack Obama n’umugore we Michelle Obama rwari umwihariko.

Kimwe mu ntandaro yabyo ni uburyo uwo muryango n’ubundi usanzwe ukunzwe, ariko by’umwihariko, imyambarire ya Michelle Obama yashimishije abantu cyane.

Uyu mugore yaserutse mu mideli ifite ibara ry’umutuku wijimye, yambaye n’ikoti rirerire bigaragara ko aberewe rwose.

Kamala Harris uzaba Visi Perezida wa Amerika na we yaserutse mu mwambaro ufite ibara rya ‘violet’ (move) ku ikanzu yari yambaye ndetse n’ikoti ryari riyiherekeje. Iyi myambaro yakozwe n’umunyamideli w’umwirabura, Christopher John Rogers, watsindiye igihembo cya CFDA Fashion Awards 2019. Uyu yanambitse ibindi byamamare nka Michelle Obama, Beyoncé na Rihanna. Azwi kandi mu gukora imyambaro yo mu mabara yerurutse atijimye, amwe atuma uyambaye ahita agaragara mu bandi.

Si Kamala wenyine wari wambaye move kuko na Hillary Clinton watsinzwe na Trump mu matora ya 2016, na we yaserutse mu mwambaro usa gutyo.

Perezida Biden n’umugabo wa Harris, Douglas Emhoff, bagaragaye bambaye ‘costume’ zakozwe n’umunyamideli, Ralph Lauren, umusaza ufite inkomoko mu Bayahudi ariko akaba yaraciye agahigo muri Amerika mu gukora imideli ihenze cyane mu myaka 40 ishize.

Jill Biden na we yari yambaye ikanzu n’ikote rirerire nka Harris ariko bikoze mu buryo butandukanye, ikanzu ya Jill yari mu ibara ry’ubururu bwerurutse iriho utuntu dushashagirana. Agapfukamunwa yari yambaye na ko kasaga gutyo, bikaba byarakozwe n’umunyamideli, Alexandra O’Neill.

Alexandra yavuze ko atewe ishema no kwambika Jill Biden. Yagize ati “Ni iby’icyubahiro gikomeye kwambika Biden uyu munsi. Ntewe ishema no kuba mbaye nibura igice gito kigize amateka ya Amerika.”

Inzu y’imideli ya Alexandra yashinzwe mu 2017, aho yagiye agira abakiliya b’ibyamamare nk’umuhanzi Lizzo, umukinnyi wa filime ukomeye ukomoka mu Buhinde, Priyanka Chopra ndetse na Kate Hudson na we w’umukinnyi wa filime muri Amerika.

Kuba umuryango wa Biden n’uwa Harris yose yarambaye imideli yahanzwe n’abakora imideli bakomoka muri Amerika, byaciye amarenga y’uko bazongera gukorana na bo cyane nk’uko byahoze ku ngoma ya Obama, nyuma y’uko Melania Trump we yakunze gukorana n’abanyamideli bo ku Mugabane w’i Burayi.

Lady Gaga we ubwo yari agiye kuririmba indirimbo y’igihugu, yaserutse yambaye imideli yakozwe n’Umunyamerika utuye mu Bufaransa, Daniel Roseberry, ukorera inzu y’imideli yitwa Schiaparelli. Yari yambaye ikanzu ndende y’umukara hasi ndetse n’umutuku hejuru, ifite amaboko maremare kandi iriho igishushanyo cy’inuma hejuru ku ruhande rw’ibumoso gifite ibara rya zahabu.

Umunyamideli wayikoze yavuze ko iyi kanzu ari ibaruwa y’urukundo yandikiye igihugu cye akumbuye.

Yagize ati “Nk’Umunyamerika uba muri Paris, uyu mwenda ni ibaruwa y’urukundo ku gihugu nkumbuye ndetse no ku muhanzi nkundira ibihangano bye kuva kera.”

Jennifer Lopez na we yahacanye umucyo mu myenda myiza iri mu ibara ry’umweru, ibara ryerekana agaciro k’abagore mu buyobozi ryambawe na Kamala Harris ubwo yagezaga ijambo ry’intsinzi ku Banyamerika mu Ugushyingo umwaka ushize.

Iri bara kandi ryambawe na Hillary Clinton mu 2016 ubwo yemeraga kuzahagararira Ishyaka ry’Aba-Démocrates mu matora ya Perezida muri 2016.

Hillary na Bill Clinton baserutse bambaye neza
Joe Biden n'umugore we Jill Biden bari bambaye mu buryo bubereye ijisho
Imyambarire ya Michelle na Barack Obama yishimiwe na benshi
Jill Biden yari yambaye ikanzu ihenze cyane
Jennifer Lopez yari yambaye imideli y'umweru
Ni umwambaro urata ishema ry'abagore b'abayobozi muri Amerika
Lopez ni umwe mu bahanzi bafite izina rikomeye muri Amerika
Lady Gaga yari yambaye umwambaro utangaje cyane, wakozwe n'umunyamideli ukorera mu Bufaransa
Lady Gaga yaririmbye indirimbo y'igihugu yambaye gutya
Abahoze ari ba Perezida ba Amerika n'abafasha babo bari bahari muri uyu muhango w'irahira rya Joe Biden
Kamara Harris yari yambaye umwambaro wa move ufite kinini usobanuye mu mateka y'abagore b'abirabura
Umwambaro wa Lopez warishimiwe cyane
Ubwo Lady Gaga yasuhuzaga Joe Biden mbere yo kuririmba indirimbo y'igihugu
Lady Gaga yaririmbye indirimbo yubahiriza igihugu
Obama n'umugore we bari bafite akanyamuneza ku maso
Joe Biden n'umugore we Jill Biden na Kamala Harris n'umugabo we Douglas Emhoff basuhuza abitabiriye umuhango w'irahira ryabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .