Kwamamaza

U Bwongereza bwemeye gushyigikira amasezerano yiswe aya Kigali

Yanditswe kuya 9-09-2016 saa 09:55' na Jean Pierre Tuyisenge


Leta y’u Bwongereza yatangaje ko ishyigikiye amasezerano yiswe aya Kigali akubiye mu mirongo migari 18 (Kigali Principles) agenga amahame yashyizweho na Leta y’u Rwanda agamije kurinda umutekano w’abasivili mu gihe baba bari mu ntambara.

Mu nama yateranye kuva ku itariki ya 7 kugeza 8 Nzeli 2016 i Londres, Leta y’ u Bwongereza ibinyujije mu bunyamabanga bwayo bushinzwe ububanyi n’amahanga n’umuryango wa Commonwealth, yavuze ko igiye gushyigikira no gutera inkunga ayo masezerano.

Umunyamabanga wa Leta y’u Bwongereza ushinzwe Ububanyi n’Amahanga n’Umuryango wa Commonwealth Hon Baroness Anelay, yavuze ko igihugu cye kigiye gushyigikira no gutera inkunga imirongo migari 18 izagenderwaho mu kurinda umutekano w’abasivili nkuko bikubiye muri aya masezerano.

Rt Hon Baroness Anelay yagize ati “ Iyi nama yo muri iki cyumweru igamije kureba uburyo kugarura amahoro byakorwa mu buryo bwiza. Kongera ubushobozi bw’abarinda abasivili ni kimwe mu by’ingenzi birimo ndetse n’imirongo migari y’amasezerano ya Kigali ateguye mu buryo bwo kubibafashamo, nishimiye kubabwira ko Leta y’u Bwongereza izatera inkunga aya masezerano ya Kigali nk’inzira yo kwerekana ko u Bwongereza bushyigikiye ibikorwa byo kurinda abasivili.”

Aya masezerano ya Kigali yemejwe mu nama yateranye kuva ku itariki ya 28 kugeza 29 Gicurasi 2015 I Kigali, yakoranyije abahagarariye Umuryango w’Abibumbye, abakuru b’ingabo na Polisi basaga 30 baturuka mu bihugu bitera inkunga Umuryango w’Abibumbye muri gahunda zayo zo kugarura amahoro ndetse n’abandi bafatanyabikorwa.

Ni inama yari ifite intego yo kurebera hamwe uburyo bwakoreshwa mu kurinda umutekano abasivili mu gihe baba bari mu bihe by’intambara.

Iyo nama kandi yaje ikurikira indi mpuzamahanga yigaga ku bikorwa byo kugarura amahoro yabereye i New York mu mwaka wa 2014, yitabirwa na Perezida wa Repubulika y’u Rwanda Paul Kagame, Visi Perezida wa Leta Zunze Ubumwe za Amerika, Joe Biden; Minisitiri w’Intebe wa Bangladesh , Pakistan, u Buyapani n’Umunyamabanga Mukuru w’Umuryango w’Abibumbye Ban Ki- Moon.

Aya mahame yashyizweho n’u Rwanda, amaze gushyirwaho umukono n’ ibihugu 24 byo ku isi.

Ibihugu byasinye mbere kuri aya amasezerano ya Kigali ni ibitanga umubare munini w’ingabo mu butumwa bwa Loni, birimo nka Ethiopia, Bangladesh, Inde, Pakistan n’ibindi. Gusa u Rwanda rwifuza ko ibihugu byose biri muri Loni byasinya kuri aya mahame.

Muri aya mahame u Rwanda rusaba ko ibihugu byose bitanga ingabo mu butumwa bwa Loni bwo kubungabunga amahoro byakurikiza ihame ryo kohereza abasirikare mu butumwa bafite ubumenyi, ubushobozi n’ubushake buhagije bwo gutabara abasivili.

Kugeza ubu u Rwanda rufite abasirikare 6000 hirya no hino mu butumwa bw’amahoro bwa Loni. Rufite kandi abapolisi 600 ndetse n’abasivili bari mu butumwa nk’ubu.

U Rwanda ruri mu bihugu bifite ingabo nyinshi mu butumwa bw'amahoro bwa UN

Kwamamaza
IZINDI NKURU WASOMA
Ifoto y’umunsi
2016-09-27 08:20:56
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 28 Nzeri 2016
Copyright © 2009 -2014 - IGIHE Ltd - All Rights Reserved