Ubutumwa bwa mbere bwanditswe kuri Twitter bwagurishijwe miliyari 3 $

Yanditswe na Dufitumukiza Salathiel
Kuya 25 Werurwe 2021 saa 11:03
Yasuwe :
0 0

Rwiyemezamirimo w’Umunya-Malaisie, Sina Estavi, yatangaje ko miliyoni 2, 9$ aheruka kwishyura ubutumwa bwa mbere bwanditswe kuri Twitter na nyir’ukuyishinga, Jack Dorsey, ari ishoramari ryuje ubuhanga.

Ku wa 22 Werurwe 2021, nibwo Reuters yatangaje ko Estavi w’imyaka 29 yegukanye ubutumwa bwa Dorsey bwari bumaze ibyumweru bibiri bugurishwa, abutangaho 2,915,835.47$ (arenga miliyari 2,9 Frw).

Benshi babifashe nk’aho atanze menshi atazagaruzwa, ariko we yemeza ko ishoramari yakoze yizeye ko rizunguka.

Mu kiganiro yahaye BBC, Astavi yagize ati “Ni igice cy’amateka ya muntu ku mitungo iri mu buryo bw’ikoranabuhanga. Ubwo se ni nde wamenya igiciro cy’ubutumwa bwa mbere bwashyizwe kuri Twitter mu mateka ya muntu, mu myaka 50 iri imbere uhereye none?”

Si nyiri ugushora imari uvuga ko umushinga we uzunguka gusa kuko n’inzobere zirimo Cathy Hackl uzi iby’imbuga nkoranyambaga na Nanne Dekking umenyereye iby’ubugeni mu ikoranabuhanga bemeza ko ubwo butumwa buzagira agaciro gakomeye mu bihe by’ahazaza; bugafatwa “nk’igice cya mbere cy’igitabo kiboneka gake” ndetse “n’urwibutso rw’ingenzi cyane”.

Ubutumwa bwaguzwe Jack Dorsey yabushyize kuri Twitter ku wa 21 Werurwe 2006, nyuma y’amasaha make atangije urwo rubuga rukoreshwa n’abarenga miliyoni 300 mu Isi kugeza ubu.

Buragira buti “Ubu ndigutangiza Twitter yanjye.”

Nubwo ubwo butumwa bwabaye ubwa Estavi, uwabushaka wese yanabasha kububona.

Amasezerano y’igura yakozwe mu buryo bw’ikoranabuhanga, uwaguze ahabwa icyemezo kizwi nka “Non-fungible token” cyerekana nyir’ubugeni bubitse kuri internet, kwishyura hakoreshwa ifaranga rizwi nka “ether” ry’Ikigo cya Bridge Oracle gihanganye na Bitcoin mu bucuruzi bw’ifaranga ryo kuri internet kiyoborwa na Sina Estavi.

Amakuru avuga ko ubwo butumwa Dorsey yabugurishije agamije kwifashisha ayo ari buhabwe mu bikorwa byo gufasha abakene.

Rwiyemezamirimo w’Umunya-Malaisie, Sina Estavi, ni we wegukanye ubutumwa bwa mbere bwashyizwe kuri Twitter, abwishyura miliyoni 2,9 $ / Ifoto: Bridge Oracle

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .