Kwamamaza

U Bwongereza: Abadepite bashinje David Cameron uburangare mu ihirikwa rya Gaddafi

Yanditswe kuya 14-09-2016 saa 12:09' na Niyonsenga Schadrack


Abadepite bagize Inteko Ishinga Amategeko mu Bwongereza bashinje uwahoze ari Minisitiri w’Intebe muri icyo gihugu, David Cameron ndetse n’igihugu cy’ubufaransa kuba ntacyo bakoze mu kurinda Muammar Gaddafi wayoboraga,Libya byatumye ahirikwa ku butegetsi yishwe mu mwaka wa 2011.

Komite ishinzwe ububanyi n’amahanga mu Nteko Ishinga Amategeko y’u Bwongereza, yagaragaje ko Cameron nta ngamba zifatika yafashe mbere yo kohereza indege z’intambara muri iki gihugu, byatumye imitwe y’ibyihebe irushaho gukaza umurego.

Igihugu cy’u Bwongereza n’u Bufaransa ni byo byari biyoboye ibikorwa byo kohereza indege z’Intambara zo kurwanya ingabo za Gaddafi mu kwa gatatu 2011, ubwo Gaddafi yavugaga ko agiye kugaba ibitero ku nyeshyamba zari zigaruriye intara ya Benghazi.

BBC ivuga ko nyuma y’uko Gaddafi ahiritswe ku butegetsi, igihugu cya Libya cyahuye n’ibihe by’ubwicanyi n’intambara. Muri iki gihugu havutse leta nyinshi n’imitwe y’abarwanyi itabarika, ni na bwo kandi umutwe w’intagondwa ziyitiriye Leta ya kiyisilamu (Islamic state) wabonye uko winjira ufata ibirindiro muri Libya.

Ubwo yireguraga ku byo ashinjwa, David Cameron yabwiye Abadepite muri Mutarama ko ibyemezo bafashe (gutera Gaddafi) byari bikenewe bitewe n’uko ngo yari atangiye kugirira nabi abaturage bo muri Benghazi ndetse ashaka no kubica nk’imbeba.

Ibi ariko ntibyakuyeho ko komite ishinzwe ububanyi n’amahanga mu Nteko Ishinga Amategeko yahamije Cameron amakosa y’uko Leta y’u Bwongereza yananiwe kugenzura neza niba ubwo bwicanyi i Benghazi bwari indengakamere kuburyo byari kubasaba kuganira na Gaddafi imbona nkubone.

Abadepite kandi bahamije ko guverinema yari iyobowe na David Cameron itabashije kumenya niba mu nyeshyamba zari muri icyo gihugu harimo abarwanyi bo mu mitwe igendera ku idini ya Islam.

Abadepite bavuga ko Leta y’u Bwongereza itagaragaje ubushake bwo guhagarika ibikorwa by’ingabo mu gihe yari imaze kubona ko muri Benghazi hamaze kugaruka umutuzo kugira ngo barebe ubundi buryo barindamo abaturage, ahubwo ngo igahitamo kongera ubufasha mu bijyanye n’ingabo.

Bemeza ko Cameron yagombaga kugendera ku mubano uwo yasimbuye ku mwanya wa Minisitiri w’Intebe, Tony Blair yari afitanye na Gaddafi kugira ngo aburizemo umugambi wo guhirika Gaddafi no kugira ngo ashake uburyo haboneka ibisubizo by’iki kibazo.

Aba badepite kandi bagaragaje ko Leta y’igihugu cyabo ntacyo yakoze kugira ngo icungire umutekano intwaro zakoreshwaga ku butegetsi bwa Gaddafi, ibintu bemeza ko byateye ukwiyongera gukabije kw’iterabwoba mu gace k’amajyaruguru ya Afurika.

Crispin Blunt, uyobora komite y’ububanyi n’amahanga mu Nteko Ishinga Amategeko y’Ubwongereza yagaragaje ko hari ubundi buryo bwa politiki bwagombaga gukoreshwa mu kurinda abaturage, kuvugurura ubutegetsi mu buryo bworoheye u Bwongereza ndetse n’igihugu cya Libya.

Ibi byose ngo byateye ingaruka zikomeye muri Libya, zirimo gusubira inyuma muri politiki n’ ubukungu, kuvuka kw’imitwe ya gisirikare itabarika, imvururu n’intambara z’urudaca mu moko atandukanye, kwita ku baturage n’impunzi byaragabanutse, uburenganzira bwa muntu muri Libya ntibukitaweho, intwaro zakoreshwaga n’ingabo za Gaddafi ubu nizo zikoreshwa mu guhungabanya umutekano mu karere n’ibindi.

Muammar Gaddafi yishwe ku wa 20 Ukwakira 2011, nyuma yo gufatirwa mu bwihisho n’ingabo ziyitaga ko zigamije impinduka muri Libya(National Transitional Council of Libya) mu gace ka Sirte.


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved