U Bwongereza bwahagaritse inkunga bwageneraga Oxfam

Yanditswe na Bukuru JC
Kuya 8 Mata 2021 saa 08:33
Yasuwe :
0 0

Leta y’u Bwongereza yahagaritse inkunga yageneraga umuryango mpuzamahanga ugamije kurwanya ubukene, Oxfam, nyuma y’ibirego by’uko abakozi babiri b’uwo muryango bagaragaye mu bikorwa byo guhohotera abagenerwabikorwa babiri muri Repubulika Iharanira Demokarasi ya Congo.

Muri iki cyumweru, ni bwo humvikanye ibirego cy’uko hari abakozi babiri ba Oxfam bijanditse mu bikorwa byo guhohotera bamwe mu bafashwa n’uwo muryango muri Congo.

Uyu muryango wahise uvuga ko wahagaritse abakozi babiri bagaragaye muri ibyo bikorwa, gusa ibi ntibyatumye u Bwongereza budatangaza ko Oxfam ivuye ku rutonde rw’imiryango igenerwa inkunga n’icyo gihugu.

Ni ku nshuro ya kabiri Oxfam ihagarikiwe inkunga n’u Bwongereza kuko byaherukaga mu mwaka wa 2018, ubwo abandi bakozi b’uwo muryango bari bahohoteye abaturage ba Haiti, bigatuma Oxfam ihagarikwa imyaka itatu yose itakira inkunga iturutse mu Bwongereza.

Uyu muryango wavuze ko watangiye iperereza kugira ngo hamenyekane amakuru yimbitse kuri icyo kibazo, kandi ko “Ibi biragaragaza ko turajwe ishinga no kwita ku mahame mpuzamahanga yo kwita ku bagenerwabikorwa bacu no kugenzura abakozi bacu”.

Oxfam ni umuryango uharanira iterambere mpuzamahanga binyuze mu kurwanya ubukene. Ni umwe mu miryango nterankunga minini ku Isi, kuko watangiye mu 1942, ugakorera mu bihugu 67 byiganjemo ibiri mu ntambara cyangwa ibiyivuyemo vuba. Uyu muryango kandi uhuriza hamwe indi miryango nterankunga irenga 3500 ku Isi.

Oxfam yahagarikiwe inkunga kubera ibikorwa by'ihohotera byakozwe n'abakozi bayo muri Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .