U Bwongereza: Umugabo n’umugore bahumanyijwe n’uburozi busa n’ubwahawe uwahoze ari intasi y’u Burusiya

Yanditswe na Akayezu Jean de Dieu
Kuya 5 Nyakanga 2018 saa 02:06
Yasuwe :
0 0

Inzego zishinzwe kurwanya iterabwoba mu Bwongereza ziri gukora iperereza ku miti yahumanyije abantu babiri ubu bamerewe nabi cyane, bikekwa ko ari imwe n’iyahumanyije uwahoze ari maneko y’u Burusiya, muri Werurwe uyu mwaka.

Aba bantu bivugwa ko ari uwitwa Charlie Rowley w’imyaka 45 na Dawn Sturgess w’imyaka 44 basanzwe bataye ubwenge mu nyubako iri ahitwa Amesbury ku wa Gatandatu, mu gace ka Wiltshire.

Agace ka Amesbury byabereyemo gaherereye mu bilometero hafi 13 uvuye muri Salisbury aho Sergei Skripal wahoze ari intasi y’u Burusiya n’umukobwa we Yulia baheruka kurogerwa hakoreshejwe Novichok, biza kuvugwa ko byakozwe n’u Burusiya ndetse biba igitotsi gikomeye mu mubano w’ibihugu byombi.

Komiseri Wungirije wa Polisi ushinzwe kurwanya iterabwoba muri Londres, Neil Basu, yavuze ko batangiye iperereza ngo barebe niba ibi bitero byombi ntaho bihuriye. Gusa ngo nta gihamya kiraboneka ko aba bantu bahigwaga.

Yagize ati “Ntabwo mfite amakuru y’iperereza yahamya niba bari bagambiriwe mu buryo ubwo aribwo bwose. Nta kintu kirabigaragaza na kimwe.”

Polisi ya Wiltshire ngo yabanje gukeka ko baguwe nabi nyuma yo gukoresha cocaine cyangwa heroin yahumanye.

Gusa ku wa Mbere bitewe n’ibimenyetso bakomeje kugaragaza, ibizamini byabo byoherejwe muri laboratwari ikomeye ngo bisuzumanwe ubushishozi.

Basu yakomeje agira ati "Nyuma y’isuzuma ryimbitse ry’ibizamini, turemeza ko ko uwo mugabo n’umugore bahumanyijwe n’uburozi bwa Novichok, bwanagaragajwe ko ari nabwo bwahumanyije Yulia na Sergei Skripal,"

Uyu mugabo n’umugore bombi bari kuvurirwa ku bitaro by’akarere bya Salisbury ari naho Skripal n’umukobwa we bavurijwe.

Akanama kihariye kashyizweho na Guverinoma y’u Bwongereza, Cobra, kahise gakorana ngo haganirwe ku byabereye Amesbury, kandi “biri gukurikiranwa mu buryo bukomeye.”

Bivugwa ko Rowley na Sturgess bari bitabiriye ibikorwa by’umuryango ku rusengero rw’Ababatisita rwa Amesbury ku wa Gatandatu, mbere y’uko baza kugaragara bataye ubwenge.

Umunyamabanga w’uru rusengero, Roy Collins yavuze ko nta wundi muntu wigeze agira uburwayi muri icyo gikorwa cyangwa ngo habe igikorwa icyo aricyo cyose cyakekwa ko ari yo ntandaro.

Charlie Rowley w’imyaka 45 na Dawn Sturgess w’imyaka 44 basanzwe bataye ubwenge mu nyubako iri ahitwa Amesbury ku wa Gatandatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza