Kwamamaza

Ubuzima bwa Shimon Peres wahoze ari Perezida wa Israel mu marembera

Yanditswe kuya 14-09-2016 saa 15:24' na Ntakirutimana Deus


Shimon Peres wahoze ari Perezida wa Israel yajyanywe mu bitaro igitaraganya nyuma yo gufatwa bitunguranye n’uburwayi bw’ubwonko bwamufashe butuma ava amaraso menshi.

Peres w’imyaka 93 ari kwitabwaho bikomeye mu bitaro bya Sheba Medical Centre biherereye i Tel Hashomer hafi y’i Tel-Aviv, yajyanywemo ku wa Kabiri tariki ya 13 Nzeri 2016 nkuko ibinyamakuru birimo BBC byabitangaje.

Akigera muri ibyo bitaro yahise atangira gukorerwa amasuzuma akomeye. Kubera uburwayi bwe bahisemo kumutera ikinya kimusinziriza wese [kimushyira muri Koma] kuko yavaga n’ amaraso menshi. Yatangiye guhumeka yifashishije imashini zabugenewe.

Umuhungu we Chemi Peres yavuze ko bajyanye se kwa muganga mu masaha mabi, ariko yizeye ko aza gukira.

Ati “Ndabyizera, ndemera ko Data ari umuntu wihariye. Kandi ndamusengera n’umutima wanjye wose kugira ngo ibintu bigenda neza.

Minisitiri w’Intebe wa Israel, Benjamin Netanyahu yifashishije urubuga rwe rwa Twitter, yavuze ko abanya-Israel bifuriza Peres gukira.

Ati “ Shimon, turagukunda kandi n’igihugu cyose kirakwifuriza gukira.”

Muri Mutarama 2016, Peres yari yajyanywe muri ibyo bitaro, icyo gihe yabazwe byoroheje kubera uburwayi bw’umutima bwari bwamugaragayeho.

Peres yakoreye Israel imirimo ikomeye kuva icyo gihugu cyashingwa mu 1948 irimo kuba Perezida guhera muri Nyakanga 2007 kugeza muri uko kwezi 2014.

Yabaye kandi Minisitiri w’Ububanyi n’Amahanga, Minisitiri w’Intebe hagati y’imyaka 1977 na 1996, yabaye kandi umwe mu bari bashinzwe ibijyanye na gahunda yo gukora ibisasu bya kirimbuzi.

Mu 1994 yahawe igihembo cyitiriwe Nobel kubera uruhare yagize mu masezerano y’amahoro yashyizweho umukono hagati ya Israel na Palestine mu 1993.

Mbere yo kujya mu bitaro, Peres yari yashyize ku rubuga rwe rwa Facebook filimi ibuza abaturage kugura ibicuruzwa byo muri Israel.

Indwara y’ubwonko Peres arwaye ni imwe mu zica abantu benshi ku Isi, kuko nko muri Amerika iri ku mwanya wa gatanu mu zimaze guhitana imbaga , aho muri buri minota ine umwe ahasiga ubuzima.

Iyo ndwara kandi ifata abantu basaga ibihumbi 800 buri mwaka ku Isi, mu gihe muri buri masegonda 40, umuntu umwe ayandura.

Iyo ndwara ituruka ku mikorere y’umubiri cyane ku ijyanwa ry’amaraso mu bwonko, rimwe ayo maraso ashobora guhura n’imbogamizi zituma atagera mu bwonko bishobora guterwa n’iturika ry’imitsi ijyanamo amaraso, bituma ingirangingo z’umubiri (tissu) zipfa.

Shimon Peres wahoze ari Perezida wa Israel yatunguwe n'indwara y'ubwonko ajyanwa kwa muganga igitaraganya
Shimon Peres yahawe igihembo cyitiriwe Nobel mu 1994, nyuma y'uruhare yagize mu kunga Israel na Palestine

Kwamamaza
IZINDI NKURU WASOMA
Ifoto y’umunsi
2016-09-27 08:20:56
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 28 Nzeri 2016
Copyright © 2009 -2014 - IGIHE Ltd - All Rights Reserved