U Bushinwa: Impungenge ku hazaza nyuma y’igabanyuka rya 15% ku bana bavuka

Yanditswe na Dufitumukiza Salathiel
Kuya 10 Gashyantare 2021 saa 01:19
Yasuwe :
0 0

U Bushinwa ubu ni cyo gihugu gifite abaturage benshi mu Isi kuko bumaze kugira abasaga miliyari 1,5. Kuba ari igihugu gifite ubukungu buteye imbere [icya kabiri ku Isi nyuma ya Leta Zunze ubumwe za Amerika] bituma ubwinshi bw’abaturage butaba ikibazo cyane ahubwo bugafatwa nk’umwe mu mitungo kamere gifite cyane ko bakora amasaha 24/24 bubaka iterambere.

Ku rundi ruhande ariko umubare w’Abashinwa bageze mu zabukuru ukomeje kuzamuka ubutitsa, uw’abavuka wo ukagenda ugabanyuka. Nk’ubu imibare y’Ibiro by’Ibarurishamibare muri icyo gihugu yerekana ko abasaga miliyoni 250 bangana na 18% by’Abashinwa bose, bafite hejuru y’imyaka 60.

Imibare kandi igaragaza ko mu 2019 abaturage b’icyo gihugu barengeje imyaka 65 bari ku gipimo cya 12,6%, bavuye ku 10% bariho mu 2015, mu gihe mu 1965 bari ku 3,36%. Bitekerezwa ko mu 2050, Abashinwa basaga miliyoni 480 (hafi kimwe cya gatatu) bazaba barengeje imyaka 60 y’amavuko.

Ni mu gihe abavuka bo bagiye baganyuka uko imyaka ihita indi igataha. Imibare igaragaza ko mu 2019 havutse abana miliyoni 11,79, ufatwa nk’umwaka wa mbere hari havutse abana bake kuva mu 1949.

Haje kugaragara ikinyuranyo gikomeye ubwo Minisiteri ibishinzwe yatangazaga ko mu 2020 abavutse bagabanyutseho 14,9% ugereranyije na 2019. Abasaga miliyoni 10,03 ni bo bandikishijwe ko bavutse mu mwaka ushize.

Umubare w’abana bavuka wagiye ugabanyuka biturutse ku ngamba igihugu cyafashe zo kubuza abaturage kubyara ngo badakomeza kwiyongera cyane, aho mu myaka itandukanye umubare w’abana bagenwe ku muryango bagiye bagabanywa bikageza aho umuryango wemererwa kubyara umwe, uwa kabiri ababyeyi bakirwariza icyo akenera cyose.

Kuva mu 1979 kugeza mu 2015, u Bushinwa bwari bwarashyizeho gahunda yo kubyara umwana umwe, ubyaye uwa kabiri agahanwa bikomeye.

Abagore benshi bahatiwe gukuramo inda iyo yabaga ari iya kabiri. Ni itegeko ryaje nyuma y’uko hagati ya 1960 na 1965 umuryango wari wemerewe kubyara abana batandatu.

Mu 2016 igihugu cyabonye ko hagiye kubaho ikibazo cy’urubyiruko ruke, maze imiryango yemererwa kubyara abana babiri, ndetse hashyirwaho n’uduhimbazamusyi n’ibindi bihembo bitandukanye hagamijwe gushishikariza ababyeyi kubyara.

Mu myaka mike ishize kandi icyo gihugu cyashyize igitutu ku rubyiruko by’umwihariko ab’igitsinagore kibinyujije mu bitangazamakuru na Minisiteri y’Uburezi, aho abagejeje ku myaka 27 y’amavuko bagiye bahatirwa gushaka kugira ngo babyare.

Urugero rwa hafi ni mu 2018 ubwo People’s Daily yatangaza inkuru igira iti “Kubyara ni ikibazo ku muryango, kikaba n’ikintu gihangayikishije igihugu.” Icyo gitangazamakuru cyasobanuye ko “ingaruka z’igabanyuka ry’abana bavuka ku bukungu n’umuryango mugari zatangiye kugaragara.”

Ibyo ariko abashakashatsi bavuga ko u Bushinwa bwabitekereje butinze, bikaba bitazatanga umusaruro ukenewe.

Inzobere mu by’ubukungu zitandukanye zigaragaza ko kuba abaturage b’iki gihugu bakomeje gusaza kandi n’abavuka ari bake bishobora kuzagira ingaruka zikomeye ku bukungu bw’iki gihugu, cyari kimaze kugera ku rwego bivugwa ko nibura mu 2028 gishobora kuzaba icya mbere gifite ubukungu buteye imbere mu Isi.

Umushakashatsi akaba n’umwarimu muri Kaminuza ya Hong Kong, Stuart Gietel-Basten, avuga ko ibyo u Bushinwa buri gukora n’ubundi bitazabufasha kugira urubyiruko rukenewe, kuko abaturage bari gushishikarizwa kubyara n’ubundi bari kurenga imyaka y’uburumbuke.

Ati “Yego abaturage bari gusaza ni ikibazo ku hazaza. Igikenewe gukorwa ni ukuvuga uti ni gute twagenza abenshi mu baturage dufite? Ushobora kubikora ubemerera gukomeza kororoka binyuze mu gushyiraho impinduka mu burezi, guhindura uburyo bwo gushyira abakozi mu kiruhuko cy’izabukuru, uburyo bw’ubuvuzi buboneye ndetse hakongerwa ishoramari mu kugabanya inzitizi z’ahazaza.”

Nubwo kororoka byagabanyutse kubera ingamba z’igihugu zo guhatira abaturage kubyara bake mu myaka yashize, inzobere zivuga ko n’uburezi hari uruhare bwabigizemo, kubera ko abakobwa benshi iyo bamaze kuminuza bashishikazwa no kwishakira amafaranga ugasanga urushako ntacyo rubabwiye.

Abashakashatsi babikurikiranira hafi bakomeje kugaragaza impungenge ko abaturage b’icyo gihugu bashobora kuzasaza kitaragera ku iterambere ry’ubukungu cyifuza.

Umubare w'abana bavuka mu Bushinwa ukomeje kugabanuka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .